૭. ભૂમિપુગ્ગલસમ્ભવકથા

૨૭૦. દ્વિહેતુકાહેતુકાનં, ન સમ્પજ્જતિ અપ્પના;

અરહત્તઞ્ચ નત્થીતિ, નત્થેવ જવનક્રિયા.

૨૭૧. ઞાણપાકા ન વત્તન્તિ, જળત્તા મૂલસન્ધિયા;

દ્વિહેતુકતદાલમ્બં, સિયા સુગતિયં ન વા.

૨૭૨. તિહેતુકાનં સત્તાનં, સમથઞ્ચ વિપસ્સનં;

ભાવેન્તાનં પવત્તન્તિ, છબ્બીસતિપિ અપ્પના.

૨૭૩. અરહન્તાન સત્તાનં, ભવન્તિ જવનક્રિયા;

યથાભૂમિનિયામેન, ઞાણપાકા ચ લબ્ભરે.

૨૭૪. વજ્ઝા પઠમમગ્ગેન, કઙ્ખાદિટ્ઠિયુતા પન;

પટિઘં તતિયેનેવ, કમ્મમન્તેન સાસવં.

૨૭૫. તસ્મા તેસં ન વત્તન્તિ, તાનિ ચિત્તાનિ સબ્બથા;

મગ્ગટ્ઠાનં તુ મગ્ગોવ, નાઞ્ઞં સમ્ભોતિ કિઞ્ચિપિ.

૨૭૬. અહેતુકવિપાકાનિ, લબ્ભમાનાય વીથિયા;

સબ્બથાપિ ચ સબ્બેસં, સમ્ભવન્તિ યથારહં.

૨૭૭. પઞ્ચદ્વારે મનોદ્વારે, ધુવમાવજ્જનદ્વયં;

પરિત્તપુઞ્ઞાપુઞ્ઞાનિ, લબ્ભન્તિ લહુવુત્તિતો.

૨૭૮. ક્રિયાજવનમપ્પના, નત્થાપાયેસુ કારણં;

નત્થિ સહેતુકા પાકા, દુગ્ગતત્તા હિ સન્ધિયા.

૨૭૯. બ્રહ્માનં પટિઘં નત્થિ, ઝાનવિક્ખમ્ભિતં તથા;

હેટ્ઠાઝાનં વિરત્તત્તા, ન ભાવેન્તિ અરૂપિનો.

૨૮૦. પુબ્બેવ દિટ્ઠસચ્ચાવ, અરિયારૂપભૂમકા;

તસ્માદિમગ્ગો નત્થેત્થ, કાયાભાવા સિતં તથા.

૨૮૧. સુદ્ધાવાસાપિ પત્તાવ, હેટ્ઠાનુત્તરપઞ્ચકં;

સત્તપાપપહીના ચ, તસ્મા નત્થેત્થ તાનિ ચ.

૨૮૨. પઞ્ચદ્વારિકચિત્તાનિ, દ્વારાભાવે ન વિજ્જરે;

સહેતુકવિપાકા ચ, યથાભૂમિવવત્થિતા.

૨૮૩. સમ્ભવાસમ્ભવઞ્ચેવં, ઞત્વા પુગ્ગલભૂમિસુ;

લબ્ભમાનવસા તત્થ, ચિત્તસઙ્ગહમુદ્દિસે.

૨૮૪. કુસલાદિપ્પભેદા ચ, તથા ભૂમાદિભેદતો;

વત્થુદ્વારારમ્મણતો, ભૂમિપુગ્ગલતોપિ ચ.

૨૮૫. વિભાગો યો સમુદ્દિટ્ઠો,

ચિત્તાનઞ્ચ તુ સમ્ભવા;

ઞેય્યો ચેતસિકાનઞ્ચ,

સમ્પયોગાનુસારતોતિ.

ઇતિ ચિત્તવિભાગે ભૂમિપુગ્ગલસમ્ભવકથા નિટ્ઠિતા.

સત્તમો પરિચ્છેદો.

નિટ્ઠિતો ચ ચિત્તવિભાગો.