૩. તતિયો પરિચ્છેદો

ભેદસઙ્ગહવિભાગો

૧૨૩. એવં ભેદસભાવેસુ, તેસ્વેવ પુન સઙ્ગહં;

સભાવત્થવિસેસેહિ, પવક્ખામિ ઇતો પરં.

૧૨૪. અસાધારણઞાણેહિ, સત્થા વત્થુવિવેચકો;

સઙ્ગહેત્વા સભાગેહિ, ધમ્મે દસ્સેસિ ચક્ખુમા.

૧૨૫. દિટ્ઠિભિનિવેસટ્ઠેન, યથાભૂતસભાવતો;

પરમામસતિચ્ચેકા, પરામાસોતિ ભાસિતા.

૧૨૬. કિલેસાસુચિભાવેન, વણસ્સાવરસો વિય;

આલિમ્પન્તાવ સન્તાનં, સવન્તીતિ પકાસિતા.

૧૨૭. કામતણ્હા ભવતણ્હા, દિટ્ઠાવિજ્જાતિ આસવા;

ચત્તારો આસવટ્ઠેન, તયો ધમ્મા સભાવતો.

૧૨૮. એતેવો ઘાતિ વુત્તાવ, દ્વારાલમ્બાભિવાહિનો;

ઓત્થરિત્વા પરાભૂતે, હરન્તા પાણિનો ભવે.

૧૨૯. યોગાતિ ચાહુ તે એવ, પાણિનો ભવયન્તકે;

દ્વારાલમ્બાભિસમ્બન્ધા, યન્તબન્ધાવ યોજિતા.

૧૩૦. સન્તાનમધિગણ્હન્તા, માલુવાવ મહાતરું;

ગણ્હન્તા દળ્હમાલમ્બં, મણ્ડૂકમિવ પન્નગો.

૧૩૧. કામતણ્હા ચ દિટ્ઠિ ચ, ઉપાદાના ચતુબ્બિધા;

દિટ્ઠિ દિટ્ઠિસીલબ્બત-મત્તવાદોતિ ભેદિતા.

૧૩૨. કાયેન કાયં ગન્થેન્તા, દુપ્પમુઞ્ચાનુવેઠિનો;

કથિતા કાયગન્થાતિ, તણ્હાબ્યાપાદદિટ્ઠિયો.

૧૩૩. સીલબ્બતપરામાસો, ઇતિ દિટ્ઠિ વિભેદિતા;

ઇદંસચ્ચાભિનિવેસો, ઇતિ ચેવં ચતુબ્બિધા.

૧૩૪. નેક્ખમ્મં પલિબોધેન્તા, ભાવનાપરિપન્થકા;

સન્તાનમણ્ડકોસાવ, પરિયોનન્ધકાતિ ચ.

૧૩૫. કામચ્છન્દો ચ બ્યાપાદો, થિનમિદ્ધઞ્ચ સંસયો;

અવિજ્જુદ્ધચ્ચકુક્કુચ્ચમિતિ નીવરણા મતા.

૧૩૬. આગાળ્હં પરિયાદાય, ઓગય્હનુપ્પવત્તિનો;

યોપ્પરોગાવ સન્તાન-મનુસેન્તીતિ ભાસિતા.

૧૩૭. કામરાગો ભવરાગો, પટિઘો માનદિટ્ઠિયો;

કઙ્ખાવિજ્જાતિ સત્તેવ, છ ધમ્માનુસયા મતા.

૧૩૮. દ્વારાલમ્બણબન્ધેન, પાણીનં ભવમણ્ડલે;

સંયોજનાનિ વુત્તાનિ, પાસબન્ધાવ પક્ખિનં.

૧૩૯. કામરૂપારૂપરાગા, પટિઘો મોહસંસયો;

દિટ્ઠિ સીલબ્બતં માનો, ઉદ્ધચ્ચેન દસા ભવે.

૧૪૦. રૂપારૂપરાગુદ્ધચ્ચં, અભિધમ્મે વિના પુન;

ભવરાગિસ્સ મચ્છેરં, ગહેત્વા દસધા સિયું.

૧૪૧. સંક્લેપયન્તિ સન્તાનં, ઉપઘાતેન્તિ પાણિનો;

સહજાતેક્લેસેન્તીતિ, કિલેસાતિ પકાસિતા.

૧૪૨. લોભો દોસો ચ મોહો ચ,

દિટ્ઠિ માનો ચ સંસયો;

થિનાહિરિકનોત્તપ્પ-

મુદ્ધચ્ચેન સિયું દસ.

૧૪૩. નવસઙ્ગહિતા એત્થ, દિટ્ઠિલોભા પકાસિતા;

સત્તસઙ્ગહિતાવિજ્જા, પટિઘો પઞ્ચસઙ્ગહો.

૧૪૪. ચતુસઙ્ગહિતા કઙ્ખા, માનુદ્ધચ્ચા તિસઙ્ગહા;

દુકસઙ્ગહિતં થીનં, કુક્કુચ્ચમેકસઙ્ગહં.

૧૪૫. દ્વિધાહિરિકનોત્તપ્પ-મિસ્સામચ્છરિયં તથા;

ઇચ્ચેવં દસધા વુત્તા, પાપકેસ્વેવ સઙ્ગહા.

૧૪૬. પરામાસાસવોઘા ચ, યોગુપાદાનગન્થતો;

નીવારણાનુસયતો, સંયોજનકિલેસતો.

૧૪૭. ચુદ્દસેવ તુ સઙ્ખેપા, સત્તપઞ્ઞાસ ભેદતો;

યથાધમ્માનુસારેન, ચિત્તુપ્પાદેસુ યોજયે.

૧૪૮. તતોપરે નોપરામા-સાદિભેદિતસઙ્ગહા;

ચિત્તં ચેતસિકં રૂપં, નિબ્બાનમિતિ દીપયે.

૧૪૯. ઇચ્ચાકુસલધમ્માનં, ઞત્વા સઙ્ગહમુત્તરં;

મિસ્સકા નામ વિઞ્ઞેય્યા, યથાસમ્ભવતો કથં;

૧૫૦. લોભો દોસો ચ મોહો ચ,

એકન્તાકુસલા તયો;

અલોભાદોસામોહો ચ,

કુસલાબ્યાકતા તથા.

૧૫૧. પાદપસ્સેવ મૂલાનિ, થિરભાવાય પચ્ચયા;

મૂલભાવેન ધમ્માનં, હેતૂ ધમ્મા છ દીપિતા.

૧૫૨. વિતક્કો ચ વિચારો ચ, પીતિ ચેકગ્ગતા તથા;

સોમનસ્સં દોમનસ્સં, ઉપેક્ખાતિ ચ વેદના.

૧૫૩. આહચ્ચુપનિજ્ઝાયન્તા, નિજ્ઝાનટ્ઠેન પચ્ચયા;

ઝાનધમ્માતિ સત્થાહ, પઞ્ચ વત્થુસભાવતો.

૧૫૪. સમ્માદિટ્ઠિ ચ સઙ્કપ્પો, વાયામો વિરતિત્તયં;

સમ્માસતિ સમાધી ચ, મિચ્છાદિટ્ઠિ ચ સમ્ભવા.

૧૫૫. સમ્મામિચ્છા ચ નીયન્તા, નિય્યાનટ્ઠેન પચ્ચયા;

મગ્ગઙ્ગા દ્વાદસક્ખાતા, નવ ધમ્મા સભાવતો.

૧૫૬. અત્તભાવં પવત્તેન્તા, ઓજટ્ઠમકવેદનં;

પટિસન્ધિનામરૂપ-માહરન્તા યથાક્કમં.

૧૫૭. કબળીકારો આહારો,

ફસ્સો સઞ્ચેતના તથા;

વિઞ્ઞાણમિતિ ચત્તારો,

આહારાતિ પકાસિતા.

૧૫૮. ધમ્માનં સહજાતાનં, ઇન્દ્રિયટ્ઠેન પચ્ચયા;

અત્તાનમિસ્સરટ્ઠેન, અનુવત્તાપકા તથા.

૧૫૯. સદ્ધા ચ સતિ પઞ્ઞા ચ, વીરિયેકગ્ગતાપિ ચ;

વેદના જીવિતં ચિત્તં, અટ્ઠ રૂપિન્દ્રિયાનિ ચ.

૧૬૦. કથં જીવિતમેકં તુ, સુખં દુક્ખન્તિ વેદના;

સોમનસ્સં દોમનસ્સં, ઉપેક્ખાતિ ચ ભેદિતા.

૧૬૧. પઞ્ઞાદિમગ્ગેનઞ્ઞાત-ઞ્ઞસ્સામીતિન્દ્રિયં ભવે;

મજ્ઝે અઞ્ઞિન્દ્રિયમન્તે, અઞ્ઞાતાવિન્દ્રિયં તથા.

૧૬૨. સોળસેવ સભાવેન, ઇન્દ્રિયટ્ઠવિભાગતો;

ઇન્દ્રિયાનીતિ વુત્તાનિ, બાવીસતિ વિભાવયે.

૧૬૩. દળ્હાધિટ્ઠિતસન્તાના, વિપક્ખેહિ અકમ્પિયા;

બલવન્તસભાવેન, બલધમ્મા પકાસિતા.

૧૬૪. સદ્ધા સતિ હિરોત્તપ્પં, વીરિયેકગ્ગતા તથા;

પઞ્ઞાહિરિકાનોત્તપ્પ-મિચ્ચેવં નવધા મતા.

૧૬૫. જેટ્ઠા પુબ્બઙ્ગમટ્ઠેન, પુઞ્ઞાપુઞ્ઞપવત્તિયં;

પચ્ચયાધિપ્પતેય્યેન, સહજાનં યથારહં.

૧૬૬. ચત્તારોધિપતી વુત્તા, આધિપ્પચ્ચસભાવતો;

છન્દો ચિત્તઞ્ચ વીરિયં, વીમંસાતિ ચ તાદિના.

૧૬૭. પઞ્ચસઙ્ગહિતા પઞ્ઞા, વાયામેકગ્ગતા પન;

ચતુસઙ્ગહિતા ચિત્તં, સતિ ચેવ તિસઙ્ગહા.

૧૬૮. સઙ્કપ્પો વેદના સદ્ધા, દુકસઙ્ગહિતા મતા;

એકેકસઙ્ગહા સેસા, અટ્ઠવીસતિ ભાસિતા;

ઇચ્ચેવં સત્તધા ભેદો, વુત્તો મિસ્સકસઙ્ગહો.

૧૬૯. હેતુઝાનઙ્ગમગ્ગઙ્ગા, આહારિન્દ્રિયતો તથા;

બલાધિપ્પતિતો ચેવ, પુઞ્ઞાપુઞ્ઞાદિમિસ્સતા;

છત્તિંસેવ સભાવેન, ચતુસટ્ઠિ પભેદતો.

૧૭૦. ઇચ્ચેવં સઙ્ગહેત્વાન, વિભાવેય્ય તતો પરં;

ચિત્તુપ્પાદપભેદેસુ, યથાસમ્ભવતો કથં.

૧૭૧. સિતાવજ્જનવિઞ્ઞાણં, સમ્પટિચ્છનતીરણા;

અટ્ઠારસાહેતુકાવ, મોમૂહા એકહેતુકા.

૧૭૨. સેસા તુ કુસલા ઞાણવિયુત્તા ચ દ્વિહેતુકા;

ચિત્તુપ્પાદાપરે સત્ત-ચત્તાલીસ તિહેતુકા.

૧૭૩. પઞ્ચવિઞ્ઞાણમજ્ઝાનં, દ્વિઝાનઙ્ગિકમીરિતં;

ચતુત્થપઞ્ચમજ્ઝાનં, તિઝાનં તતિયં મતા.

૧૭૪. ચતુઝાનં તુ દુતિયં, કામે ચ સુખવજ્જિતા;

પઞ્ચઝાનં તુ પઠમં, કામે ચ સુખિતા મતા.

૧૭૫. પઠમાનુત્તરં ઝાનં, અટ્ઠમગ્ગઙ્ગિકં મતં;

સત્તમગ્ગઙ્ગિકં નામ, સેસઝાનમનુત્તરં.

૧૭૬. લોકિયં પઠમં ઝાનં, તથા કામે તિહેતુકા;

પઞ્ચમગ્ગઙ્ગિકા નામ, ચિત્તુપ્પાદા પકાસિતા.

૧૭૭. સેસં મહગ્ગતં ઝાનં, સમ્પયુત્તા ચ દિટ્ઠિયા;

ઞાણેન વિપ્પયુત્તા ચ, ચતુમગ્ગઙ્ગિકા મતા.

૧૭૮. પટિઘુદ્ધચ્ચયુત્તા ચ, વિપ્પયુત્તા ચ દિટ્ઠિયા;

તિમગ્ગઙ્ગં દુમગ્ગઙ્ગં, કઙ્ખિતં સમુદીરિતં.

૧૭૯. ન હોન્તાહેતુકે મગ્ગા, ચિત્તટ્ઠિતિ ચ કઙ્ખિતે;

વિદિતા નિયતતા ચ, લોકિયેસુ ન ઉદ્ધટા.

૧૮૦. કામેસુ કબળીકારો, અનાહારો અસઞ્ઞિનો;

ચિત્તુપ્પાદેસુ સબ્બત્થ, આહારત્તયમીરિતં.

૧૮૧. ઇન્દ્રિયાનિ વિભાવેય્ય, નવધાનુત્તરે બુધો;

અટ્ઠધા સમુદીરેય્ય, લોકિયેસુ તિહેતુકે.

૧૮૨. સત્તધા પન ઞાણેન, વિપ્પયુત્તે પકાસયે;

સિતવોટ્ઠબ્બનાપુઞ્ઞે, પઞ્ચધા કઙ્ખિતે પન.

૧૮૩. ચતુધા તિવિધા સેસે, ચિત્તુપ્પાદે સમીરયે;

તિહેતુકા સત્તબલા, છબલા તુ દુહેતુકા.

૧૮૪. ચતુબલા અકુસલા, કઙ્ખિતં તિબલં મતં;

દ્વિબલં સિતવોટ્ઠબ્બ-મબલં સેસમીરિતં.

૧૮૫. જવનેધિપતીનં તુ, યો કોચેકો તિહેતુકે;

દ્વિહેતુકે વા કુસલે, વીમંસા નોપલબ્ભતિ.

૧૮૬. લોકિયેસુ વિપાકેસુ,

મોહમૂલે અહેતુકે;

યથાસમ્ભવવુત્તિત્તા,

નત્થાધિપતિ કોચિપિ.

૧૮૭. સમ્ભોતિ કાયવિઞ્ઞાણે, પુઞ્ઞપાકે સુખિન્દ્રિયં;

દુક્ખિન્દ્રિયમ્પિ તત્થેવ, પાપપાકમ્હિ ભાસિતં.

૧૮૮. સન્તીરણઞ્ચ હસનં, સોમનસ્સાનિ સોળસ;

પઠમાદિચતુજ્ઝાનં, સોમનસ્સયુતં ભવે.

૧૮૯. દોમનસ્સયુત્તા દ્વેવ, ચિત્તુપ્પાદા પકાસિતા;

તદઞ્ઞે પન સબ્બેપિ, પઞ્ચપઞ્ઞાસુપેક્ખકા.

૧૯૦. વેદનાસમ્પયોગઞ્ચ, વિનિબ્ભુજ્જેવમટ્ઠધા;

હેતુયોગાદિભેદેહિ, ચિત્તુપ્પાદા પકાસિતા.

૧૯૧. તંતંવિયોગભેદઞ્ચ, પચ્ચેકમથ મિસ્સિતં;

યથાવુત્તાનુસારેન, યથાસમ્ભવતો નયે.