૧૦. દસમો પરિચ્છેદો

સેસકમ્મટ્ઠાનવિભાગો

૧૨૯૮. બ્યાપાદાદીનવં દિસ્વા, ખેમભાવઞ્ચ ખન્તિયં;

અપ્પમઞ્ઞા તુ ભાવેન્તો, વિનેય્ય પટિઘં કથં.

૧૨૯૯. ચેતોસન્તાપનો કોધો,

સમ્પસાદવિકોપનો;

વિરૂપબીભચ્છકરો,

મુખવણ્ણપ્પધંસનો.

૧૩૦૦. સીલકાલુસ્સિયુપ્પાદો, ચિત્તવિક્ખેપસમ્ભવો;

પઞ્ઞાપજ્જોતવિદ્ધંસી, પટિપત્તિવિબન્ધકો.

૧૩૦૧. અપાયેકાયનો મગ્ગો, પાપકણ્ટકબન્ધકો;

ધમ્મમગ્ગસમુચ્છેદી, મગ્ગદ્વારપિધાનકો.

૧૩૦૨. યસોવણ્ણવિસઙ્ખારો, ગુણમૂલપ્પભઞ્જકો;

દુક્ખધમ્મસમોધાનો, બ્યસનોપદ્દવાકરો.

૧૩૦૩. દુન્નિમિત્તમિદં જાતં, સબ્બસમ્પત્તિધંસનં;

ધૂમકેતુસમુપ્પાદો, સબ્બલોકવિનાસકો.

૧૩૦૪. સબ્બકલ્યાણધમ્માનં, અવમઙ્ગલમુટ્ઠિતં;

હિતારમ્ભસમુગ્ઘાતી, અન્તરાયસમાગમો.

૧૩૦૫. સબ્બાકારપટિક્કૂલં, સબ્બવિદ્દેસકારણં;

વિપત્તિમુખમુપ્પન્નં, અમિત્તજનપત્થિતં.

૧૩૦૬. સપત્તકરણં ઘોરં, સબ્બાનત્થવિધાયકં;

ભયમન્તરતો જાતં, તં જનો નાવબુજ્ઝતિ.

૧૩૦૭. ખુરધારં લિહન્તાવ, ગિલન્તાવ હુતાસનં;

તિત્તલાબુંવ ખાદન્તા, ગણ્હન્તાદિત્તમાયુધં.

૧૩૦૮. બ્યાપાદમત્તસમ્ભવ-મત્તઘઞ્ઞાય કેવલં;

ઉપલાળેન્તિ દુમ્મેધા, ઘોરમાસીવિસં યથા.

૧૩૦૯. દોસતેજેન રુક્ખોવ, સુસિરારુળ્હપાવકો;

અન્તોનુદય્હમાનાપિ, વિપ્ફન્દન્તિ વિઘાતિનો.

૧૩૧૦. નાવબુજ્ઝન્તિ દુમ્મેધા, ચેતોસઙ્કપ્પવાયુના;

ઉક્કામુખામિવાદિત્ત-મુજ્જલન્તા પુનપ્પુનં.

૧૩૧૧. ભયમગ્ગસમારુળ્હા, ખેમમગ્ગવિરોધિનો;

બ્યાપન્ના કિબ્બિસાકિણ્ણા, અત્થદ્વયવિરોધિનો.

૧૩૧૨. અનાથા સલ્લકાવિદ્ધા, વિસટ્ટા અનુસોચિનો;

અન્ધા વિય મિગારઞ્ઞે, ભમન્તિ હતચક્ખુકા.

૧૩૧૩. અસંવિહિતકમ્મન્તા, બાલા કોધવસાનુગા;

ખિપ્પં લક્ખિં પરિચ્ચત્તા, યસોભોગેહિ ધંસરે.

૧૩૧૪. દુપ્પટિપ્પાદિતારમ્ભા, કોધસઙ્ખોભમોહિતા;

ધમ્મામતરસસ્સાદં, ન વિન્દન્તિ અવિદ્દસુ.

૧૩૧૫. બહ્વાદીનવમિચ્ચેવ-મન્તો બ્યાધિમિવુટ્ઠિતં;

જાતાનલમિવુચ્છઙ્ગે, અજ્ઝુપેક્ખન્તિ દુજ્જના.

૧૩૧૬. ચોદયમાના દુક્ખેહિ, ક્લેસાચિણ્ણમલીમહા;

પાપકમ્મેહિ પૂરેન્તા, સેન્તિ મચ્ચુપથે ચિરં.

૧૩૧૭. તમેવં પટિસઙ્ખાય, પટિઘં પન યોનિસો;

વાળમિગંવ ધાવન્તં, આવિસન્તંવ રક્ખસં.

૧૩૧૮. પાવકંવ પરિબ્યુળ્હં, ભાયમાનસ્સ યોગિનો;

સોત્થિભાવાય ખેમન્ત-મુપઞ્ઞત્તં મહેસિના.

૧૩૧૯. માતા કલ્યાણધમ્માનં, ખમા નામ મહિદ્ધિકા;

સમપ્પવત્તિ સત્તેસુ, સબ્બસમ્પત્તિસાધિકા.

૧૩૨૦. કોધાનલજલાસેકો,

સોકોપાયાસનાસનં;

આઘાતસલ્લનિદ્ધારી,

ઉપનાહવિમોચનં.

૧૩૨૧. વણ્ણકિત્તિસમુટ્ઠાનં, ગુણમૂલાભિસેવનં;

અપારુતમુખંવેત-મત્થદ્વયસમિદ્ધિયા.

૧૩૨૨. વિઘાતપરિયાદાન-માસવાનમસેસતો;

પટિપસ્સમ્ભનં ચેતો-પીતિકરણચન્દનં.

૧૩૨૩. સબ્બદુક્ખસમુગ્ઘાતિ, સુખુપટ્ઠાનમુત્તમં;

બ્યસનોદયવિચ્છેદો, ભયભેરવનિગ્ગમો.

૧૩૨૪. ચેતોપસાદસન્ધાનો, પાસાદિકફલાવહો;

પવરો બોધિસમ્ભારો, નરાનરનિસેવિતો.

૧૩૨૫. પાપકન્તારનિત્થારો, ચતુરાપાયરોધકો;

દ્વારાવાપુરણઞ્ચેતં, દેવલોકૂપપત્તિયા.

૧૩૨૬. પઞ્ઞાસીલસમાધાનં, પટિપત્તિવિસોધનો;

પિયઙ્કરો સોમ્મભાવો, દુલ્લભો બહુપત્થિતો.

૧૩૨૭. ક્લેસસઙ્ખોભવિક્ખેપ-વિપ્ફન્દપટિબન્ધનં;

તિતિક્ખાગુણમક્ખાત-મારક્ખવિધિમત્તનો.

૧૩૨૮. વિહિંસારતિસારમ્ભ-પટિરોધવિમોચનં;

વેરિકિબ્બિસવિદ્ધંસી, લોકાનુગ્ગહકારણં.

૧૩૨૯. ધમ્મપજ્જોતકરણં, સંયોગમલસોધનં;

સમ્મોહતિમિરુદ્ધારિ, સમ્પત્તિપટિપાદનં.

૧૩૩૦. ઇચ્ચત્તત્થં પરત્થઞ્ચ, સમ્પાદેત્વા ખમાપરો;

સાધેતિ સબ્બસમ્પત્તિ-મિધ ચેવ પરત્થ ચ.

૧૩૩૧. તિતિક્ખાગુણસમ્પન્નો, પાણભૂતાનુકમ્પકો;

અનાકુલિતકમ્મન્તો, સોરતો સખિલો સુચિ.

૧૩૩૨. નિવાતો સમિતાચારો, સુભગો પિયદસ્સનો;

પટિસઙ્ખાબલપ્પત્તો, ધિતિમા મતિપાટવો.

૧૩૩૩. અક્ખોભો અધિવાસેન્તો,

સબ્બાનત્થે પરિસ્સયે;

ભીમસઙ્ગામાવચરો,

હત્થિનાગોવ સોભતિ.

૧૩૩૪. ઇત્થં સમન્તતો ભદ્દં, તિતિક્ખં પચ્ચવેક્ખતો;

પસ્સમ્ભેતિ સમુટ્ઠાય, ખમા બ્યાપાદસમ્ભમં.

૧૩૩૫. દિબ્બોસધમિવાતઙ્કં, મેઘજ્જવં હુતાસનં;

ખિપ્પમન્તરધાપેતિ, તિતિક્ખા કોધમત્તનો.

૧૩૩૬. તતોનેકગુણોપેતં, નેકદોસપ્પભઞ્જનં;

ખન્તિધમ્મમધિટ્ઠાય, પસન્નધીરમાનસો.

૧૩૩૭. ભાવેય્ય પઠમં તાવ, મેત્તાભાવનમુત્તમં;

અત્તાનમુપમં કત્વા, સત્તેસુ હિતવુડ્ઢિયા.

૧૩૩૮. સબ્બે સત્તા ચ પાણા ચ, ભૂતા જીવા ચ પુગ્ગલા;

અબ્યાપજ્જા તથાવેરા, અનીઘા ચ સુખેધિનો.

૧૩૩૯. વિજ્જાસમ્પત્તિભોગેહિ, પવડ્ઢન્તુ યસસ્સિનો;

પરિવારબલપ્પત્તા, ભયોપદ્દવવજ્જિતા.

૧૩૪૦. સખિલા સુખસમ્ભાસા, અઞ્ઞમઞ્ઞાવિરોધિનો;

મોદન્તુ સુહિતા સબ્બે, મા કિઞ્ચિ પાપમાગમા.

૧૩૪૧. સદ્ધાપામોજ્જબહુલા, દાનસીલમહુસ્સવા;

ગુણભૂસિતસન્તાના, આયું પાલેન્તનામયં.

૧૩૪૨. સમ્માદિટ્ઠિં પુરોધાય, સદ્ધમ્મપટિપત્તિયા;

આરાધેન્તુ હિતોપાય-મચ્ચન્તં સુખસાધનં.

૧૩૪૩. ઇતિ નાનપ્પકારેન, સત્તેસુ હિતમાનસં;

માતાવ પિયપુત્તમ્હિ, પવત્તેય્ય નિરન્તરં.

૧૩૪૪. સિનેહં પરિવજ્જેન્તો, બ્યાપાદઞ્ચ વિનાસયં;

પરિસુદ્ધેન ચિત્તેન, હિતકામોવ કેવલં.

૧૩૪૫. મેત્તાય મિત્તે મજ્ઝત્તે, વેરિકે ચ યથાક્કમં;

કરોન્તો સીમસમ્ભેદં, અત્તનિ ચ સમં ફરે.

૧૩૪૬. આસેવન્તસ્સ તસ્સેવં, હિતાભોગસમાહિતં;

સત્તપઞ્ઞત્તિમારબ્ભ, સમાધિયતિ માનસં.

૧૩૪૭. તતો અનીઘો એકગ્ગો, ઉપસન્તમનોરથો;

ઝાનત્તિકં ચતુક્કં વા, મેત્તાચેતોવિમુત્તિયા.

૧૩૪૮. ભૂમિદેસદિસાસત્ત-ભેદભિન્નેસુ ઓધિસો;

યથાસમ્ભવમપ્પેતિ, સબ્બસત્તેસ્વનોધિસો.

૧૩૪૯. તદેવમેકસત્તમ્હિ, પરિચ્છેદનિયામતો;

બહુકેસુ ચ સત્તેસુ, સબ્બેસુ ચ પવત્તતિ.

૧૩૫૦. તથાસેવિતસન્તાનો,

મેત્તાચેતોવિમુત્તિયા;

કરુણાભાવનાયોગ-

મારભેય્ય તતો પરં.

૧૩૫૧. સત્તાનં દુક્ખિતાકાર-માવજ્જિત્વાન યોનિસો;

‘‘અહો દુક્ખા વિમુચ્ચન્તુ, સબ્બે સત્તા’’તિ ચિન્તયં.

૧૩૫૨. કથં માણવકોયઞ્ચ, ભયભેરવકમ્પિતો;

બ્યસનોપદ્દવાવિદ્ધો, વિપ્ફન્દતિ વિઘાતવા.

૧૩૫૩. તથા હેતે વિમોસાય, પટિપન્ના વિરોધિનો;

સબ્યાપજ્જા વિહઞ્ઞન્તિ, ચેતોદુક્ખસમપ્પિતા.

૧૩૫૪. અથઞ્ઞે પરિદેવન્તિ, વિપત્તિવિનિપાતિકા;

પધુપાયિકસઙ્કપ્પા, સોકોપાયાસભાગિનો.

૧૩૫૫. અથાપરે પરાભૂતા, કામક્લેસવસીકતા;

મોહન્ધકારપક્ખન્તા, સત્તા ગચ્છન્તિ દુગ્ગતિં.

૧૩૫૬. તે તત્થ કટુકં ઘોરમનુભોન્તા સકં ફલં;

દુક્ખસૂલસમાવિદ્ધા, બાહા પગ્ગય્હ કન્દરે.

૧૩૫૭. દીઘરત્તાધિમુત્તાય, દેવલોકસમિદ્ધિયા;

દેવકાયા વિહાયન્તિ, અકામા પરિવત્તિનો.

૧૩૫૮. ચિરકાલં જલિત્વાન, સૂરિયોવ નભન્તરે;

બ્રહ્માનોપિ પતન્તેવ, બ્રહ્મલોકાપરાયણા.

૧૩૫૯. ખન્ધપઞ્ચકમિચ્ચેવં, દુક્ખાગારં સમુબ્બહં;

નાનાગતીસુ વિક્ખિત્તં, પાણજાતં વિહઞ્ઞતિ.

૧૩૬૦. અનાથમનયાપન્નં, પરિહાનિભયાકુલં;

વાતમણ્ડલિકક્ખિત્તપક્ખીવ પરિવત્તતિ.

૧૩૬૧. ઇતિ દિસ્વાન સુત્વા વા, સમ્ભાવેત્વાન વા પુન;

દુક્ખાપગમમિચ્છન્તો, દુક્ખાપગમ પત્થયં.

૧૩૬૨. સુખિતેસુ ચ મેધાવી, દુક્ખાકારમનુસ્સરં;

પવત્તેય્ય દયાપન્નો, કરુણાભાવનપ્પનં.

૧૩૬૩. ‘‘અહો સત્તા વિમુચ્ચન્તુ, દુક્ખધમ્મેહિ સબ્બથા;

સાધુ સમેન્તુપાયાસા, સોકા ચ પરિદેવના.

૧૩૬૪. ‘‘ખીયન્તુ પાપધમ્મા ચ, પસ્સમ્ભેન્તામયા તથા;

સંક્લેસા પલિબોધા ચ, સમુચ્છિજ્જન્તુ પાણિનં.

૧૩૬૫. ‘‘બ્યાપાદા ચ વિહાયન્તુ, વિનિવત્તન્તુપદ્દવા;

બ્યસનાનિ વિનસ્સન્તુ, વિગચ્છન્તુ વિપત્તિયો.

૧૩૬૬. ‘‘વિહેસા ચ વિઘાતા ચ, ખીયન્તુ ભયભેરવા;

પટિક્કમન્તુ વિસ્સટ્ઠા, સોત્થિં પસ્સન્તુ પાણિનો’’.

૧૩૬૭. ઇચ્ચેવમનુકમ્પન્તો, સબ્બસત્તેપિ સબ્બથા;

સબ્બદુક્ખસમુગ્ઘાતં, પત્થેન્તો કરુણાયતિ.