૧૪. રાસિસમ્ભવકથા

૪૯૦. નવેવ યેવાપનકા, અટ્ઠારસ ચ રાસયો;

નવભિંસતિસમ્ભિન્ના, દસ દ્વે સવિભત્તિકા.

૪૯૧. એકદ્વયતિચતુછસત્તટ્ઠાનાનવજ્જકે;

સત્તવીસતિ સત્તેકો, દ્વયમેકો પુનેકકો.

૪૯૨. દસેવ યેવાપનકા, એકાદસ ચ રાસયો;

અટ્ઠવીસતિસમ્ભિન્ના, દસેવ સવિભત્તિકા.

૪૯૩. એકદ્વયતિચતુક્કછટ્ઠાનનિયતા પન;

અટ્ઠારસ ચ સત્તેકો, એકો ચેકોવ પાપકે.

૪૯૪. દ્વે યેવાપનકા હોન્તિ, રાસયો ચ ચતુબ્બિધા;

તેરસેત્થ અસમ્ભિન્ના, તયોવ સવિભત્તિકા.

૪૯૫. એકદ્વયતિકટ્ઠાના, દસ દ્વેકો અહેતુકે;

ઇચ્ચાનવજ્જા સાવજ્જા-હેતુકે યોગનિચ્છયો.

૪૯૬. સત્તાપિ નત્થિ સાવજ્જે, નિરવજ્જે પકાસકો;

અહેતુકે ચ મગ્ગાદિરાસયો નત્થિ ચુદ્દસ.

૪૯૭. અનવજ્જા તુ સાવજ્જે, સાવજ્જકાનવજ્જકે;

ચિત્તુપ્પાદમ્હિ નત્થેવ, નત્થોભયમહેતુકે.

૪૯૮. સાવજ્જા પન સાવજ્જે, અનવજ્જાનવજ્જકે;

ગહેતબ્બા તુ સબ્બત્થ, સાધારણા પકિણ્ણકા.

૪૯૯. ઝાનપઞ્ચકચિત્તેસુ, સત્તસટ્ઠિસુ નિદ્દિસે;

ઝાનઙ્ગયોગભેદેન, રાસિભેદં તહિં તહિં.

૫૦૦. ચતુછક્કાનવજ્જેસુ, ઞાણપીતિકતં તથા;

ચતુવીસ પરિત્તેસુ, ચતુધા ભેદમુદ્દિસે.

૫૦૧. સરાગવીતરાગાનં, અપ્પમઞ્ઞાપવત્તિયં;

કરુણામુદિતા હોન્તિ, કામપુઞ્ઞમહાક્રિયે.

૫૦૨. ઉપચારપ્પનાપત્તા, સુખિતા સત્તગોચરા;

તસ્મા ન પઞ્ચમારુપ્પે, મહાપાકે અનુત્તરે.

૫૦૩. સોતાપતિતુપેક્ખાસુ, પરિકમ્માદિસમ્ભવે;

ઝાનાનં તુલ્યપાકત્તા, તપ્પાકેસુ ચ લબ્ભરે.

૫૦૪. વિરતી ચ સરાગાનં, વીતિક્કમનસમ્ભવા;

સમ્પત્તે ચ સમાદાને, કામપુઞ્ઞેસુ લબ્ભરે.

૫૦૫. તંતંદ્વારિકદુસ્સિલ્ય-ચેતનુચ્છેદકિચ્ચતો;

મગ્ગે ચ તુલ્યપાકત્તા, ફલે ચ નિયતા સિયું.

૫૦૬. પવત્તાકારવિસયભિન્ના પઞ્ચાપિ સમ્ભવા;

લોકિયે લબ્ભમાનાપિ, વિસું ચેવ સિયું ન વા.

૫૦૭. પાપા લબ્ભન્તિ પાપેસુ, સત્ત છક્કેકકા કમા;

સરૂપયેવોભયકા, નિયતટ્ઠ છળેતરે.

૫૦૮. સાધારણા ચ સબ્બત્થ, યથાવુત્તા પકિણ્ણકા;

તત્થ ચેકગ્ગતા નત્થિ, ઇન્દ્રિયાદીસુ કઙ્ખિતે.

૫૦૯. છન્દાધિમોક્ખા યેવાપિ, વીસેકાદસવજ્જિતે;

ઉદ્ધચ્ચમેકાદસસુ, મજ્ઝત્તમનવજ્જકે.

૫૧૦. સબ્બત્થ મનસિકારો, તિદ્વેકદ્વિતિકાપરે;

અટ્ઠટ્ઠવીસચતૂસુ, પઞ્ચદ્વીસુ યથાક્કમં.

૫૧૧. સમુદાયવસેનેત્થ, ઉદ્ધચ્ચવિરતિત્તયં;

સવિભત્તિકમઞ્ઞત્થ, અવિભત્તિકમેવ તં.

૫૧૨. ચિત્તુપ્પાદેસુ તેનેતં, વિભત્તિઅવિભત્તિકં;

ઇતિ સાધુ સલ્લક્ખેય્ય, સમ્ભવાસમ્ભવં બુધોતિ.

ઇતિ ચેતસિકવિભાગે રાસિસમ્ભવકથા નિટ્ઠિતા.

ચુદ્દસમો પરિચ્છેદો.