૭. સત્તમો પરિચ્છેદો

સબ્બસઙ્ગહવિભાગો

૬૧૭. ચતુપઞ્ઞાસ ધમ્મા હિ, નામનામેન ભાસિતા;

અટ્ઠારસવિધા વુત્તા, રૂપધમ્માતિ સબ્બથા.

૬૧૮. અભિઞ્ઞેય્યા સભાવેન, દ્વાસત્તતિ સમીરિતા;

સચ્ચિકટ્ઠપરમત્થા, વત્થુધમ્મા સલક્ખણા.

૬૧૯. તેસં દાનિ પવક્ખામિ, સબ્બસઙ્ગાહિકં નયં;

આભિધમ્મિકભિક્ખૂનં, હત્થસારમનુત્તરં.

૬૨૦. દુકા તિકા ચ ખન્ધાયતનતો ધાતુસચ્ચતો;

પટિચ્ચસમુપ્પાદા ચ, પચ્ચયા ચ સમઞ્ઞતો.

૬૨૧. પચ્ચયો એવ નિબ્બાનમપચ્ચયમસઙ્ખતં;

અસઙ્ખારમનુપ્પાદં, સસ્સતં નિચ્ચલક્ખણં.

૬૨૨. પચ્ચયા ચેવ સઙ્ખારા, સઙ્ખતા ચ તતોપરે;

ઉપ્પાદવયધમ્મા ચ, પચ્ચયટ્ઠિતિકા તથા.

૬૨૩. નિબ્બાનં રૂપધમ્મા ચ, વિપ્પયુત્તાવ કેવલં;

આરમ્મણા એવ નામ, નાલમ્બન્તિ હિ કિઞ્ચિપિ.

૬૨૪. એકુપ્પાદનિરોધા ચ, એકાલમ્બણવત્થુકા;

સંસટ્ઠા સમ્પયુત્તા ચ, સહજાતા યથારહં.

૬૨૫. અઞ્ઞમઞ્ઞેનુપત્થદ્ધા, સબ્બત્થ સહવુત્તિનો;

સારમ્મણારમ્મણા ચ, ચિત્તચેતસિકા મતા.

૬૨૬. વિપસ્સનાય ભૂમીતિ, તત્થ તેભૂમકા મતા;

લોકિયા પરિયાપન્ના, વટ્ટધમ્મા સઉત્તરા.

૬૨૭. સક્કાયધમ્મા સભયા, તીરમોરિમનામકં;

સંયોજનિયા સમલા, તથા નીવરણીયકા.

૬૨૮. સંક્લેસિકા પરામટ્ઠા, ઉપાદાનીયસાસવા;

ઓઘનીયા યોગનીયા, ગન્થનીયાતિ ભાસિતા.

૬૨૯. અઞ્ઞે અપરિયાપન્ના, વિવટ્ટા ચાવિપસ્સિયા;

લોકુત્તરાનુત્તરા ચ, નોસંયોજનિયાદયો.

૬૩૦. કમ્મજાતા ઉપાદિન્ના, નામ વુચ્ચન્તિ સાસવા;

અનુપાદિન્નકા નામ, તતો સેસા પવુચ્ચરે.

૬૩૧. ધમ્મા સપ્પટિભાગાતિ, કુસલાકુસલા મતા;

અપ્પટિભાગધમ્માતિ, તદઞ્ઞે પરિદીપયે.

૬૩૨. સરણા ચ પહાતબ્બા, દ્વાદસાકુસલા પન;

તદઞ્ઞે અરણા નામ, પહાતબ્બા ન કેહિચિ.

૬૩૩. રૂપિનો રૂપધમ્મા ચ, નામધમ્મા અરૂપિનો;

એવમાદિપ્પભેદેન, દ્વિધા ભેદં વિભાવયે.

૬૩૪. બાલા ધમ્મા તપનીયા, કણ્હા ચ કટુકપ્ફલા;

અસેવિતબ્બા સાવજ્જા, દ્વાદસાકુસલા મતા.

૬૩૫. પણ્ડિતા ચાતપનીયા, સુક્કા ચ સુખદાયકા;

સેવિતબ્બાનવજ્જા ચ, કુસલા એકવીસતિ.

૬૩૬. ક્રિયા વિપાકા રૂપઞ્ચ, નિબ્બાનન્તિ ચતુબ્બિધા;

વુત્તા અબ્યાકતા નામ, ધમ્મા તબ્બિપરીતતો.

૬૩૭. હીના ધમ્મા પરિત્તા ચ, કામાવચરભૂમિકા;

રૂપારૂપા પવુચ્ચન્તિ, મજ્ઝિમા ચ મહગ્ગતા.

૬૩૮. અપ્પમાણા પણીતા ચ, ધમ્મા લોકુત્તરા મતા;

સંકિલિટ્ઠસંક્લેસિકા, દ્વાદસાકુસલા તથા.

૬૩૯. અસંકિલિટ્ઠસંક્લેસિકા, ધમ્મા તેભૂમકાપરે;

અસંક્લિટ્ઠાસંક્લેસિકા, નવ લોકુત્તરા સિયું.

૬૪૦. વિપાકા તે પવુચ્ચન્તિ, વિપાકા ચતુભૂમકા;

વિપાકધમ્મા નામાતિ, કુસલાકુસલા મતા.

૬૪૧. ક્રિયા રૂપઞ્ચ નિબ્બાનં, ન પાકં ન તુ પચ્ચતિ;

આચયગામિનો ધમ્મા, પુઞ્ઞાપુઞ્ઞાવ સાસવા.

૬૪૨. વુત્તાપચયગામિનો, કુસલાનુત્તરા પન;

ક્રિયા રૂપઞ્ચ નિબ્બાનં, પાકા ચોભયવજ્જિતા.

૬૪૩. પઠમાનુત્તરો મગ્ગો, દસ્સનં ભાવનાપરે;

તદઞ્ઞે દ્વયનિમ્મુત્તા, સબ્બેપિ પરમત્થતો.

૬૪૪. સત્ત લોકુત્તરા હેટ્ઠા, વુત્તા સેક્ખાતિ તાદિના;

અરહત્તફલમેવ, અસેક્ખન્તિ પકાસિતં.

૬૪૫. લોકિયાપિ ચ નિબ્બાનં, ભાસિતોભયવજ્જિતા;

એવમાદિપ્પકારેહિ, તિવિધાતિ વિભાવયે.

૬૪૬. અતીતાનાગતં રૂપં, પચ્ચુપ્પન્નમથાપરં;

અજ્ઝત્તં વા બહિદ્ધા વા, સુખુમોળારિકં તથા.

૬૪૭. હીનં પણીતં યં દૂરે, સન્તિકે વા તદેકતો;

સબ્બં રૂપં સમોધાય, રૂપક્ખન્ધોતિ વુચ્ચતિ.

૬૪૮. તથેવ વેદનાક્ખન્ધો, નામ યા કાચિ વેદના;

સઞ્ઞાક્ખન્ધોતિ સઞ્ઞા ચ, રાસિભાવેન ભાસિતા.

૬૪૯. વટ્ટધમ્મેસુ અસ્સાદં, તદસ્સાદોપસેવનં;

વિનિભુજ્જ નિદસ્સેતું, ખન્ધદ્વયમુદાહટં.

૬૫૦. વિવાદમૂલસંસાર-કમહેતુનિદસ્સનં;

સન્ધાય વેદના સઞ્ઞા, કતા નાનાતિ કેચન.

૬૫૧. ચિત્તસંસટ્ઠધમ્માનં, ચેતનામુખતો પન;

સઙ્ખારક્ખન્ધનામેન, ધમ્મા ચેતસિકા મતા.

૬૫૨. સબ્બભેદં તથા ચિત્તં, વિઞ્ઞાણક્ખન્ધ સમ્મતં;

ભેદાભાવેન નિબ્બાનં, ખન્ધસઙ્ગહનિસ્સટં.

૬૫૩. આલમ્બનીયભાવેન, ઉપાદાનોપકારતો;

પઞ્ચુપાદાનક્ખન્ધાતિ, લોકુત્તરવિવજ્જિતા.

૬૫૪. યથા થૂલં હિતત્થાય, પરિગ્ગાહકયોગિનં;

ધમ્મા તેભૂમકા એક-ભૂમિભાવાય દેસિતા.

૬૫૫. ભાજનં ભોજનં તસ્સ, બ્યઞ્જનં ભોજકો તથા;

ભુઞ્જિતા ચાતિ પઞ્ચેતે, ઉપમેન્તિ યથાક્કમં.

૬૫૬. ગિલાનસાલા ગેલઞ્ઞં, અસપ્પાયોપસેવના;

સમુટ્ઠાનં ગિલાનોતિ, ઉપમેન્તિ ચ પણ્ડિતા.

૬૫૭. ચારકો કારણં તત્થ, અપરાધો ચ કારકો;

અપરાધકતો ચોરો, ઇતિ ચોપમિતા પુન.

૬૫૮. નિચ્ચાધિપીળનટ્ઠેન, ભારાતિ પરિદીપિતા;

ક્લેસદુક્ખમુખેનેતે, ખાદકા ચ નિરન્તરં.

૬૫૯. અનત્થાવહિતા નિચ્ચમુક્ખિત્તાસિકવેરિનો;

મચ્ચુમારાભિધેય્યત્તા, વધકાતિ ચ ભાસિતા.

૬૬૦. વિમદ્દાસહનં રૂપં, ફેણપિણ્ડંવ દુબ્બલં;

મુહુત્તરમણીયત્તા, વેદના બુબ્બુળૂપમા.

૬૬૧. મરીચિકૂપમા સઞ્ઞા, વિપલ્લાસકભાવતો;

સઙ્ખારાપિ ચ નિસ્સારા, કદલિક્ખન્ધસાદિસા.

૬૬૨. નાનપ્પકારં ચિન્તેન્તં, નાનાક્લેસવિમોહિતં;

પલમ્ભતીતિ વિઞ્ઞાણં, માયાસમમુદીરિતં.

૬૬૩. ઇચ્ચેવં પઞ્ચુપાદાનક્ખન્ધા ખન્ધા ચ કેવલં;

પઞ્ચક્ખન્ધાતિ નામેન, દેસિતાતિ વિભાવયે.

૬૬૪. અજ્ઝત્તઞ્ચ બહિદ્ધા ચ, વિઞ્ઞાણુપ્પત્તિકારણં;

દ્વારાલમ્બણભેદેન, દ્વેધાયતનમીરિતં.

૬૬૫. ચક્ખાદજ્ઝત્તિકં તત્થ, છદ્વારાયતનં ભવે;

બાહિરાયતનં નામ, તથા રૂપાદિગોચરં.

૬૬૬. ઇતિ વીથિપ્પવત્તાનં, દ્વારાલમ્બણસઙ્ગહો;

આગમે અભિધમ્મે તુ, સબ્બથાપિ યથારહં.

૬૬૭. તથાહનન્તરાતીતો, જાયમાનસ્સ પચ્છતો;

મનો સબ્બોપિ સબ્બસ્સ, મનસ્સાયતનં ભવે.

૬૬૮. તથા પુબ્બઙ્ગમટ્ઠેન, સહજાનમરૂપિનં;

દ્વારભાવેન વિઞ્ઞાણં, સબ્બમાયતનં મતં.

૬૬૯. મનાયતનમિચ્ચેવં, પસાદાયતનં તથા;

પઞ્ચવિઞ્ઞાણધમ્માનં, ઇતિ છદ્ધા વિભાવયે.

૬૭૦. પઞ્ચપ્પસાદવિસયા, પઞ્ચાયતનસમ્મતા;

સેસં રૂપઞ્ચ નિબ્બાનં, સબ્બે ચેતસિકાતિ ચ.

૬૭૧. એકૂનસટ્ઠિધમ્માનં, ધમ્માયતનસઙ્ગહો;

ઇતિ છદ્ધા પકાસેન્તિ, બાહિરાયતનં બુધા.

૬૭૨. સુઞ્ઞગામોવ દટ્ઠબ્બ-મજ્ઝત્તિકમસારતો;

ગામઘાતકચોરાવ, તં હનન્તંવ બાહિરં.

૬૭૩. નામપ્પવત્તિમુળ્હાનં, તદુપ્પત્તિકકારણં;

દ્વાદસાયતનાનીતિ, વુત્તમિત્થં મહેસિના.

૬૭૪. સમત્તા ભાવમત્તેન, ધારેન્તીતિ સલક્ખણં;

દ્વારાલમ્બતદુપ્પન્ન-પરિયાયેન ભેદિતા.

૬૭૫. મનાયતનમેત્થાહ, સત્ત વિઞ્ઞાણધાતુયો;

એકાદસ યથાવુત્તા, ઇચ્ચટ્ઠારસ ધાતુયો.

૬૭૬. અન્તાદિકા મનોધાતુ, મનોવિઞ્ઞાણધાતુયા;

પવેસાપગમે દ્વાર-પરિયાયેન તિટ્ઠતિ.

૬૭૭. ભેરીતલદણ્ડઘોસ-સમં છક્કં યથાક્કમં;

કટ્ઠારણિપાવકાદિ-સમઞ્ચ તિવિધં ભવે.

૬૭૮. દુક્ખં સમુદયો ચેવ, નિરોધો ચ તથાપરો;

મગ્ગો ચાતિ ચતુદ્ધાહ, સચ્ચં સચ્ચપરક્કમો.

૬૭૯. ભારો ચ ભારદાનઞ્ચ, ભારનિક્ખેપનં તથા;

ભારનિક્ખેપનૂપાયો, ઇચ્ચોપમ્મં યથાક્કમં.

૬૮૦. રોગો રોગનિદાનઞ્ચ, રોગવૂપસમો તથા;

રોગભેસજ્જમિચ્ચેવ-મુપમાહિ ચ દીપિતં.

૬૮૧. વિસરુક્ખો રુક્ખમૂલં, રુક્ખચ્છેદો તથાપરો;

રુક્ખચ્છેદકસત્થન્તિ, ચતુધોપમિતં તથા.

૬૮૨. તીરમોરિમસઙ્ખાતં, મહોઘો પારિમં તથા;

તદતિક્કમુપાયોતિ, ઉપમેન્તિ ચ તં બુધા.

૬૮૩. સચ્છિકત્વાન પચ્ચક્ખ-મિચ્ચોપમ્મં યથાક્કમં;

સમાચિક્ખિ વિમોક્ખાય, સચ્ચં તચ્છનિયામતો.

૬૮૪. તથા હિ દુક્ખં નાબાધં, નાઞ્ઞં દુક્ખા ચ બાધકં;

બાધકત્તનિયામેન, દુક્ખસચ્ચમિતીરિતં.

૬૮૫. તં વિના નાઞ્ઞતો દુક્ખં, ન હોતિ ન ચ તં તતો;

દુક્ખહેતુનિયામેન, સચ્ચમાહ વિસત્તિકં.

૬૮૬. નાઞ્ઞા નિબ્બાનતો સન્તિ, ન ચ સન્તં ન તં યતો;

સન્તભાવનિયામેન, નિબ્બાનં સચ્ચમુત્તમં.

૬૮૭. નાઞ્ઞં મગ્ગાચ નિય્યાનં, અનિય્યાનો ન ચાપિ સો;

તસ્મા નિય્યાનભાવેન, મગ્ગો સચ્ચન્તિ સમ્મતો.

૬૮૮. ઇતિ તચ્છાવિપલ્લાસ-ભૂતભાવો ચતૂસુપિ;

સચ્ચટ્ઠોતિ વિનિદ્દિટ્ઠો, દુક્ખાદીસ્વવિસેસતો.

૬૮૯. પીળનટ્ઠો સઙ્ખતટ્ઠો, સન્તાપટ્ઠો ચ ભાસિતો;

વિપરીણામટ્ઠો ચાતિ, દુક્ખસ્સેવં ચતુબ્બિધા.

૬૯૦. આયૂહના નિદાના ચ, સંયોગા પલિબોધતો;

દુક્ખસ્સમુદયસ્સાપિ, ચતુધત્થા પકાસિતા.