૯. નવમો પરિચ્છેદો

દસાનુસ્સતિવિભાગો

૧૧૦૦. સદ્ધાપબ્બજિતો યોગી, ભાવેન્તોનુસ્સતિં પન;

દસાનુસ્સતિભેદેસુ, ભાવેય્યઞ્ઞતરં કથં.

૧૧૦૧. અરહં સુગતો લોકે, ભગવા લોકપારગૂ;

વિજ્જાચરણસમ્પન્નો, વિમુત્તિપરિનાયકો.

૧૧૦૨. જેટ્ઠો સમ્માભિસમ્બુદ્ધો, સેટ્ઠો પુરિસસારથી;

સત્થા દેવમનુસ્સાનં, બુદ્ધો અપ્પટિપુગ્ગલો.

૧૧૦૩. સબ્બલોકહિતો બન્ધુ, સમત્તરતનાલયો;

સત્તાનમનુકમ્પાય, જાતો નાથો સિવંકરો.

૧૧૦૪. ચક્ખુમા તિત્થકુસલો, ધમ્મસ્સામી તથાગતો;

મચ્ચુધેય્યવિમોક્ખાય, પટિપાદયિ પાણિનો.

૧૧૦૫. સત્થવાહો મહાયોગ્ગો, મગ્ગામગ્ગયુધન્ધરો;

સિરિસત્થમધિગ્ગય્હ, વિચરિત્થ મહાપથં,

૧૧૦૬. અનોમો અસમો ધીરો,

લોકહીતપરક્કમો;

સબ્બાકારવરોપેતો,

અચ્છેરબ્ભુતપુગ્ગલો.

૧૧૦૭. અત્થભૂતો ધમ્મભૂતો,

બ્રહ્મભૂતો મહાયસો;

ઞાણાલોકપરિચ્છિન્ન-

ઞેય્યાસેસપરિગ્ગહો.

૧૧૦૮. આનુભાવવસિપ્પત્તો, આસભણ્ડાનનિચ્ચલો;

મહન્તમરિયાદોયમનન્તગતિગોચરો.

૧૧૦૯. સબ્બા ભિઞ્ઞાબલપ્પત્તો, વેસારજ્જવિસારદો;

સબ્બસમ્પત્તિનિટ્ઠાનો, ગુણપારમિપૂરકો.

૧૧૧૦. અપ્પમેય્યો મહાનાગો, મહાવીરો મહામુનિ;

મહેસી મહિતાચારો, મહામહો મહિદ્ધિકો.

૧૧૧૧. સબ્બત્થસિદ્ધિસઞ્ચારો, મહેસીગણપૂજિતો;

રાજાધિરાજમહિતો, દેવબ્રહ્માભિવન્દિતો.

૧૧૧૨. અભિભૂય તયો લોકે, આદિચ્ચોવ નભન્તરે;

વિરોચતિ મહાતેજો, અન્ધકારે પભઙ્કરો.

૧૧૧૩. બ્યામપ્પભાપરિક્ખિત્તો, કેતુમાલાહલઙ્કતો;

દ્વત્તિંસલક્ખણાસીતિઅનુબ્યઞ્જનસોભિતો.

૧૧૧૪. છબ્બણ્ણરંસિલલિતો, રતનગ્ઘિયસન્નિભો;

સમિદ્ધિરૂપસોભગ્ગો, દસ્સનેય્યંવ પિણ્ડિતં.

૧૧૧૫. ફુલ્લં પદુમસણ્ડંવ, કપ્પરુક્ખોવલઙ્કતો;

નભંવ તારકાકિણ્ણં, ઉત્તમો પટિદિસ્સતિ.

૧૧૧૬. સત્થુકપ્પમહાવીરપુત્તેહિ પરિવારિતો;

સબ્બલોકમહિદ્ધાય, ધમ્મરાજા સયંવસી.

૧૧૧૭. નિદ્ધોતમલચન્દોવ, નક્ખત્તપરિવારિતો;

ખત્તસઙ્ઘપરિબ્યુળ્હો, ચક્કવત્તીવ સોભતિ.

૧૧૧૮. ઇચ્ચાનન્તગુણાકિણ્ણમસેસમલનિસ્સટં;

સબ્બસમ્પત્તિદાતારં, વિપત્તિવિનિબન્ધકં.

૧૧૧૯. દયાપરમહોરત્તં, ભગવન્તમનુસ્સરં;

ભાવેતિ પઞ્ઞવા યોગી, બુદ્ધાનુસ્સતિભાવનં.

૧૧૨૦. સ્વાખાતો તેન સદ્ધમ્મો, સમ્બુદ્ધેન સતીમતા;

પચ્ચત્તપટિવેધેન, પસ્સિતબ્બો યથારહં.

૧૧૨૧. તણ્હાદલિદ્દનાસાય, મનોરથસમિદ્ધિયા;

કાલન્તરમનાગમ્મ, પચ્ચક્ખફલદાયકો.

૧૧૨૨. ઉપનિસ્સયવન્તાનં, ‘‘એહિ પસ્સા’’તિ દસ્સિયો;

પચ્ચત્તમેવ વિઞ્ઞૂહિ, વેદિતબ્બો સભાવતો.

૧૧૨૩. સબ્બાસવસમુગ્ઘાતી, સુદ્ધો સોવત્થિકો સિવો;

પિહિતાપાયકુમ્મગ્ગો, મગ્ગો નિબ્બાનપત્તિયા.

૧૧૨૪. ક્લેસસંકટદુગ્ગમ્હા, દુક્ખક્ખન્ધમહબ્ભયા;

ખેમન્તભૂમિં નિય્યાતિ, અચ્ચન્તમનુપદ્દવં.

૧૧૨૫. પુઞ્ઞતિત્થમિદં નામ, મઙ્ગલઞ્ચ સિવઙ્કરં;

હિતોદયસુખાધાન-મમતાહારમુત્તમં.

૧૧૨૬. અવિજ્જાપટલુદ્ધારવિજ્જાનેત્તોસધં વરં;

પઞ્ઞાધારમિદં સત્થં, ક્લેસગણ્ડપ્પભેદકં.

૧૧૨૭. ચતુરોઘનિમુગ્ગાનં, સેતુબન્ધો સમુગ્ગતો;

ભવચારકરુદ્ધાનં, મહાદ્વારો અપારુતો.

૧૧૨૮. સોકોપાયાસવિદ્ધાનં, પરિદેવસમઙ્ગિનં;

સલ્લનીહરણોપાયો, અચ્ચન્તસુખમીરિતો.

૧૧૨૯. બ્યસનોપદ્દવાપેતો, સંક્લેસમલનિસ્સટો;

ઉજુસમ્મત્તનિયતો, પટિપત્તિવિસુદ્ધિયા.

૧૧૩૦. સુદ્ધસીલપરિક્ખારો, સમાધિમયપઞ્જરો;

સમ્માસઙ્કપ્પચક્કઙ્ગો, સમ્માવાયામવાહનો.

૧૧૩૧. સતિસારથિસંયુત્તો, સમ્માદિટ્ઠિપુરેજવો;

એસ ધમ્મરથો યાતિ, યોગક્ખેમસ્સ પત્તિયા.

૧૧૩૨. વિપત્તિપટિબાહાય, સબ્બસમ્પત્તિસિદ્ધિયા;

સબ્બખન્ધવિમોક્ખાય, ધમ્મં દેસેસિ ચક્ખુમા.

૧૧૩૩. હિતેસી સબ્બપાણીનં, દયાપન્નો મહામુનિ;

ધમ્માલોકં પકાસેસિ, ચક્ખુમન્તાનમુત્તમો.

૧૧૩૪. યં ધમ્મં સમ્મદઞ્ઞાય, ખેમમગ્ગપ્પતિટ્ઠિતા;

પાપકાપગતા ધીરા, પસ્સદ્ધિદરથાસયા.

૧૧૩૫. ભવયોગા વિનિમુત્તા, પહીનભયભેરવા;

અચ્ચન્તસુખમેધેન્તિ, સોત્થિપત્તા મહેસયો.

૧૧૩૬. તમેવમુત્તમં ધમ્મં, ચિન્તેન્તો પન પણ્ડિતો;

ભાવેતીતિ પકાસેન્તિ, ધમ્માનુસ્સતિભાવનં.

૧૧૩૭. ચત્તારો ચ પટિપન્ના, ચત્તારો ચ ફલે ઠિતા;

એસ સઙ્ઘો ઉજુભૂતો, પઞ્ઞાસીલસમાહિતો.

૧૧૩૮. પલાપાપગતો સુદ્ધો, પટિપત્તિપતિટ્ઠિતો;

પરિગ્ગહિતસદ્ધમ્મો, સમિદ્ધિગુણસોભિતો.

૧૧૩૯. પહીનાપાયગમનો, પાપક્લેસવિનિસ્સટો;

પરિપન્થસમુચ્છેદી, ભવચારકભેદકો.

૧૧૪૦. ઉત્તમદમથપ્પત્તો, સુવિનીતો મહેસિના;

વિજ્જાવિમુત્તિવોદાતો, આજાનીયપથે ઠિતો.

૧૧૪૧. સુગતોરસિ સમ્ભૂતો, સુચિધમ્મસિરિન્ધરો;

પટિપાદિતસમ્પત્તો, ધમ્મસાસનસેવિતો.

૧૧૪૨. ભયભેરવનિસ્સઙ્ગો, જિનતેજાનુપાલિતો;

મોનેય્યપથસઞ્ચારો, સુગતોવાદભાજનો.

૧૧૪૩. અપ્પમાદપરિત્તાણો, સીલાલઙ્કારભૂસિતો;

ચેતોસમાધિસન્નદ્ધો, પઞ્ઞાયુધસમુજ્જલો.

૧૧૪૪. ઉજુમગ્ગમધિટ્ઠાય, મારકાયપ્પદાલનો;

અપરાજિતસઙ્ગામો, લલિતોદાતવિક્કમો.

૧૧૪૫. મચ્ચુધેય્યમતિક્કન્તો, બોધિધમ્મપ્પતિટ્ઠિતો;

છળાભિઞ્ઞાબલપ્પત્તો, સમારાધિતસાસનો.

૧૧૪૬. અનુબોધિમનુપ્પત્તો, પભિન્નપટિસમ્ભિદો;

સામઞ્ઞપારમિપ્પત્તો, તોસેતિ જિનમાનસં.

૧૧૪૭. નેકાકારવરૂપેતો, નાનાસમ્પત્તિફુલ્લિતો;

વિપત્તિપથનિત્તિણ્ણો, અભિબુદ્ધિપરાયણો.

૧૧૪૮. આહુનેય્યો પાહુનેય્યો,

દક્ખિણેય્યો સુદુલ્લભો;

સદેવકસ્સ લોકસ્સ,

પુઞ્ઞક્ખેત્તમનુત્તરં.

૧૧૪૯. યત્થ સુદ્ધિમ્હિ નિદ્દોસે, સદ્ધાબીજં પતિટ્ઠિતં;

અચ્ચન્તં પરિપાચેતિ, સમ્પત્તિફલમુત્તમં.

૧૧૫૦. યં ફલં પરિભુઞ્જન્તા, વિમુત્તિરસસેવનં;

અચ્ચન્તસુખિતા ધીરા, ભવન્તિ અજરામરા.

૧૧૫૧. તં ફલં પત્થયન્તેન, સઙ્ઘાનુસ્સતિભાવના;

ભાવેતબ્બા પનિચ્ચેવમિતિ ભાસન્તિ પણ્ડિતા.

૧૧૫૨. પઞ્ચસીલં દસસીલં, પાતિમોક્ખમુપોસથં;

ચાતુપારિસુદ્ધિસીલં, ધુતઙ્ગપરિવારિતં.

૧૧૫૩. એવમેતેસુ યં કિઞ્ચિ, સમાદાય રહોગતો;

તમાનિસંસં ગુણતો, ફલતો ચ વિચિન્તયે.

૧૧૫૪. આદિ ચેતં પતિટ્ઠા ચ, મુખં પમુખમુત્તમં;

મૂલં કુસલધમ્માનં, પભવં પટિપત્તિયા.

૧૧૫૫. સાસનોતરણદ્વારં, તિત્થં સદ્ધમ્મવાપિયા;

પારિસુદ્ધિપદટ્ઠાનં, મગ્ગો ખેમન્તપાપકો.

૧૧૫૬. સાધુ સિક્ખાસમાદાનં, બાહુસચ્ચવિભૂસનં;

અરિયાચારચારિત્ત-મવણ્ણમલવજ્જનં.

૧૧૫૭. કુલપુત્તઅલઙ્કારો, પાપજલ્લપવાહનં;

અનપાયિ સુગન્ધઞ્ચ, મહાપુરિસસેવિતં.

૧૧૫૮. પચ્છાનુતાપહરણં, પીતિપામોજ્જવડ્ઢનં;

નેક્ખમ્મભાવનોપેતં, પબ્બજ્જાવેસસોભનં.

૧૧૫૯. સોપાનં સગ્ગલોકસ્સ, દળ્હાપાયવિધાનકં;

અનુપદ્દવસમ્પત્તિ, સમત્થગુણસૂદની.

૧૧૬૦. ક્લેસપઞ્જરવિચ્છેદિ, વિપત્તિપથવારણં;

સોત્થિકમ્મસમુટ્ઠાનં, અસાધારણમઙ્ગલં.

૧૧૬૧. ‘‘સુલદ્ધા વત મે લદ્ધા, સદ્ધા સુગતસાસને;

સીલં મે યસ્સ કલ્યાણં, પરિસુદ્ધમખણ્ડિતં.

૧૧૬૨. ‘‘દુલ્લભો વત મે લદ્ધો,

મહાલાભો અનપ્પકો;

યોહમક્ખલિતાચારો,

ઉપઘાતવિવજ્જિતો.

૧૧૬૩. ‘‘ધમ્મઙ્કુરિતસન્તાનો, મૂલજાતોસ્મિ સાસને;

ઉજુમગ્ગં સમારુળ્હો, પિહિતા સભયા દિસા.

૧૧૬૪. ‘‘અવઞ્ચા વત મે જાતિ, આરદ્ધા ખણસમ્પદા;

પતિટ્ઠિતોમ્હિ સદ્ધમ્મે, સફલં મમ જીવિતં’’.

૧૧૬૫. ઇત્થં નાનપ્પકારેન, ચિન્તેન્તો ગુણમત્તનો;

સીલક્ખન્ધસ્સ ભાવેતિ, સીલાનુસ્સતિભાવનં.

૧૧૬૬. સદ્ધાય સીલવન્તેસુ, દત્વા દાનં યથારહં;

નિદ્ધોતમલમચ્છેરો, વિવિત્તો તમનુસ્સરે.

૧૧૬૭. દાનં નિધાનમનુગં, અસાધારણમુત્તમં;

અવિનાસસુખાધાનં, અચ્ચન્તં સબ્બકામદં.

૧૧૬૮. કોપદાહોપસમનં, મચ્છેરમલસોધનં;

પમાદનિદ્દાવુટ્ઠાનં, લોભપાસવિમોચનં.

૧૧૬૯. ચેતોવિકારદમનં, મિચ્છામગ્ગનિવારણં;

વિત્તિલાભસુખસ્સાદો, વિભવોદયમઙ્ગલં.