૨. દુતિયો પરિચ્છેદો

લક્ખણરસુપટ્ઠાનવિભાગો

૬૭. સભાવો લક્ખણં નામ, કિચ્ચસમ્પજ્જના રસો;

ગય્હાકારો ઉપટ્ઠાનં, પદટ્ઠાનં તુ પચ્ચયો.

૬૮. અત્તુપલદ્ધિસઙ્ખાતા, સમ્પત્તા ચ પનત્થતો;

લક્ખણરસુપટ્ઠાના, વોહારાભોગભેદિતા.

૬૯. તેપઞ્ઞાસસભાવેસુ, તસ્મા ભેદં યથારહં;

લક્ખણાદિપ્પકારેહિ, પવક્ખામિ ઇતો પરં.

૭૦. ચિન્તેતીતિ ભવે ચિત્તં, ચિન્તનમત્તમેવ વા;

સમ્પયુત્તાથ વા તેન, ચિન્તેન્તીતિ ચ ગોચરં.

૭૧. ફુસતીતિ ભવે ફસ્સો, ફુસનં વાથ કેવલં;

સમ્પયુત્તાથ વા તેન, ફુસન્તીતિ ચ ગોચરં.

૭૨. એવં કત્તરિ ભાવે ચ, કરણે ચ યથારહં;

તેપઞ્ઞાસસભાવેસુ, સદ્દનિબ્બચનં નયે.

૭૩. આલમ્બણમનં ચિત્તં, તંવિજાનનલક્ખણં;

સહજાધિટ્ઠાનરસં, ચિન્તાકપ્પોતિ ગય્હતિ.

૭૪. આલમ્બણસમોધાનો,

ફસ્સો ફુસનલક્ખણો;

સઙ્ઘટ્ટનરસો તત્થ,

સન્નિપાતોતિ ગય્હતિ.

૭૫. વેદનાલમ્બણરસા, સા વેદયિતલક્ખણા;

ગોચરાનુભવરસા, અનુભુત્તીતિ ગય્હતિ.

૭૬. આકારગહણં સઞ્ઞા, સા સઞ્જાનનલક્ખણા;

નિમિત્તુપ્પાદનરસા, ઉપલક્ખાતિ ગય્હતિ.

૭૭. ચેતના ચિત્તવિપ્ફારા, સાયં બ્યાપારલક્ખણા;

કમ્મન્તાયૂહનરસા, સંવિધાનન્તિ ગય્હતિ.

૭૮. એકગ્ગતા અવિક્ખેપો, સાવિસાહારલક્ખણા;

સમ્પિણ્ડનરસા ચિત્તં, સમોધાનન્તિ ગય્હતિ.

૭૯. યાપનં સહજાતાન-મનુપાલનલક્ખણં;

જીવિતં જીવનરસં, આયુબન્ધોતિ ગય્હતિ.

૮૦. સારણા મનસીકારો, સમન્નાહારલક્ખણો;

સંયોજનરસો ચિત્ત-પટિપત્તીતિ ગય્હતિ.

૮૧. સઙ્કપ્પનલક્ખણો તક્કો, સહજાભિનિરોપનો;

આલમ્બાહનનરસો, સન્નિરુજ્ઝોતિ ગય્હતિ.

૮૨. વિચારો અનુસન્ધાનો, અનુમજ્જનલક્ખણો;

ચિત્તાનુયોજનરસો, અનુપેક્ખાતિ ગય્હતિ.

૮૩. અધિમોક્ખો અસંસપ્પો, સુસન્નિટ્ઠાનલક્ખણો;

નિચ્ચલાપાદનરસો, દળ્હવુત્તીતિ ગય્હતિ.

૮૪. વીરિયં પન વાયામો, મહુસ્સાહનલક્ખણો;

કિચ્ચાસંસીદનરસો, ઉપત્થમ્ભોતિ ગય્હતિ.

૮૫. આલમ્બત્થિકતા છન્દો, કત્તુકામતલક્ખણો;

આલમ્બણેસનરસો, હત્થાદાનન્તિ ગય્હતિ.

૮૬. સહજાતાનુફરણા, સમ્પિયાયનલક્ખણા;

સમ્પીનનરસા પીતિ, પામોજ્જમિતિ ગય્હતિ.

૮૭. ચેતોસદ્દહનં સદ્ધા, ભૂતોકપ્પનલક્ખણા;

હિતપક્ખન્દનરસા, અધિમુત્તીતિ ગય્હતિ.

૮૮. અસમ્મોસા સભાવેસુ, સતિ ધારણલક્ખણા;

ધમ્માપિલાપનરસા, અપ્પમાદોતિ ગય્હતિ.

૮૯. હિરી જેગુચ્છા પાપેસુ, સા હરાયનલક્ખણા;

હીળસંકોચનરસા, પાપલજ્જાતિ ગય્હતિ.

૯૦. પાપસારજ્જમોત્તપ્પં, ઉબ્બેગુત્તાસલક્ખણં;

ભયસઙ્કોચનરસં, અવિસ્સાસોતિ ગય્હતિ.

૯૧. અલોભો અનભિસઙ્ગો, અપરિગ્ગહલક્ખણો;

મુત્તપ્પવત્તનરસો, અસંસગ્ગોતિ ગય્હતિ.

૯૨. અદોસો ચિત્તસાખલ્યં, અબ્યાપજ્જનલક્ખણો;

સણ્હપ્પવત્તનરસો, સોમ્મભાવોતિ ગય્હતિ.

૯૩. અમોહો ખલિતાભાવો, પટિવિજ્ઝનલક્ખણો;

વિસયોભાસનરસો, પટિબોધોતિ ગય્હતિ.

૯૪. તત્રમજ્ઝત્તતોપેક્ખા, સમીકરણલક્ખણા;

અપક્ખપાતનરસા, સમવાહોતિ ગય્હતિ.

૯૫. પસ્સદ્ધિ કાયચિત્તાનં, દરથાભાવલક્ખણા;

અપરિપ્ફન્દનરસા, સીતિભાવોતિ ગય્હતિ.

૯૬. લહુતા કાયચિત્તાનં, અદન્ધાકારલક્ખણા;

અવિત્થારરસા સલ્લહુકવુત્તીતિ ગય્હતિ.

૯૭. મુદુતા કાયચિત્તાનં, કક્ખળાભાવલક્ખણા;

કિચ્ચાવિરોધનરસા, અનુકુલ્યન્તિ ગય્હતિ.

૯૮. કમ્મઞ્ઞતા ઉભિન્નમ્પિ, અલંકિચ્ચસ્સ લક્ખણા;

પવત્તિસમ્પત્તિરસા, યોગભાવોતિ ગય્હતિ.

૯૯. તથા પાગુઞ્ઞતા દ્વિન્નં, વિસદાકારલક્ખણા;

સુખપ્પવત્તનરસા, સેરિભાવોતિ ગય્હતિ.

૧૦૦. ઉજુતા કાયચિત્તાનં, કુટિલાભાવલક્ખણા;

જિમ્હનિમ્મદનરસા, ઉજુવુત્તીતિ ગય્હતિ.

૧૦૧. સમ્માવાચા વચીસુદ્ધિ, વાચાસંયમલક્ખણા;

મિચ્છાવાચોરમરસા, વચીવેલાતિ ગય્હતિ.

૧૦૨. સમ્માકમ્મં ક્રિયાસુદ્ધં, સમ્માકરણલક્ખણં;

મિચ્છાકમ્મોરમરસં, ક્રિયાવેલાતિ ગય્હતિ.

૧૦૩. સમ્માજીવો વિસુદ્ધેટ્ઠિ, અલ્લિટ્ઠાજીવલક્ખણો;

મિચ્છાજીવોરમરસો, સમ્માવુત્તીતિ ગય્હતિ.

૧૦૪. કરુણા દીનસત્તેસુ, દુક્ખાપનયલક્ખણા;

સોત્થિતાપત્થનરસા, અનુકમ્પાતિ ગય્હતિ.

૧૦૫. સુખટ્ઠિતેસુ મુદિતા, અનુમોદનલક્ખણા;

ચેતોવિકાસનરસા, અવિરોધોતિ ગય્હતિ.

૧૦૬. ચેતોસારજ્જના લોભો, અપરિચ્ચાગલક્ખણો;

આલમ્બગિજ્ઝનરસો, અભિલગ્ગોતિ ગય્હતિ.

૧૦૭. ચેતોબ્યાપજ્જનં દોસો, સમ્પદુસ્સનલક્ખણો;

આલમ્બણઘાતરસો, ચણ્ડિક્કમિતિ ગય્હતિ.

૧૦૮. ચેતોસમ્મુય્હનં મોહો,

સો સમ્મુય્હનલક્ખણો;

સભાવચ્છાદનરસો,

અન્ધભાવોતિ ગય્હતિ.

૧૦૯. પાપાજિગુચ્છાહિરિકં, નિલ્લજ્જાકારલક્ખણં;

પાપોપલાપનરસં, મલગ્ગાહોતિ ગય્હતિ.

૧૧૦. અસારજ્જનમનોત્તપ્પમનુત્તાસનલક્ખણં;

પાપપક્ખન્દનરસં, પાગબ્ભમિતિ ગય્હતિ.

૧૧૧. દિટ્ઠિ દળ્હવિપલ્લાસો, સા પરામાસલક્ખણા;

તુચ્છાભિનિવેસનરસા, મિચ્છાગાહોતિ ગય્હતિ.

૧૧૨. ‘‘અહસ્મી’’તિ મઞ્ઞમાનો, સો સમુન્નતિલક્ખણો;

કેતુસમ્પગ્ગહરસો, અહંકારોતિ ગય્હતિ.

૧૧૩. પરસમ્પત્તીસુ ઇસ્સા, અક્ખમાકારલક્ખણા;

ચેતોવિકુચનરસા, વિમુખત્તન્તિ ગય્હતિ.

૧૧૪. પરિગ્ગહેસુ મચ્છેરં, સન્નિગૂહનલક્ખણં;

સામઞ્ઞાસહનરસં, વેવિચ્છમિતિ ગય્હતિ.

૧૧૫. ચેતોપહનનં થીનં, તં સંસીદનલક્ખણં;

ઉસ્સાહભઞ્જનરસં, સંખિત્તત્તન્તિ ગય્હતિ.

૧૧૬. વિઘાતો સહજાતાનં, મિદ્ધં મોહનલક્ખણં;

સત્તિસંભઞ્જનરસં, આતુરત્તન્તિ ગય્હતિ.

૧૧૭. ઉદ્ધચ્ચં ચિત્તવિક્ખેપો, અવૂપસમલક્ખણં;

ચેતોનવટ્ઠાનરસં, ભન્તત્તમિતિ ગય્હતિ.

૧૧૮. વિપ્પટિસારો કુક્કુચ્ચમનુસોચનલક્ખણં;

અત્તાનુસોચનરસં, પચ્છાતાપોતિ ગય્હતિ.

૧૧૯. કઙ્ખાયના વિચિકિચ્છા, અસન્નિટ્ઠાનલક્ખણા;

અનેકગાહનરસા, અપ્પતિટ્ઠાતિ ગય્હતિ.

૧૨૦. ઇચ્ચેવં લક્ખણાદીહિ, વિભાવેય્ય વિચક્ખણો;

તેપઞ્ઞાસસભાવેસુ, સભાવાકારલક્ખણં.

૧૨૧. લક્ખણત્થકુસલા સલક્ખણે,

લક્ખણત્થપરમેપિ કેવલં;

લક્ખણુગ્ગહસુખાય વણ્ણયું,

લક્ખણાદિમુખતો સલક્ખણં.

૧૨૨. અત્થં તમેવમનુગમ્મ મયેત્થ વુત્ત-

મત્થાનમત્થનયનત્થમનેકધાપિ;

પત્થેય્ય મેત્થ વચનત્થનયેહિ ઞાણ-

મત્થેસુ બુદ્ધવચનત્થનયત્થિકેહિ.

ઇતિ નામરૂપપરિચ્છેદે લક્ખણરસુપટ્ઠાનવિભાગો નામ

દુતિયો પરિચ્છેદો.