૧૨. દ્વાદસમો પરિચ્છેદો

દસાવત્થાવિભાગો

૧૬૪૨. ઇચ્ચટ્ઠારસધા ભિન્ના, પટિપક્ખપ્પહાનતો;

લક્ખણાકારભેદેન, તિવિધાપિ ચ ભાવના.

૧૬૪૩. કલાપતો સમ્મસનં, ઉદયબ્બયદસ્સનં;

ભઙ્ગે ઞાણં ભયે ઞાણં, ઞાણમાદીનવેપિ ચ.

૧૬૪૪. તથેવ નિબ્બિદાઞાણં, ઞાણં મુચ્ચિતુકમ્યતા;

પટિસઙ્ખા ચ સઙ્ખારુ-પેક્ખાઞાણાનુલોમકં.

૧૬૪૫. ઇચ્ચાવત્થાપભેદેન, દસધાપિ વિભાવિતા;

સભાગત્થવિસેસેન, તિધા સઙ્ગહિતા પુન.

૧૬૪૬. યથાભૂતં નામ ઞાણત્તયં સમ્મસનાદિકં;

ભયાદિઞાણં તિવિધં, નિબ્બિદાતિ પવુચ્ચતિ.

૧૬૪૭. તથા મુચ્ચિતુકામાદિ, વિરાગોવ ચતુબ્બિધં;

લક્ખણત્તયનિજ્ઝાનવસેન પુન વુટ્ઠિતા.

૧૬૪૮. સુઞ્ઞતઞ્ચાનિમિત્તઞ્ચ, તથાપ્પણિહિતન્તિ ચ;

સાધેતિ મગ્ગસઙ્ખાતં, વિમોક્ખત્તયમુત્તમં.

૧૬૪૯. ઇતિ ભાવેતુકામસ્સ, વિભાવેતિ યથાક્કમં;

દસાવત્થાવિભાગેન, સમાદાય યથા કથં.

૧૬૫૦. વિસુદ્ધો પઠમં તાવ, સાધુ સીલવિસુદ્ધિયા;

ઉપચારપ્પનાયઞ્ચ, ઠત્વા ચિત્તવિસુદ્ધિયં.

૧૬૫૧. સપ્પચ્ચયં પરિગ્ગય્હ, નામરૂપં સભાવતો;

દિટ્ઠિકઙ્ખાવિતરણં, પત્વા સુદ્ધિં તતો પરં.

૧૬૫૨. અતીતાનાગતે ખન્ધે, પચ્ચુપ્પન્ને ચ સાસવે;

કલાપતો સમ્મસિત્વા, સમ્મસેય્ય તિલક્ખણં.

૧૬૫૩. આદાનનિક્ખેપનતો,

વયોવુદ્ધત્થગામિતો;

આહારતોપિ ઉતુતો,

કમ્મતો ચાપિ ચિત્તતો.

૧૬૫૪. ધમ્મતારૂપતો ચાપિ, રૂપસત્તકતો નયે;

કલાપતો યમકતો, ખણિકા પટિપાટિતો.

૧૬૫૫. દિટ્ઠિમુગ્ઘાટયન્તો ચ, માનમુગ્ઘાટયં તથા;

નિકન્તિપરિયાદાનો, નામસત્તકતો નયે.

૧૬૫૬. નિચ્ચા ચે ન નિરુજ્ઝેય્યું, ન બાધેય્યું સુખા યદિ;

વસે વત્તેય્યુમત્તા ચે, તદભાવા ન તાદિસા.

૧૬૫૭. સમ્ભવન્તિ હિ સઙ્ખારા, સતિ પચ્ચયસમ્ભવે;

તતો પચ્ચયનિપ્ફન્ના, અવસ્સં ભેદગામિનો.

૧૬૫૮. તદનિચ્ચા ખયટ્ઠેન, દુક્ખા નામ ભયટ્ઠતો;

અનત્તાસારકટ્ઠેન, સઙ્ખારાતિ વિભાવયં.

૧૬૫૯. કાલેન સમ્મસે રૂપં, નામં કાલેન સમ્મસે;

અજ્ઝત્તઞ્ચ બહિદ્ધા ચ, સમાસબ્યાસતો તતો.

૧૬૬૦. યથોપટ્ઠિતભેદેન, સમ્મસન્તો સમૂહતો;

કલાપતો સમ્મસનમિતિ ભાવેતિ પણ્ડિતો.

૧૬૬૧. તસ્સેવં સમ્મસન્તસ્સ, કમ્મઞ્ઞં હોતિ માનસં;

સૂપટ્ઠન્તિ ચ સઙ્ખારા, વોદાયતિ ચ ભાવના.

૧૬૬૨. તતો પરં વિપસ્સન્તો, પરિગ્ગણ્હાતિ પણ્ડિતો;

પચ્ચુપ્પન્નસભાવાનં, ખન્ધાનમુદયબ્બયં.

૧૬૬૩. તણ્હાસમ્મોહકમ્મેહિ,

ખન્ધપઞ્ચકસભાવો;

રૂપમાહારતો હોતિ,

ફસ્સતો વેદનાદયો.

૧૬૬૪. વિઞ્ઞાણં નામરૂપમ્હા, સમ્ભોતીતિ ચ પસ્સતો;

તસ્સ પચ્ચયતો હોતિ, ખન્ધેસુદયદસ્સનં.

૧૬૬૫. તણ્હાદીનં નિરોધા ચ,

નિરોધો હોતિ પસ્સતો;

તથા વીસતિધા હોતિ,

તત્થેવ વયદસ્સનં.

૧૬૬૬. નિબ્બત્તિવિપરિણામલક્ખણં પન પસ્સતો;

ખણતો દસધા નેસમુદયબ્બયદસ્સનં.

૧૬૬૭. ઇત્થં પઞ્ઞાસધા ભેદો,

ખન્ધાનમુદયબ્બયો;

આયતનાદિભેદોપિ,

યોજેતબ્બો યથારહં.

૧૬૬૮. તદેવમનુપસ્સન્તો, ખન્ધાયતનધાતુયો;

અનિચ્ચા દુક્ખાનત્તાતિ, ભાવેતિ બહુધા બુધો.

૧૬૬૯. ભાવનાપસુતસ્સેવં, પસ્સતો બોધિપક્ખિયા;

પાતુભૂતા પવત્તન્તિ, વિસેસેન વિસારદા.

૧૬૭૦. સલક્ખણપરિચ્છિન્ને, તિલક્ખણવવત્થિતે;

છન્દો સાસવસઙ્ખારે, સારદં પરિયેસતિ.

૧૬૭૧. તત્થ પુબ્બઙ્ગમં હુત્વા, સંપક્ખન્દતિ માનસં;

સઙ્કપ્પોભિનિરોપેતિ, આહરન્તો પુનપ્પુનં.

૧૬૭૨. યથાવત્થુસભાવેન, તતો સદ્ધાધિમુચ્ચતિ;

સતિ સૂપટ્ઠિતા હોતિ, પરિગ્ગય્હ સભાવતો.

૧૬૭૩. પઞ્ઞા સમ્પટિવિજ્ઝન્તી, સમાહચ્ચ વિપસ્સતિ;

પગ્ગહેત્વાન વાયામો, પટિપાદેતિ ભાવનં.

૧૬૭૪. તતો પીતિમનો હોતિ, નિપ્ફાદિતમનોરથો;

પામોજ્જબહુલો હુત્વા, પસ્સદ્ધદરથો પન.

૧૬૭૫. વિક્ખેપુદ્ધચ્ચનિત્તિણ્ણો, સમાધિયતિ નિચ્ચલો;

ઉપેક્ખા ભાવનાવીથિં, અધિટ્ઠાતિ તતો પરં.

૧૬૭૬. આરુળ્હયોગ્ગાચરિયો, આજાનીયરથો વિય;

વાતાભાવે પદીપોવ, પસન્નેકમુખટ્ઠિતા.

૧૬૭૭. સુખુમા નિપુણાકારા, ખુરધારાગતા વિય;

ગણ્હન્તી ભાવનાગબ્ભં, પવડ્ઢતિ વિપસ્સના.

૧૬૭૮. સમ્પત્તપટિવેધસ્સ,

તસ્સેવં તં વિપસ્સતો;

જાયતેકો ઉપક્લેસો,

દસોપક્લેસવત્થુકા.

૧૬૭૯. ઓભાસો પીતિ પસ્સદ્ધિ, અધિમોક્ખો ચ પગ્ગહો;

સુખં ઞાણમુપટ્ઠાનમુપેક્ખા ચ નિકન્તિ ચ.

૧૬૮૦. જાતેસ્વેતેસુ યં કિઞ્ચિ, ઉળારં જાતવિમ્હયો;

દિસ્વા વિપસ્સનામગ્ગા, વોક્કમિત્વા તતો પરં.

૧૬૮૧. તમહંકારવિક્ખિત્તો, અસ્સાદેન્તો મમાયતિ;

હોતાધિમાનિકો વાથ, મઞ્ઞન્તો તમનુત્તરં.

૧૬૮૨. સિયા ચેવમુપક્લિટ્ઠા, પતિતા વાથ ભાવના;

તત્થેવં પટિસઙ્ખાય, પટિવિજ્ઝતિ પણ્ડિતો.

૧૬૮૩. ન તણ્હાદિટ્ઠિમાનેહિ, પરિયોગાહહેતુતો;

લક્ખણાલમ્બણત્તા ચ, લોકિયાયં વિપસ્સના.

૧૬૮૪. દિટ્ઠિમાનનિકન્તી ચ, કુમ્મગ્ગા પરિપન્થકા;

મગ્ગો વિસુદ્ધિયા નામ, વિસુદ્ધા ચ વિપસ્સના.

૧૬૮૫. સારથીવ રથં ભન્તમિતિ સઙ્ખાય સાધુકં;

પવિટ્ઠમગ્ગં વિક્ખિત્તં, સમ્પાદેતિ યથા પુરે.

૧૬૮૬. ઇત્થં મગ્ગે અમગ્ગે ચ, યાથાવપટિવેધકં;

મગ્ગામગ્ગવિસુદ્ધીતિ, ઞાણદસ્સનમીરિતં.

૧૬૮૭. ચેતોપવત્તનાકારમિતિ સલ્લક્ખયં બુધો;

સાધુકં પટિવિજ્ઝન્તો, સુખુમં નિપુણં તતો.

૧૬૮૮. પરિપન્થે વિમોચેત્વા, બોધેત્વા બોધિપક્ખિયે;

ભાવનં પટિપાદેન્તો, પુનદેવોદયબ્બયં.

૧૬૮૯. સમધિટ્ઠાય મેધાવી, વિપસ્સતિ તિલક્ખણં;

ઉદયબ્બયઞાણન્તિ, તમીરેન્તિ તતો પરં.

૧૬૯૦. સઙ્ખારાનં વિભૂતત્તા, સાકારાનં વિસેસતો;

તિલક્ખણાનં દિટ્ઠત્તા, સઙ્ખારેસુ સભાવતો.

૧૬૯૧. પરિપન્થા વિમુત્તસ્સ, મગ્ગામગ્ગવિસુદ્ધિયા;

યથાવીથિપ્પવત્તસ્સ, પટિપત્તિવિસુદ્ધિયા.

૧૬૯૨. ઇન્દ્રિયાનં સુતિક્ખત્તા, પરિપક્કા વિપસ્સના;

ઉદયમ્હા વિમુચ્ચિત્વા, ભઙ્ગે ઠાતિ યથા કથં.

૧૬૯૩. ઉપ્પાદો પચ્ચયાયત્તો, ધમ્માનમિતિ નિચ્છિતે;

નિરોધાનુગતા જાતિ, સિદ્ધાવસ્સં નિયામતો.

૧૬૯૪. તતોદયાવ પટ્ઠાય, અત્થાય સૂરિયો વિય;

વિનાસાય પવત્તન્તા, વયન્તેવાતિ પેક્ખતિ.

૧૬૯૫. ઉદયાભોગમોહાય, વયન્તિચ્ચેવ સબ્બથા;

ભેદસ્સભાવમારબ્ભ, ધમ્મેસુ સતિ તિટ્ઠતિ.

૧૬૯૬. અતીતા ચ નિરુદ્ધાવ, નિરુજ્ઝિસ્સન્તિનાગતા;

નિરુજ્ઝન્તેવ વત્તન્તા, ઇચ્ચેવમનુપસ્સતો.

૧૬૯૭. નિજ્ઝરોવ ગિરગ્ગમ્હિ, વારિવોણતપોક્ખરે;

પદીપો વિય ઝાયન્તો, આરગ્ગેરિવ સાસપો.

૧૬૯૮. આતપે વિય ઉસ્સાવો, પરિસ્સાવે જલં વિય;

મદ્દિતં ફેણપિણ્ડંવ, લોણપિણ્ડમિવોદકે.

૧૬૯૯. ઉદકે દણ્ડરાજીવ, વિજ્જુતાવ વલાહકે;

જલં તત્તકપાલેવ, સલિલે વિય બુબ્બુળં.

૧૭૦૦. વાતબ્ભાહતતૂલંવ, તીરં પત્તાવ વીચિયો;

ફલં બન્ધનમુત્તંવ, તિણાનીવ હુતાવહે.

૧૭૦૧. જાયન્તાપિ ચ જિય્યન્તા, મિય્યન્તા ચ નિરન્તરં;

નિરોધાયાભિધાવન્તા, ભઙ્ગાભિમુખપાતિનો.

૧૭૦૨. વિગચ્છન્તાવ દિસ્સન્તિ, ખીયન્તન્તરધાયિનો;

વિદ્ધંસયન્તા સઙ્ખારા, પતન્તા ચ વિનાસિનો.

૧૭૦૩. ભઙ્ગઞાણં તમક્ખાતં, યેન ઞાણેન પસ્સતો;

અનિચ્ચન્તાનુધાવન્તિ, તિવિધાપિ વિપસ્સના.

૧૭૦૪. ઉદયબ્બયભઙ્ગેસુ, પાકટા હિ અનિચ્ચતા;

ભયાદીનવનિબ્બેદે, દુક્ખતાનત્તતા તતો.

૧૭૦૫. ઇત્થં ભઙ્ગમધિટ્ઠાય, પસ્સન્તસ્સ તિલક્ખણં;

સઙ્ખારા સભયા હુત્વા, સમુપટ્ઠન્તિ યોગિનો.

૧૭૦૬. વાળમિગાનુબદ્ધાવ, નિમ્મુજ્જન્તા વિયણ્ણવે;

અમનુસ્સગહિતાવ, પરિક્ખિત્તાવ વેરિહિ.

૧૭૦૭. કણ્હસપ્પસમાલીળ્હા, ચણ્ડહત્થિસમુટ્ઠિતા;

પપાતાવાટપક્ખન્તા, પતન્તાવ હુતાવહે.

૧૭૦૮. વજ્ઝપ્પત્તા મહાચોરા, છિજ્જન્તા વિય સીસતો;

સૂલમારોપિયન્તાવ, પબ્બતેનોત્થટા વિય.

૧૭૦૯. જાતિસઙ્કટપક્ખન્તા, જરાબ્યાધિનિપીળિતા;

મરણાસનિસમ્મદ્દા, મહાબ્યસનભાગિનો.

૧૭૧૦. મચ્ચુનબ્ભાહતા નિચ્ચં, દુક્ખભારસમોત્થટા;

સોકોપાયાસનિસ્સન્દા, પરિદેવપરાયણા.