૮. અટ્ઠમો પરિચ્છેદો

કસિણાસુભવિભાગો

૮૮૦. ઇતો પરં પવક્ખામિ, ભાવનાનયમુત્તમં;

નામરૂપં પરિગ્ગય્હ, પટિપજ્જિતુમીહતો.

૮૮૧. ભાવના દુવિધા તત્થ, સમથો ચ વિપસ્સના;

સમથો દુવિધો તત્થ, પરિત્તો ચ મહગ્ગતો.

૮૮૨. ઉપચારમનુપ્પત્તો, પરિત્તોતિ પવુચ્ચતિ;

મહગ્ગતપ્પનાપત્તો, સમથો લોકિયો મતો.

૮૮૩. કસિણાનિ દસાસુભા, દસધાનુસ્સતી તથા;

અપ્પમઞ્ઞા ચ સઞ્ઞા ચ, વવત્થારુપ્પકાનિ ચ.

૮૮૪. કમ્મટ્ઠાનાનિ તત્થાહુ, ચત્તાલીસ વિચક્ખણા;

યત્થાનુયોગં કુબ્બન્તા, ભાવેન્તિ સમથદ્વયં.

૮૮૫. તં પયોગવિસુદ્ધેન, પત્વાનોપાયસમ્પદં;

અજ્ઝાસયં વિસોધેત્વા, ભાવેતબ્બન્તિ ભાસિતં.

૮૮૬. કથં કરોન્તો ચારિત્તં, વારિત્તઞ્ચ વિવજ્જિય;

પાતિમોક્ખં સમાદાય, સદ્ધાય પરિપૂરયે.

૮૮૭. પટિસઙ્ખાય સોધેત્વા, છદ્વારેસુ મલાસવં;

છળિન્દ્રિયાનિ મેધાવી, સતારક્ખેન ગોપયે.

૮૮૮. પાપકાજીવનિસ્સઙ્ગો, કુહકાચારનિસ્સટો;

આજીવં પરિસોધેય્ય, પહિતત્તેટ્ઠિસુદ્ધિયા.

૮૮૯. ઇદમત્થિતમારબ્ભ, પટિસઙ્ખાય યોનિસો;

પઞ્ઞવા સમ્પજઞ્ઞેન, પરિભુઞ્જેય્ય પચ્ચયે.

૮૯૦. સંવરં પાતિમોક્ખે ચ, સીલમિન્દ્રિયસંવરં;

આજીવપારિસુદ્ધિઞ્ચ, તથા પચ્ચયનિસ્સિતં.

૮૯૧. સમાદાય ચતુદ્ધેવ-મધિટ્ઠેય્ય તતો પરં;

તસ્સેવ પરિવારાય, ધુતઙ્ગાનિ યથારહં.

૮૯૨. પંસુકૂલિકમઙ્ગં તિ-ચીવરં ચીવરાયુગં;

પિણ્ડપાતિકમઙ્ગઞ્ચ, સપદાનિકમુત્તમં.

૮૯૩. ખલુપચ્છાભત્તિકઙ્ગં, ધુતઙ્ગં પત્તપિણ્ડિકં;

એકાસનિકમિચ્ચેવં, પઞ્ચધા ભોજને ઠિતં.

૮૯૪. આરઞ્ઞિકં યથાસન્થ-

તિકઙ્ગં રુક્ખમૂલિકં;

અબ્ભોકાસિકસોસાનિ-

કઙ્ગા નેસજ્જિકં તથા.

૮૯૫. છ સેનાસનમારબ્ભ, ધુતઙ્ગાનીતિ તેરસ;

કપ્પિયેપિ ચ લોલુપ્પ-સમાચારવિમુત્તિયા.

૮૯૬. સામીચિપટિપત્તીતિ, કત્વા સલ્લેખવુત્તિયા;

પચ્ચયત્તયમાહચ્ચ, પઞ્ઞત્તાનિ મહેસિના.

૮૯૭. ચતુપારિસુદ્ધિસીલં, ધુતઙ્ગપરિવારિતં;

પૂરેત્વાન વિસુદ્ધેવં, પયોગપરિસુદ્ધિયા.

૮૯૮. તતો પણિધિસમ્પન્નો, ભાવનાય વિસારદો;

ઉપાયં પટિપાદેય્ય, પવિવેકરતો કથં?

૮૯૯. આવાસો ચ કુલં લાભો,

ગણો કમ્મઞ્ચ પઞ્ચમં;

અદ્ધાનં ઞાતિ આબાધો,

ગન્થો ઇદ્ધીતિ તે દસ.

૯૦૦. છેત્વાન નિપકો યોગી,

પલિબોધે યથારહં;

નિરાલયો નિરારમ્ભો,

પપઞ્ચોપસમે રતો.

૯૦૧. પિયં ગરું ભાવનિયં, વત્તારં વચનક્ખમં;

કત્તારમતિગમ્ભીરકથં ઠાનનિયોજકં.

૯૦૨. બહુસ્સુતં ગુણવન્ત-માગમ્માચરિયં બુધો;

ખમો પદક્ખિણગ્ગાહી, નિય્યાતત્તુજુ ભદ્રકો.

૯૦૩. આરાધેત્વાન ગણ્હેય્ય, તં કમ્મટ્ઠાનદાયકં;

કમ્મટ્ઠાનં પરિક્ખિત્વા, ચરિયારહમત્તનો.

૯૦૪. રાગો દોસો ચ મોહો ચ,

ચરિયા તીહિ પણ્ડિતા;

સદ્ધાબુદ્ધિવિતક્કેહિ,

છબ્બિધા ચ વિભાવયું.

૯૦૫. રાગુસ્સન્નસ્સ સપ્પાયા, કોટ્ઠાસાસુભભાવના;

દોસુસ્સન્નસ્સપ્પમઞ્ઞા, નીલાદિ ચ ચતુબ્બિધા.

૯૦૬. વિતક્કં મોહુસ્સન્નાનં, આનાપાનં પકાસિતં;

છ સદ્ધાચરિતસ્સાહુ, બુદ્ધાનુસ્સતિઆદયો.

૯૦૭. મરણોપસમાસઞ્ઞાવવત્થાનાનિ બુદ્ધિનો;

સેસાનિ પન સબ્બેસં, તત્થાપિ કસિણં બુધા.

૯૦૮. વિતક્કપકતિકસ્સ, પરિત્તં મોહચારિનો;

મહન્તમિતિ સપ્પાયં, ગહેત્વાન તતો પરં.

૯૦૯. મહાવાસં નવં જિણ્ણં, પન્થસોણ્ડિકસન્તિકં;

પણ્ણપુપ્ફફલાકિણ્ણં, બહુસમ્માનપત્થિતં.

૯૧૦. સીમન્તદારુનગર-ક્ખેત્તપચ્ચન્તનિસ્સિતં;

વિસભાગમસપ્પાયં, પટ્ટનં મિત્તદુલ્લભં.

૯૧૧. ઠાનાનિટ્ઠારસેતાનિ, પરિવજ્જેય્ય પણ્ડિતો;

સેવેય્ય ભાવનાયોગ્ગં, સેનાસનમતન્દિતો.

૯૧૨. નાતિદૂરં નાચ્ચાસન્નં, અપ્પસદ્દમનાકુલં;

ગમનાગમનસમ્પન્નં, અપ્પડંસાનુપદ્દવં.

૯૧૩. અકિચ્છપચ્ચયુપ્પાદં, લજ્જીભિક્ખુગણોચિતં;

વિવેકટ્ઠાનબહુલં, બહુસ્સુતનિસેવિતં.

૯૧૪. અપ્પભયં નિરાસઙ્કં, અપ્પદોસં મહાગુણં;

વિહારમનુસેવન્તો, તત્થ નિસ્સઙ્ગચેતસા.

૯૧૫. તતો કેસનખચ્છેદ-રજનાદિમસેસતો;

ખુદ્દકં પલિબોધઞ્ચ, છિન્દિત્વાન યથારહં.

૯૧૬. આવાસં ગોચરં ભસ્સં, પુગ્ગલં ભોજનં તથા;

વજ્જેન્તોતુમસપ્પાયં, ઇરિયાપથમત્તનો.

૯૧૭. સેવન્તો સત્ત સપ્પાયે, તે એવાતિ પધાનવા;

ભાવનૂપાયસમ્પન્નો, વૂપકટ્ઠો રહોગતો.

૯૧૮. કામેસ્વાદીનવં દિસ્વા, નેક્ખમ્મં દટ્ઠુ ખેમતો;

પરિયુટ્ઠાનનિબ્બિન્દો, સોધેય્યજ્ઝાસયં કથં.

૯૧૯. અપ્પસ્સાદા મહાદુક્ખા, કામા હિ કટુકપ્ફલા;

દુસ્સંહારા દુરારક્ખા, બહ્વાદીનવસણ્ઠિતા.

૯૨૦. અટ્ઠિકા ખજ્જમાનાવ, વિઘાતાય પભિજ્જિતા;

ગય્હન્તત્તવધાયેતે, મંસપેસીવ પક્ખિભિ.

૯૨૧. પટિવાતે તિણુક્કાવ, પરિગ્ગાહકદાહિનો;

અઙ્ગારકાસુસઙ્કાસા, સબ્બઙ્ગપરિતાસકા.

૯૨૨. સુપિને પરિભુત્તાવ, નાલં કસ્સચિ તિત્તિયા;

ન તુ કસ્સચિ અચ્ચન્તા, અલઙ્કારાવ યાચિતા.

૯૨૩. છજ્જન્તા ફલરુક્ખાવ, પટિપન્નપભઞ્જિનો;

અસિસૂનૂપમા નિચ્ચ-મધિકોટ્ટેન્તિ પાણિનો.

૯૨૪. સત્તિસૂલૂપમા દળ્હં, તણ્હાસલ્લાનુવેધિનો;

ઘોરાનત્થવિસાકિણ્ણા, કણ્હસપ્પસિરૂપમા.

૯૨૫. સબ્બાસવપરિક્લિટ્ઠા, સબ્બાસંક્લેસવત્થુકા;

ગમ્મા ચ ચપલા નીચા, પુથુજ્જનમમાયિતા.

૯૨૬. બહુસાધારણા ચેતે, સપત્તજનપત્થિતા;

મહોપદ્દવુપયટ્ઠા, બહ્વાયાસા ભયાવહા.

૯૨૭. મહારમ્ભસમારદ્ધા, ખિપ્પાકારવિધંસિનો;

સોકસલ્લં પવેસેન્તા, વિગચ્છન્તિ સુવે સુવે.

૯૨૮. નાલં કસ્સચિ તાણાય, નાલમસ્સાસનાય ચ;

અવિસાસનિયાવસ્સં, કિતવા મારકિંકરા.

૯૨૯. સત્તાનમુપઘાતાય, મધુરાકારનિમ્મિતા;

રક્ખસી વિય સન્તાન-માવિસન્તિ મનોહરા.

૯૩૦. આવિટ્ઠા યેહિ દુમ્મેધા, બ્યસનાહિતસમ્ભવા;

વિપલ્લાસપરાભૂતા, બ્યાપજ્જન્તા વિહઞ્ઞરે.

૯૩૧. ચેતોસઙ્કપ્પરચિતા, નન્દિરાગોપસેવના;

મધુલિત્તાસિધારાવ, બ્યાપારેનોપસેવિતા.

૯૩૨. મનોરમસુભાકારા, પિયરૂપોપલમ્ભિનો;

મિત્તમુખં સપત્તાવ, વઞ્ચયન્તિ મહાજનં.

૯૩૩. વઞ્ચિતા યેહિ દુમ્મેધા, સબ્બસમ્પત્તિધંસિતા;

ખેમમગ્ગા પરિબ્ભટ્ઠા, ધારેન્તિ વધમત્તનો.

૯૩૪. વિરૂપરૂપાકારેન, નિમ્મથેન્તા પલોભિનો;

અભાવિતાનં બાલાનં, માનસં નિહનન્તિમે.

૯૩૫. યત્થ રાગસલ્લવિદ્ધા, સલ્લેનેવ વને મિગા;

તત્થ તત્થાનુધાવન્તા, વિપ્ફન્દન્તિ નિરન્તરં.

૯૩૬. મમંકારેન વુડ્ઢન્તા, ઘોરમાસીવિસં યથા;

વિસ્સટ્ઠા ભોગધમ્મેસુ, અસ્સાદેન્તિ અવિદ્દસુ.

૯૩૭. અનયબ્યસનાયેતે, વસી કુબ્બન્તિ પાણિનો;

વિચિત્તાકારસણ્ઠાના, પિસાચનગરં યથા.

૯૩૮. અનત્થાવહિતા બાલા, વાગુરં નાવબુજ્ઝરે;

તત્થેવ પટિવમન્તિ, યથા હઞ્ઞન્તિ મુચ્છિતા.

૯૩૯. સીઘવાહી મહોઘોયં, ક્લેસવટ્ટં મહબ્ભયો;

સકણ્ટકઞ્ચ ગહનં, પઙ્કોવ દુરતિક્કમો.

૯૪૦. ચેતોસંમોહનટ્ઠાનં, પમાદપટિસન્ધિતં;

ઓહારિ સિથિલં ચેતં, દુપ્પમુઞ્ચઞ્ચ બન્ધનં.

૯૪૧. જાલંવ વિત્થતં લોકે,

મારપાસો સમોડ્ડિતો;

પઞ્જરં ચારકો ચેસો,

સત્તાનમનયાવહો.

૯૪૨. યત્થાનુરાગસમ્બદ્ધા, પલિગુણ્ઠિતસાયિનો;

મક્કટાલેપબદ્ધાવ, નિત્થુનન્તિ વિઘાતિનો.

૯૪૩. બળિસંવામિસચ્છન્નં, સવિસં વિય ભોજનં;

મિગલુદ્દનિવાપોવ, વિનાસાય સમોડ્ડિતા.

૯૪૪. મીનકા વઙ્કગિદ્ધાવ, યે ગિલિત્વા પુથુજ્જના;

ઘોરં મચ્ચુમુખં પત્વા, સોચન્તાપાયભાગિનો.

૯૪૫. પાપક્ખેત્તમિદં ઠાનં, મિચ્છાલોભનિસેવનં;

દુચ્ચરીતઙ્કુરારોહં, અપાયફલપૂરણં.

૯૪૬. અજ્ઝોસિતા પનેત્થ ચ, લોભમુચ્છાવિદાહિનો;

કોધૂપનાહજલિતા, ઇસ્સામચ્છેરધૂપિતા.

૯૪૭. સારમ્ભાયુધસન્નદ્ધા, વિપ્ફુરન્તા મનોરથા;

આબન્ધિચ્છા મહાકચ્છા, ઠન્તિ લોકવિપત્તિયા.

૯૪૮. અવજ્જં નત્થિ એતેસ-મકત્તબ્બં ન વિજ્જતિ;

સમ્મુટ્ઠસચ્ચતા તેસુ, ન પતિટ્ઠાતિ સાધુતા.