૧. પઠમો પરિચ્છેદો

નામત્તયવિભાગો

૩. તત્થ ચિત્તં ચેતસિકં, નિબ્બાનન્તિ મતં તિધા;

નામં રૂપં તુ દુવિધં, ભૂતોપાદાયભેદતો.

૪. કામભૂમાદિભેદેન, તત્થ ચિત્તં ચતુબ્બિધં;

ચેતોયુત્તા દ્વિપઞ્ઞાસ, ધમ્મા ચેતસિકા મતા.

૫. ચક્ખુસોતઘાનજિવ્હા-કાયવિઞ્ઞાણધાતુયો;

સમ્પટિચ્છનચિત્તઞ્ચ, તથા સન્તીરણદ્વયં.

૬. સોમનસ્સસહગતં, ઉપેક્ખાસહિતન્તિ ચ;

ઇચ્ચાહેતુકચિત્તાનિ, પુઞ્ઞપાકાનિ અટ્ઠધા.

૭. સોમનસ્સયુતં તત્થ, હિત્વા સન્તીરણં તથા;

સત્તાકુસલપાકાનિ, તાનેવાતિ વિનિદ્દિસે.

૮. પઞ્ચદ્વારમનોદ્વારાવજ્જનં હસનન્તિ ચ;

ક્રિયચિત્તમુદીરિતં, તિવિધમ્પિ અહેતુકં.

૯. એવં અટ્ઠારસવિધં, માનસં હોતિહેતુકં;

મૂલભેદેનાકુસલં, ચિત્તં તુ તિવિધં મતં.

૧૦. સોમનસ્સસહગતં, ઉપેક્ખાસહિતં તથા;

દિટ્ઠિગતસમ્પયુત્તં, વિપ્પયુત્તન્તિ ભેદિતં.

૧૧. અસઙ્ખારં સસઙ્ખારમિતિ ભિન્નં પનટ્ઠધા;

લોભમૂલં પકાસેન્તિ, તત્થાકુસલમાનસં.

૧૨. દોમનસ્સસહગતં, પટિઘેન સમાયુતં;

દોસમૂલમસઙ્ખારં, સસઙ્ખારન્તિપિ દ્વિધા.

૧૩. વિચિકિચ્છાસહગતં, ઉદ્ધચ્ચસહિતન્તિ ચ;

મોહમૂલઞ્ચ દુવિધં, ઉપેક્ખાય સમાયુતં.

૧૪. દ્વાદસાકુસલાનેવં, ચિત્તાનીતિ વિભાવયે;

હિત્વાહેતુકપાપાનિ, સોભનાનિ તતો પરં.

૧૫. સોમનસ્સસહગતં, ઉપેક્ખાસહિતં તથા;

દ્વિધા ઞાણેન સંયુત્તં, વિપ્પયુત્તન્તિ ભેદિતં.

૧૬. અસઙ્ખારં સસઙ્ખારમિતિ ભિન્નં પનટ્ઠધા;

સહેતુકામાવચર-પુઞ્ઞપાકક્રિયા ભવે.

૧૭. કામે તેવીસ પાકાનિ, પુઞ્ઞાપુઞ્ઞાનિ વીસતિ;

એકાદસ ક્રિયા ચેતિ, ચતુપઞ્ઞાસ સબ્બથા.

૧૮. તક્કચારપીતિસુખેકગ્ગતાસહિતં પન;

પઠમજ્ઝાનકુસલં, વિપાકઞ્ચ ક્રિયા તથા.

૧૯. દુતિયં તક્કતો હીનં, તતિયં તુ વિચારતો;

ચતુત્થં પીતિતો હીનં, ઉપેક્ખેકગ્ગતાયુતં.

૨૦. પઞ્ચમં પઞ્ચદસધા, રૂપાવચરમીરિતં;

પઞ્ચમજ્ઝાનમેવેકમરૂપાવચરં પન.

૨૧. આકાસાનઞ્ચાયતનં, પુઞ્ઞપાકક્રિયા તથા;

વિઞ્ઞાણઞ્ચાયતનઞ્ચ, આકિઞ્ચઞ્ઞાયતનકં;

નેવસઞ્ઞાનાસઞ્ઞાયતનં દ્વાદસધા ભવે.

૨૨. સોતાપત્તિમગ્ગચિત્તં, ફલચિત્તં તથાપરં;

સકદાગામાનાગામિ, અરહત્તન્તિ અટ્ઠધા.

૨૩. ઝાનઙ્ગયોગભેદેન, કત્વેકેકં તુ પઞ્ચધા;

વિત્થારાનુત્તરં ચિત્તં, ચત્તાલીસવિધં ભવે.

૨૪. રૂપાવચરચિત્તાનિ, ગય્હન્તાનુત્તરાનિ ચ;

પઠમાદિજ્ઝાનભેદે, આરુપ્પઞ્ચાપિ પઞ્ચમે.

૨૫. દ્વાદસાકુસલાનેવં, કુસલાનેકવીસતિ;

છત્તિંસેવ વિપાકાનિ, ક્રિયચિત્તાનિ વીસતિ.

૨૬. એકવીસસતં વાથ, એકૂનનવુતીવિધં;

ચિત્તં તંસમ્પયોગેન, ભિન્ના ચેતસિકા તથા.

૨૭. ફસ્સો ચ વેદના સઞ્ઞા, ચેતનેકગ્ગતા તથા;

જીવિતં મનસીકારો, સબ્બસાધારણા મતા.

૨૮. તક્કચારાધિમોક્ખા ચ, વીરિયં છન્દપીતિયો;

પકિણ્ણકા છ અક્ખાતા, તેરસઞ્ઞસમાનતા.

૨૯. પકિણ્ણકા ન વિઞ્ઞાણે, વિતક્કો દુતિયાદિસુ;

વિચારો તતિયાદિમ્હિ, અધિમોક્ખો તુ કઙ્ખિતે.

૩૦. સન્તીરણમનોધાતુત્તિકેસુ વીરિયં તથા;

ચતુત્થસુખિતે પીતિ, છન્દોહેતુમ્હિ મોમુહે.

૩૧. છસટ્ઠિ પઞ્ચપઞ્ઞાસ, એકાદસ ચ સોળસ;

સત્તતિ વીસતિ ચેવ, તાનિ ચિત્તાનિ દીપયે.

૩૨. મોહાહિરિકાનોત્તપ્પ-મુદ્ધચ્ચં સબ્બપાપજં;

ઇસ્સામચ્છેરકુક્કુચ્ચદોસા તુ પટિઘે તથા.

૩૩. લોભો લોભે તુ દિટ્ઠિ ચ, દિટ્ઠિયુત્તે વિયુત્તકે;

માનો ચ થિનમિદ્ધં તુ, સસઙ્ખારેસુ પઞ્ચસુ.

૩૪. કઙ્ખિતે વિચિકિચ્છાતિ, ચુદ્દસાકુસલાનિમે;

દ્વાદસાકુસલેસ્વેવ, નિયમેન વવત્થિતા.

૩૫. સદ્ધા સતિ હિરોત્તપ્પં, અલોભાદોસમજ્ઝતા;

કાયચિત્તાનં પસ્સદ્ધિ, લહુતા મુદુતા તથા.

૩૬. કમ્મઞ્ઞતા ચ પાગુઞ્ઞઉજુતાતિ યુગા છ ચ;

એકૂનવીસતિ ધમ્મા, અઞ્ઞમઞ્ઞાવિયોગિનો;

એકૂનસટ્ઠિચિત્તેસુ, સોભનેસુ પવત્તિતા.

૩૭. સમ્માવાચા ચ કમ્મન્તાજીવાતિ વિરતી ઇમા;

લોકુત્તરે સદા સબ્બા, સહ કામસુભે વિસું.

૩૮. કરુણામુદિતા નાના, રૂપે પઞ્ચમવજ્જિતે;

કદાચિ કામે કુસલે, ક્રિયચિત્તે સહેતુકે.

૩૯. તિહેતુકેસુ ચિત્તેસુ, પઞ્ઞા સબ્બત્થ લબ્ભતિ;

એતે સદ્ધાદયો ધમ્મા, પઞ્ચવીસતિ સોભના.

૪૦. ઇસ્સામચ્છેરકુક્કુચ્ચવિરતીકરુણાદયો;

નાના કદાચિ માનો ચ, થિનમિદ્ધં તથા સહ.

૪૧. સત્ત સબ્બત્થ જાયન્તિ, છ તુ ધમ્મા યથારહં;

ચુદ્દસાકુસલેસ્વેવ, સોભનેસ્વેવ સોભના.

૪૨. દ્વેપઞ્ઞાસ પનિચ્ચેવં, ધમ્મે સઙ્ગય્હ માનસે;

લબ્ભમાને વિભાવેય્ય, પચ્ચેકમ્પિ વિચક્ખણો.

૪૩. સોભનઞ્ઞસમાના ચ, પઠમે વિરતી વિના;

દુતિયાદીસુ તક્કઞ્ચ, વિચારં તતિયાદિસુ.

૪૪. ચતુત્થાદીસુ પીતિઞ્ચ, કરુણાદિઞ્ચ પઞ્ચમે;

હિત્વા નેવ વિયોજેય્ય, સઙ્ખિપિત્વાન પઞ્ચધા.

૪૫. પઞ્ચતિંસ ચતુત્તિંસ, તેત્તિંસ ચ યથાક્કમં;

દ્વત્તિંસ તિંસ એવાથ, જાયન્તીતિ મહગ્ગતે.

૪૬. ગહેત્વા વિરતી સબ્બા, હિત્વાન કરુણાદયો;

પઠમે દુતિયાદિમ્હિ, વિતક્કાદિં વિના તથા.

૪૭. પઞ્ચધાવ ગણેય્યેવં, છત્તિંસા ચ યથાક્કમં;

પઞ્ચતિંસ ચતુત્તિંસ, તેત્તિંસદ્વયમુત્તરે.

૪૮. સોભનઞ્ઞસમાના ચ, કામેસુ કુસલે ક્રિયે;

હિત્વા વિરતિયો પાકે, વિરતીકરુણાદયો.

૪૯. ઞાણયુત્તે સોમનસ્સે, વિયુત્તે ઞાણવજ્જિતા;

ઉપેક્ખકે પીતિહીના, વિપ્પયુત્તે દ્વયં વિના.

૫૦. ચતુધા તિવિધેસ્વેવં, વિગણેય્ય દ્વયં દ્વયં;

ન સન્તુપેક્ખાસહિતે, કરુણાદીતિ કેચન.

૫૧. અટ્ઠતિંસ સત્તતિંસદ્વયં છત્તિંસકં સુભે;

પઞ્ચતિંસ ચતુત્તિંસદ્વયં તેત્તિંસકં ક્રિયે.

૫૨. તેત્તિંસ પાકે દ્વત્તિંસદ્વયેકતિંસકં ભવે;

સહેતુકામાવચરપુઞ્ઞપાકક્રિયામને.

૫૩. મોહાદયો સમાના ચ, પઠમે લોભદિટ્ઠિયા;

તતિયે લોભમાનેન, જાયન્તેકૂનવીસતિ.

૫૪. અટ્ઠારસ પીતિહીના, પઞ્ચમે સત્તમે તથા;

નવમે દોસકુક્કુચ્ચમચ્છરિસ્સાહિ વીસતિ.

૫૫. પઠમાદીસુ વુત્તાવ, દુતિયાદીસુ જાયરે;

થિનમિદ્ધેનેકવીસ, વીસ દ્વેવીસતિક્કમા.

૫૬. છન્દપીતિં વિનુદ્ધચ્ચે, કઙ્ખિતે નિચ્છયં વિના;

પઞ્ચદસેવ કઙ્ખાય, અસુભેસુ વિભાવયે.

૫૭. સિતે સમાના નિચ્છન્દા, દ્વાદસેકાદસેવ તુ;

પીતિં હિત્વાન વોટ્ઠબ્બે, વીરિયં સુખતીરણે.

૫૮. દ્વયં હિત્વા મનોધાતુ, ઉપેક્ખાતીરણે દસ;

સત્ત સાધારણા એવ, પઞ્ચવિઞ્ઞાણસમ્ભવા.

૫૯. ઇતિ ચેતસિ સમ્ભૂતા,

દ્વેપઞ્ઞાસ યથારહં;

ઞેય્યા ચેતસિકા ધમ્મા,

ચેતોભેદપ્પભેદિનો.

૬૦. સુઞ્ઞતઞ્ચાનિમિત્તઞ્ચ, તથાપણિહિતન્તિ ચ;

તિવિધાકારમીરેન્તિ, નિબ્બાનમમતં બુધા.

૬૧. યં આરબ્ભ પવત્તન્તં, તત્થાનુત્તરમાનસં;

સુઞ્ઞતાદિવિમોક્ખોતિ, નામમાલમ્બતો લભે.

૬૨. સોપાદિસેસનિબ્બાનધાતુ ચેવ તથાપરા;

અનુપાદિસેસા ચાતિ, દુવિધા પરિયાયતો.

૬૩. તદેતં વાનનિક્ખન્તમચ્ચન્તં સન્તિલક્ખણં;

અસ્સાસકરણરસં, ખેમભાવેન ગય્હતિ.

૬૪. તં નામેતીતિ નિબ્બાનં, નમન્તીતિ તતોપરે;

તેપઞ્ઞાસાતિ નામાનિ, ચતુપઞ્ઞાસ સબ્બથા.

૬૫. ચિત્તચેતસિકયોજનાનયં,

ચિત્તમુત્તમમિદં પકાસિતં;

સાધુ ચેતસિ નિધાય પણ્ડિતા,

સાધુ સાસનધરા ભવન્તિ તે.

૬૬. બુદ્ધપ્પવત્તમવગાહિતબોધિઞાણ-

મિચ્ચાભિધમ્મમવગાહિતસબ્બધમ્મં;

ઓગય્હ નામગતરાસિમસેસયિત્વા,

સઙ્ગય્હ સબ્બમિધ યોજિતમાદરેન.

ઇતિ નામરૂપપરિચ્છેદે નામત્તયવિભાગો નામ

પઠમો પરિચ્છેદો.