૧૦. પભેદકથા

૩૫૨. એકુપ્પાદા નિરોધા ચ, એકાલમ્બણવત્થુકા;

સહગતા સહજાતા, સંસટ્ઠા સહવુત્તિનો.

૩૫૩. તેપઞ્ઞાસ પનિચ્ચેતે, સમ્પયુત્તા યથારહં;

ચિત્તચેતસિકા ધમ્મા, અટ્ઠારસવિધાપિ ચ.

૩૫૪. એકધા છબ્બિધા ચેવ, ચતુધા સત્તધા ઠિતા;

ચિત્તુપ્પાદપભેદેન, ભિન્દિતબ્બા વિભાવિના.

૩૫૫. અટ્ઠ ધમ્માવિનિબ્ભોગા, ભિન્નાસીતિ નવુત્તરા;

સત્તસતં દસ દ્વે ચ, સબ્બે હોન્તિ સમિસ્સિતા.

૩૫૬. સન્તીરણમનોધાતુ, સિતવોટ્ઠબ્બના તથા;

અપુઞ્ઞા કામપુઞ્ઞા ચ, મહાપાકા મહાક્રિયા.

૩૫૭. પઠમજ્ઝાનધમ્મા ચ, લોકુત્તરમહગ્ગતા;

પઞ્ચપઞ્ઞાસ સબ્બેપિ, વિતક્કા હોન્તિ ભેદિતા.

૩૫૮. વિચારાપિ ચ તેયેવ, દુતિયજ્ઝાનનામકા;

એકાદસાપરે ચેતિ, છસટ્ઠિ પરિદીપિતા.

૩૫૯. અપુઞ્ઞા કામપુઞ્ઞા ચ, મહાપાકા મહાક્રિયા;

ચતુક્કા ચેવ ચત્તારો, સિતઞ્ચ સુખતીરણં.

૩૬૦. પઠમાદિતિકજ્ઝાના, લોકુત્તરમહગ્ગતા;

ઇચ્ચેવમેકપઞ્ઞાસ, પીતિયો હોન્તિ સબ્બથા.

૩૬૧. સિતવોટ્ઠબ્બના દ્વે ચ, સાવજ્જા ચાનવજ્જકા;

ભિન્નમેવં તુ વીરિયં, તેસત્તતિવિધં ભવે.

૩૬૨. સાવજ્જા ચાનવજ્જા ચ, મોમૂહદ્વયવજ્જિતા;

છન્દા ભવન્તિ સબ્બેપિ, સટ્ઠિભેદા નવુત્તરા.

૩૬૩. સન્તીરણમનોધાતુ, સિતવોટ્ઠબ્બના તથા;

સાવજ્જા ચાનવજ્જા ચ, વિચિકિચ્છાવિવજ્જિતા.

૩૬૪. અધિમોક્ખા પનિચ્ચેવં, અટ્ઠસત્તતિ ભેદિતા;

તિસતં નવુતિ દ્વે ચ, ભિન્ના હોન્તિ પકિણ્ણકા.

૩૬૫. એકૂનસટ્ઠિ વા હોન્તિ, સદ્ધાદેકૂનવીસતિ;

સહસ્સઞ્ચ સતઞ્ચેકં, એકવીસઞ્ચ સબ્બથા.

૩૬૬. ઞાણેન સમ્પયુત્તા ચ, કામે દ્વાદસધાપરે;

પઞ્ચતિંસાતિ પઞ્ઞાપિ, સત્તતાલીસધા કથા.

૩૬૭. રૂપજ્ઝાનચતુક્કા ચ, કામપુઞ્ઞા મહાક્રિયા;

અટ્ઠવીસપ્પમઞ્ઞેવં, છપ્પઞ્ઞાસ ભવન્તિ ચ.

૩૬૮. અનુત્તરા કામપુઞ્ઞા, તિસ્સો વિરતિયો પન;

હોન્તિ સોળસધા ભિન્ના, અટ્ઠતાલીસ પિણ્ડિતા.

૩૬૯. પઞ્ચવીસાનવજ્જેવં, સમ્પયુત્તા ચતુબ્બિધા;

સહસ્સદ્વિસતઞ્ચેવ, દ્વિ ચ સત્તતિ ભેદતો.

૩૭૦. ચત્તારો પાપસામઞ્ઞા, ભિન્ના દ્વાદસધા પન;

અટ્ઠતાલીસધા હોન્તિ, તે સબ્બે પરિપિણ્ડિતા.

૩૭૧. લોભો પનટ્ઠધા ભિન્નો, થિનમિદ્ધઞ્ચ પઞ્ચધા;

ચતુધા દિટ્ઠિમાનો ચ, ચતુધા દિટ્ઠિયો વિસું.

૩૭૨. દ્વિધા દોસાદિચત્તારો, વિચિકિચ્છેકધાતિ ચ;

સાવજ્જા સત્તધા વુત્તા, ભિન્નાસીતિ તિકુત્તરા.

૩૭૩. ઇચ્ચટ્ઠારસધા વુત્તા, તેપઞ્ઞાસાપિ ભેદતો;

દ્વિસહસ્સઞ્ચ તુ સતં, ભવન્તેકૂનસટ્ઠિ ચ.

૩૭૪. વિતક્કવિચારપીતિસુખોપેક્ખાસુ પઞ્ચસુ;

ભિન્દિત્વા ઝાનભેદેન, ગહેતબ્બા અનુત્તરા.

૩૭૫. અઞ્ઞત્ર પન સબ્બત્થ, નત્થિ ભેદપ્પયોજનં;

અટ્ઠેવ કસ્મા ગય્હન્તિ, અભેદેનાતિ લક્ખયે.

૩૭૬. પઠમાદિચતુજ્ઝાના, લોકુત્તરમહગ્ગતા;

ઇચ્ચેકમેકદસધા, ચતુતાલીસ પિણ્ડિતા.

૩૭૭. તેવીસ પઞ્ચમા ચેતિ, સત્તસટ્ઠિ સમિસ્સિતા;

અપ્પના તત્થ સબ્બાપિ, અટ્ઠપઞ્ઞાસ દીપિતા.

૩૭૮. પઞ્ચતિંસેવ સઙ્ખેપા, લોકુત્તરમહગ્ગતા;

અપ્પના તત્થ સબ્બાપિ, છબ્બીસતિ પકાસિતા.

૩૭૯. ઇદ્ધિવિધં દિબ્બસોતં, ચેતોપરિયનામકા;

પુબ્બેનિવાસાનુસ્સતિ, દિબ્બચક્ખૂતિ પઞ્ચધા.

૩૮૦. અભિઞ્ઞાઞાણમીરેન્તિ, રૂપાવચરપઞ્ચમા;

કુસલઞ્ચ ક્રિયા ચેતિ, ભેદિતં દુવિધમ્પિ ચ.

૩૮૧. તં દ્વયમ્પિ સમ્મિસ્સેત્વા, પઞ્ચાભિઞ્ઞા ચ લોકિયા;

આસવક્ખયઞાણઞ્ચ, છળભિઞ્ઞા પવુચ્ચરે.

૩૮૨. લોકિયા ચ દસાભિઞ્ઞા, ભિન્દિત્વા કુસલક્રિયા;

સત્તસત્તતિ ઝાનાનિ, અટ્ઠસટ્ઠિ પનપ્પના.

૩૮૩. સત્તસત્તતિ ચિત્તાનિ, ચતુપઞ્ઞાસ સબ્બથા;

પચિતાનિ ચ ચિત્તાનિ, એકતિંસસતં સિયુન્તિ.

ઇતિ ચેતસિકવિભાગે પભેદકથા નિટ્ઠિતા.

દસમો પરિચ્છેદો.