૨૨. બાવીસતિમો પરિચ્છેદો

ઞાણદસ્સનવિસુદ્ધિનિદ્દેસો

૧૩૧૯. ઇતો પરં તુ ભિક્ખુસ્સ, હોતિ ગોત્રભુમાનસં;

આવજ્જનિયઠાનત્તા, મગ્ગચિત્તસ્સ તં પન.

૧૩૨૦. ન ચપ્પટિપદાઞાણ-દસ્સનં વા તથેવ ચ;

ઞાણદસ્સનસુદ્ધિં વા, ભજતે ન કુદાચનં.

૧૩૨૧. ઉભિન્નમન્તરા એતં, અબ્બોહારિકમેવ તં;

વિપસ્સનાય સોતસ્મિં, પતિતત્તા વિપસ્સના.

૧૩૨૨. પોથુજ્જનિકગોત્તં વા, અભિભુય્ય પવત્તિતો;

ગોત્તં વુચ્ચતિ નિબ્બાનં, તતો ભવતિ ગોત્રભુ.

૧૩૨૩. ઞાણં ચતૂસુ મગ્ગેસુ, ઞાણદસ્સનસુદ્ધિકં;

તત્થ તં પઠમં મગ્ગં, સમ્પાદેતું પનિચ્છતા.

૧૩૨૪. અઞ્ઞં કિઞ્ચિપિ કાતબ્બં, ભિક્ખુના તેન નત્થિ તં;

યઞ્હિ તેન ચ કાતબ્બં, સિયા તં કતમેવ તુ.

૧૩૨૫. અનુલોમાવસાનઞ્હિ, સૂરં તિક્ખં વિપસ્સનં;

ઉપ્પાદેન્તેન તં સબ્બં, કતમેવ ચ યોગિના.

૧૩૨૬. તસ્સાનુલોમઞાણસ્સ, અન્તે તુ અનિમિત્તકં;

વિસઙ્ખારં નિરોધઞ્ચ, નિબ્બાનં અમતં પદં.

૧૩૨૭. ગોચરં કુરુમાનં તં, નિબ્બાનારમ્મણે પન;

પઠમાવજ્જનઞ્ચેવ, પઠમાભોગતાપિ ચ.

૧૩૨૮. મગ્ગસ્સાનન્તરાદીહિ, પચ્ચયેહિ પનચ્છહિ;

તસ્સ પચ્ચયભાવઞ્ચ, સાધયન્તં તતો પન.

૧૩૨૯. વિપસ્સનાય મુદ્ધઞ્હિ, સિખાપત્તાય તાય તં;

ઉપ્પજ્જતિ અનાવત્તં-રમ્મણં તસ્સ ગોત્રભુ.

૧૩૩૦. એકેનાવજ્જનેનેવ, એકિસ્સાયેવ વીથિયા;

નાનારમ્મણતા ચાનુ-લોમગોત્રભુચેતસં.

૧૩૩૧. ઠત્વા આવજ્જનટ્ઠાને, તમનાવજ્જનમ્પિ ચ;

મગ્ગસ્સ પન તં સઞ્ઞં, દત્વા વિય નિરુજ્ઝતિ.

૧૩૩૨. મગ્ગોપિ તેન તં દિન્નં, અમુઞ્ચિત્વાવ સઞ્હિતં;

તં ઞાણમનુબન્ધન્તો, જાયતે તદનન્તરં.

૧૩૩૩. કદાચિપિ અનિબ્બિદ્ધપુબ્બં મગ્ગો પનેસ હિ;

લોભં દોસઞ્ચ મોહઞ્ચ, વિદ્ધંસન્તોવ જાયતિ.

૧૩૩૪. ન કેવલમયં મગ્ગો, દોસનાસનમેવ ચ;

કરોતિ અથ ખોપાયદ્વારાનિપિ પિધેતિ ચ.

૧૩૩૫. અનામતગ્ગસંસારવટ્ટદુક્ખમહોદધિં;

અપારમતિઘોરઞ્ચ, સોસેતિ ચ અસેસતો.

૧૩૩૬. મિચ્છામગ્ગં પનટ્ઠઙ્ગં, જાયમાનો ચ ઉજ્ઝતિ;

સબ્બવેરભયાનેત્થ, નિચ્ચં વૂપસમેતિ ચ.

૧૩૩૭. બુદ્ધસ્સોરસપુત્તત્તં, ઉપનેતિ નયં પન;

આનિસંસે અનેકેપિ, પવત્તયતિ યોગિનો.

૧૩૩૮. દાયકેનાનિસંસાનં, અનેકેસમનેન ચ;

આદિમગ્ગેન સંયુત્તં, ઞાણન્તિ ઞાણદસ્સનં.

પઠમમગ્ગઞાણં.

૧૩૩૯. તસ્સેવાનન્તરં તસ્સ, વિપાકા દ્વેપિ તીણિ વા;

ફલચિત્તાનિ જાયન્તે, ન જાયન્તે તતો પરં.

૧૩૪૦. કેચિ એકઞ્ચ દ્વે તીણિ, ચત્તારીતિ વદન્તિ તુ;

ન પનેતં ગહેતબ્બં, અજાનિત્વા વદન્તિ તે.

૧૩૪૧. એકસ્સાસેવનં નત્થિ, તસ્મા દ્વે અનુલોમકા;

તેહિ આસેવનં લદ્ધા, તતિયં હોતિ ગોત્રભુ.

૧૩૪૨. ચતુત્થં મગ્ગચિત્તં તુ,

તસ્મા તીણિ ફલાનિ હિ;

અનુલોમા તયો હોન્તિ,

ચતુત્થં હોતિ ગોત્રભુ.

૧૩૪૩. પઞ્ચમં મગ્ગચિત્તઞ્ચ, ફલાનિ દ્વે તતો પન;

સત્તચિત્તપરમાવ, એકાવજ્જનવીથિ હિ.

૧૩૪૪. એત્તાવતા પનેસો હિ, સોતાપન્નોતિ વુચ્ચતિ;

ફલસ્સ પરિયોસાને, ભવઙ્ગોત્તરણં સિયા.

૧૩૪૫. તતો ભવઙ્ગં છિન્દિત્વા, મગ્ગપેક્ખનહેતુકં;

ઉપ્પજ્જતિ મનોદ્વારે, આવજ્જનમનો પન.

૧૩૪૬. તસ્મિં નિરુદ્ધે મગ્ગસ્સ, પચ્ચવેક્ખણસઞ્ઞિતા;

જવનાનિ હિ જાયન્તે, સત્તેવ પટિપાટિયા.

૧૩૪૭. એસેવ ચ નયો ઞેય્યો, ફલાદીનમ્પિ પેક્ખને;

પચ્ચવેક્ખણઞાણાનિ, ભવન્તેકૂનવીસતિ.

૧૩૪૮. મગ્ગો ફલં પહીના ચ, કિલેસા અવસિટ્ઠકા;

નિબ્બાનઞ્ચેતિ પઞ્ચેતે, પચ્ચવેક્ખણભૂમિયો.

૧૩૪૯. એવં સો પચ્ચવેક્ખિત્વા, સોતાપન્નોપપત્તિયા;

યોગમારભતે ધીરો, દુતિયાય ચ ભૂમિયા.

૧૩૫૦. ખન્ધપઞ્ચકસઙ્ખાતં, તં સઙ્ખારગતં પુન;

અનિચ્ચં દુક્ખમનત્તાતિ, ઞાણેન પરિમજ્જતિ.

૧૩૫૧. તતો વિપસ્સનાવીથિ-મોગાહતિ ચ તાવદે;

તસ્સેવં પટિપન્નસ્સ, હેટ્ઠા વુત્તનયેન તુ.

૧૩૫૨. તતો સઙ્ખારુપેક્ખાય, અવસાને તથેવ ચ;

એકાવજ્જનવારસ્મિં, ગોત્રભુસ્સ અનન્તરં.

૧૩૫૩. બ્યાપાદકામરાગાનં, તનુભાવં તુ સાધયં;

સકદાગામિમગ્ગોયં, જાયતે દુતિયો પન.

દુતિયમગ્ગઞાણં.

૧૩૫૪. ઇમસ્સાપિ ચ ઞાણસ્સ, હેટ્ઠા વુત્તનયેનિધ;

ફલચિત્તાનિ ઞેય્યાનિ, વિઞ્ઞુના દ્વેપિ તીણિ વા.

૧૩૫૫. એત્તાવતા પનેસો હિ, સકદાગામિ નામયં;

સકિદેવ ઇમં લોકં, આગન્ત્વાન્તકરો ભવે.

૧૩૫૬. હેટ્ઠા વુત્તનયેનેવ, પઞ્ચધા પચ્ચવેક્ખણં;

એવં સો પચ્ચવેક્ખિત્વા, સકદાગામિપત્તિયા.

૧૩૫૭. યોગમારભતે ધીરો, તતિયાય ચ ભૂમિયા;

બ્યાપાદકામરાગાનં, પહાનાય ચ પણ્ડિતો.

૧૩૫૮. ખન્ધપઞ્ચકસઙ્ખાતં, તં સઙ્ખારગતં પન;

અનિચ્ચં દુક્ખમનત્તાતિ, ઞાણેન પરિમજ્જતિ.

૧૩૫૯. તતો વિપસ્સનાવીથિ-મોગાહતિ ચ તાવદે;

તસ્સેવં પટિપન્નસ્સ, હેટ્ઠા વુત્તનયેન તુ.

૧૩૬૦. તતો સઙ્ખારુપેક્ખાય, અવસાને તથેવ ચ;

એકાવજ્જનવીથિમ્હિ, ગોત્રભુસ્સ અનન્તરં.

૧૩૬૧. બ્યાપાદકામરાગાનં, મૂલઘાતં તુ સાધયં;

તસ્સાનાગામિમગ્ગોયં, જાયતે તતિયો પન.

તતિયમગ્ગઞાણં.

૧૩૬૨. ઇમસ્સાપિ ચ ઞાણસ્સ, હેટ્ઠા વુત્તનયેનિધ;

પવત્તિ ફલચિત્તાનં, વેદિતબ્બા વિભાવિના.

૧૩૬૩. એત્તાવતા પનેસોપિ, હોતિનાગામિ નામયં;

તત્થેવ પરિનિબ્બાયી, અનાવત્તિસભાવતો.

૧૩૬૪. હેટ્ઠા વુત્તનયેનેવ, પઞ્ચધા પચ્ચવેક્ખણં;

એવં સો પચ્ચવેક્ખિત્વા, અનાગામિરિયસાવકો.

૧૩૬૫. યોગમારભતે ધીરો, ચતુત્થાય ચ ભૂમિયા;

પત્તિયારૂપરાગાદિ-પહાનાય ચ પણ્ડિતો.

૧૩૬૬. તથેવ સઙ્ખારગતં, અનિચ્ચાદિવસેન સો;

પરિવત્તતિ ઞાણેન, તથેવ પરિમજ્જતિ.

૧૩૬૭. તતો વિપસ્સનાવીથિ-મોગાહતિ ચ તાવદે;

તસ્સેવં પટિપન્નસ્સ, હેટ્ઠા વુત્તનયેન તુ.

૧૩૬૮. તતો સઙ્ખારુપેક્ખાય, અવસાને તથેવ ચ;

એકાવજ્જનવારસ્મિં, ગોત્રભુસ્સ અનન્તરં.

૧૩૬૯. તસ્સારહત્તમગ્ગોયં,

જાયતે તુ તતો પરં;

રૂપરાગાદિદોસાનં,

વિદ્ધંસાય કરો પન.

ચતુત્થમગ્ગઞાણં.

૧૩૭૦. ઇમસ્સાપિ ચ ઞાણસ્સ, હેટ્ઠા વુત્તનયેનિધ;

પવત્તિ ફલચિત્તાનં, વેદિતબ્બા વિભાવિના.

૧૩૭૧. એત્તાવતા પનેસો હિ,

અરહા નામ અટ્ઠમો;

અરિયો પુગ્ગલો હોતિ,

મહાખીણાસવો અયં.

૧૩૭૨. અનુપ્પત્તસદત્થો ચ,

ખીણસંયોજનો મુનિ;

સદેવકસ્સ લોકસ્સ,

દક્ખિણેય્યો અનુત્તરો.

૧૩૭૩. એત્તાવતા ચતસ્સોપિ, ઞાણદસ્સનસુદ્ધિયો;

હિતત્થાય ચ ભિક્ખૂનં, સઙ્ખેપેનેવ દસ્સિતા.

૧૩૭૪. સદ્ધેન સમ્મા પન ભાવનીયા,

અરિયાય પઞ્ઞાય ચ ભાવનાય;

વિસુદ્ધિકામેન તપોધનેન,

ભવક્ખયં પત્થયતા બુધેન.

ઇતિ અભિધમ્માવતારે ઞાણદસ્સનવિસુદ્ધિનિદ્દેસો નામ

બાવીસતિમો પરિચ્છેદો.