૧૧. રાસિસરૂપકથા

૩૮૪. સબ્બં સભાવસામઞ્ઞ-વિસેસેન યથારહં;

ગતરાસિવસેનાથ, અટ્ઠારસવિધં કથં.

૩૮૫. ફસ્સપઞ્ચકરાસી ચ, ઝાનિન્દ્રિયમથાપરે;

મગ્ગબલહેતુકમ્મ-પથલોકિયરાસયો.

૩૮૬. નિરવજ્જા છ પસ્સદ્ધિ-આદિકા ચ સતીમતા;

યુગનન્ધા ચ સમથા, તથા યેવાપનાતિ ચ.

૩૮૭. ફસ્સો ચ વેદના સઞ્ઞા, ચેતના ચિત્તમેવ ચ;

ફસ્સપઞ્ચકરાસીતિ, પઞ્ચ ધમ્મા પકાસિતા.

૩૮૮. વિતક્કો ચ વિચારો ચ, પીતિ ચેકગ્ગતા તથા;

સુખં દુક્ખમુપેક્ખાતિ, સત્ત ઝાનઙ્ગનામકા.

૩૮૯. સદ્ધિન્દ્રિયઞ્ચ વીરિયં, સતિ ચેવ સમાધિ ચ;

પઞ્ઞા ચતુબ્બિધા વુત્તા, મનો પઞ્ચાપિ વેદના.

૩૯૦. જીવિતિન્દ્રિયમેકન્તિ, ચક્ખાદીનિ ચ સત્તધા;

બાવીસતિન્દ્રિયા નામ, ધમ્મા સોળસ દેસિતા.

૩૯૧. આદિમગ્ગે અનઞ્ઞાત-ઞ્ઞસ્સામીતિન્દ્રિયં ભવે;

મજ્ઝે અઞ્ઞિન્દ્રિયં અન્તે, અઞ્ઞાતાવિન્દ્રિયન્તિ ચ.

૩૯૨. પઞ્ઞાનુત્તરચિત્તેસુ, હોન્તિ તીણિન્દ્રિયાનિપિ;

તિહેતુકેસુ સેસેસુ, એકં પઞ્ઞિન્દ્રિયં મતં.

૩૯૩. સુખં દુક્ખિન્દ્રિયઞ્ચેવ, સોમનસ્સિન્દ્રિયં તથા;

દોમનસ્સમુપેક્ખાતિ, પઞ્ચધા વેદના કથા.

૩૯૪. રૂપારૂપવસા દ્વેધા, જીવિતિન્દ્રિયમેકકં;

ચક્ખુસોતઘાનજિવ્હાકાયિત્થિપુરિસિન્દ્રિયા.

૩૯૫. તત્થ જીવિતરૂપઞ્ચ, અટ્ઠેત્થ ન તુ ગય્હરે;

તસ્મા નામિન્દ્રિયાનેવ, દસપઞ્ચ વિનિદ્દિસે.

૩૯૬. સમ્માદિટ્ઠિ ચ સઙ્કપ્પો, વાયામો વિરતિત્તયં;

સમ્માસતિ સમાધિ ચ, મિચ્છાદિટ્ઠિ ચ ધમ્મતો.

૩૯૭. મગ્ગઙ્ગાનિ નવેતાનિ, દ્વાદસાપિ યતો દ્વિધા;

સમ્મામિચ્છાતિ સઙ્કપ્પો, વાયામો ચ સમાધિ ચ.

૩૯૮. લોકપાલદુકઞ્ચેવ, હિરોત્તપ્પમથાપરં;

અહિરીકમનોત્તપ્પં, દુકં લોકવિનાસકં.

૩૯૯. પઞ્ચ સદ્ધાદયો ચેતિ, બલધમ્મા નવેરિતા;

કણ્હસુક્કવસેનાપિ, પટિપક્ખે અકમ્પિયા.

૪૦૦. છ હેતૂ હેતુરાસિમ્હિ,

લોભાલોભાદિકા તિકા;

મોમૂહે કઙ્ખિતુદ્ધચ્ચા,

તત્થ વુત્તાતિ અટ્ઠધા.

૪૦૧. મિચ્છાદિટ્ઠિ અભિજ્ઝા ચ, બ્યાપાદો વિરતિત્તયં;

સમ્માદિટ્ઠિનભિજ્ઝા ચ, અબ્યાપાદો ચ ચેતના.

૪૦૨. દસ કમ્મપથાનેત્થ, વુત્તા વિરતિચેતના;

લોકપાલવિનાસાતિ, વુત્તા લોકદુકા દ્વિધા.

૪૦૩. પસ્સદ્ધિઆદિયુગળા, નિરવજ્જા છ રાસયો;

સતિ ચ સમ્પજઞ્ઞઞ્ચ, ઉપકારદુકં ભવે.

૪૦૪. યુગનન્ધદુકં નામ, સમથો ચ વિપસ્સના;

પગ્ગહો ચ અવિક્ખેપો, સમથદ્દુકમીરિતં.

૪૦૫. યે સરૂપેન નિદ્દિટ્ઠા, ચિત્તુપ્પાદેસુ તાદિના;

તે ઠપેત્વાવસેસા તુ, યેવાપનકનામકા.

૪૦૬. છન્દો ચ અધિમોક્ખો ચ, તત્રમજ્ઝત્તતા તથા;

ઉદ્ધચ્ચં મનસિકારો, પઞ્ચાપણ્ણકનામકા.

૪૦૭. માનો ચ થિનમિદ્ધઞ્ચ, ઇસ્સા મચ્છરિયં તથા;

કુક્કુચ્ચમપ્પમઞ્ઞા ચ, તિસ્સો વિરતિયોપિ ચ.

૪૦૮. એતે અનિયતા નામ, એકાદસ યથારહં;

તતો ચ સેસા સબ્બેપિ, નિયતાતિ પકિત્તિતા.

૪૦૯. કેચિ રાસિં ન ભજન્તિ, કેચિ ચાનિયતા યતો;

તસ્મા યેવાપનાતેવ, ધમ્મા સોળસ દેસિતા.

૪૧૦. સત્તતિંસાવસેસા તુ, તત્થ તત્થ યથારહં;

સરૂપેનેવ નિદ્દિટ્ઠા, ચિત્તુપ્પાદેસુ સબ્બથા.

૪૧૧. દેસિતાનુત્તરુદ્ધચ્ચે, નામતો વિરતુદ્ધવા;

તથાનુત્તરચિત્તેસુ, નિયતં વિરતિત્તયં.

૪૧૨. ચિત્તં વિતક્કો સદ્ધા ચ,

હિરોત્તપ્પબલદ્વયં;

અલોભો ચ અદોસો ચ,

લોભો દોસો ચ દિટ્ઠિ ચ.

૪૧૩. અહિરીકમનોત્તપ્પં,

ઉદ્ધચ્ચં વિરતિત્તયં;

સોળસેતે યથાયોગં,

દ્વીસુ ઠાનેસુ દેસિતા.

૪૧૪. વેદના તીસુ વીરિયં, સતિ ચ ચતુરાસિકા;

સમાધિ છસુ પઞ્ઞા ચ, સત્તટ્ઠાનેસુ દીપિતા.

૪૧૫. એકવીસ પનિચ્ચેતે, સવિભત્તિકનામકા;

સેસા દ્વત્તિંસતિ ધમ્મા, સબ્બેપિ અવિભત્તિકાતિ.

ઇતિ ચેતસિકવિભાગે રાસિસરૂપકથા નિટ્ઠિતા.

એકાદસમો પરિચ્છેદો.