૩. પકિણ્ણકપરિચ્છેદો

૧. સમ્પયુત્તા યથાયોગં, તેપઞ્ઞાસ સભાવતો.

ચિત્તચેતસિકા ધમ્મા, તેસં દાનિ યથારહં.

૨. વેદનાહેતુતો કિચ્ચદ્વારાલમ્બણવત્થુતો.

ચિત્તુપ્પાદવસેનેવ, સઙ્ગહો નામ નીયતે.

વેદનાસઙ્ગહો

૩. તત્થ વેદનાસઙ્ગહે તાવ તિવિધા વેદના સુખં દુક્ખં અદુક્ખમસુખા ચેતિ, સુખં દુક્ખં સોમનસ્સં દોમનસ્સં ઉપેક્ખાતિ ચ ભેદેન પન પઞ્ચધા હોતિ.

૪. તત્થ સુખસહગતં કુસલવિપાકં કાયવિઞ્ઞાણમેકમેવ, તથા દુક્ખસહગતં અકુસલવિપાકં.

૫. સોમનસ્સસહગતચિત્તાનિ પન લોભમૂલાનિ ચત્તારિ, દ્વાદસ કામાવચરસોભનાનિ, સુખસન્તીરણહસનાનિ ચ દ્વેતિ અટ્ઠારસ કામાવચરસોમનસ્સસહગતચિત્તાનિ ચેવ પઠમદુતિયતતિયચતુત્થજ્ઝાનસઙ્ખાતાનિ ચતુચત્તાલીસ મહગ્ગતલોકુત્તરચિત્તાનિ ચેતિ દ્વાસટ્ઠિવિધાનિ ભવન્તિ.

૬. દોમનસ્સસહગતચિત્તાનિ પન દ્વે પટિઘસમ્પયુત્તચિત્તાનેવ.

૭. સેસાનિ સબ્બાનિપિ પઞ્ચપઞ્ઞાસ ઉપેક્ખાસહગતચિત્તાનેવાતિ.

૮. સુખં દુક્ખમુપેક્ખાતિ, તિવિધા તત્થ વેદના.

સોમનસ્સં દોમનસ્સમિતિભેદેન પઞ્ચધા.

૯. સુખમેકત્થ દુક્ખઞ્ચ, દોમનસ્સં દ્વયે ઠિતં.

દ્વાસટ્ઠીસુ સોમનસ્સં, પઞ્ચપઞ્ઞાસકેતરા.

હેતુસઙ્ગહો

૧૦. હેતુસઙ્ગહે હેતૂ નામ લોભો દોસો મોહો અલોભો અદોસો અમોહો ચાતિ છબ્બિધા ભવન્તિ.

૧૧. તત્થ પઞ્ચદ્વારાવજ્જનદ્વિપઞ્ચવિઞ્ઞાણસમ્પટિચ્છનસન્તીરણવોટ્ઠબ્બનહસનવસેન અહેતુકચિત્તાનિ નામ.

૧૨. સેસાનિ સબ્બાનિપિ એકસત્તતિ ચિત્તાનિ સહેતુકાનેવ.

૧૩. તત્થાપિ દ્વે મોમૂહચિત્તાનિ એકહેતુકાનિ.

૧૪. સેસાનિ દસ અકુસલચિત્તાનિ ચેવ ઞાણવિપ્પયુત્તાનિ દ્વાદસ કામાવચરસોભનાનિ ચેતિ દ્વાવીસતિ દ્વિહેતુકચિત્તાનિ.

૧૫. દ્વાદસ ઞાણસમ્પયુત્તકામાવચરસોભનાનિ ચેવ પઞ્ચતિંસ મહગ્ગતલોકુત્તરચિત્તાનિ ચેતિ સત્તચત્તાલીસ તિહેતુકચિત્તાનીતિ.

૧૬. લોભો દોસો ચ મોહો ચ,

હેતૂ અકુસલા તયો;

અલોભાદોસામોહો ચ,

કુસલાબ્યાકતા તથા.

૧૭. અહેતુકાટ્ઠારસેકહેતુકા દ્વે દ્વાવીસતિ.

દ્વિહેતુકા મતા સત્તચત્તાલીસતિહેતુકા.

કિચ્ચસઙ્ગહો

૧૮. કિચ્ચસઙ્ગહે કિચ્ચાનિ નામ પટિસન્ધિભવઙ્ગાવજ્જનદસ્સનસવનઘાયનસાયનફુસનસમ્પટિચ્છનસન્તીરણવોટ્ઠબ્બનજવનતદારમ્મણચુતિવસેન ચુદ્દસવિધાનિ ભવન્તિ.

૧૯. પટિસન્ધિભવઙ્ગાવજ્જનપઞ્ચવિઞ્ઞાણઠાનાદિવસેન પન તેસં દસધા ઠાનભેદો વેદિતબ્બો.

૨૦. તત્થ દ્વે ઉપેક્ખાસહગતસન્તીરણાનિ ચેવ અટ્ઠ મહાવિપાકાનિ ચ નવ રૂપારૂપવિપાકાનિ ચેતિ એકૂનવીસતિ ચિત્તાનિ પટિસન્ધિભવઙ્ગચુતિકિચ્ચાનિ નામ.

૨૧. આવજ્જનકિચ્ચાનિ પન દ્વે.

૨૨. તથા દસ્સનસવનઘાયનસાયનફુસનસમ્પટિચ્છનકિચ્ચાનિ ચ.

૨૩. તીણિ સન્તીરણકિચ્ચાનિ.

૨૪. મનોદ્વારાવજ્જનમેવ પઞ્ચદ્વારે વોટ્ઠબ્બનકિચ્ચં સાધેતિ.

૨૫. આવજ્જનદ્વયવજ્જિતાનિ કુસલાકુસલફલકિરિયચિત્તાનિ પઞ્ચપઞ્ઞાસ જવનકિચ્ચાનિ.

૨૬. અટ્ઠ મહાવિપાકાનિ ચેવ સન્તીરણત્તયઞ્ચેતિ એકાદસ તદારમ્મણકિચ્ચાનિ.

૨૭. તેસુ પન દ્વે ઉપેક્ખાસહગતસન્તીરણચિત્તાનિ પટિસન્ધિભવઙ્ગચુતિતદારમ્મણસન્તીરણવસેન પઞ્ચકિચ્ચાનિ નામ.

૨૮. મહાવિપાકાનિ અટ્ઠ પટિસન્ધિભવઙ્ગચુતિતદારમ્મણવસેન ચતુકિચ્ચાનિ નામ.

૨૯. મહગ્ગતવિપાકાનિ નવ પટિસન્ધિભવઙ્ગચુતિવસેન તિકિચ્ચાનિ નામ.

૩૦. સોમનસ્સસન્તીરણં સન્તીરણતદારમ્મણવસેન દુકિચ્ચં.

૩૧. તથા વોટ્ઠબ્બનં વોટ્ઠબ્બનાવજ્જનવસેન.

૩૨. સેસાનિ પન સબ્બાનિપિ જવનમનોધાતુત્તિકદ્વિપઞ્ચવિઞ્ઞાણાનિ યથાસમ્ભવમેકકિચ્ચાનીતિ.

૩૩. પટિસન્ધાદયો નામ, કિચ્ચભેદેન ચુદ્દસ.

દસધા ઠાનભેદેન, ચિત્તુપ્પાદા પકાસિતા.

૩૪. અટ્ઠસટ્ઠિ તથા દ્વે ચ, નવાટ્ઠ દ્વે યથાક્કમં.

એકદ્વિતિચતુપઞ્ચકિચ્ચઠાનાનિ નિદ્દિસે.

દ્વારસઙ્ગહો

૩૫. દ્વારસઙ્ગહે દ્વારાનિ નામ ચક્ખુદ્વારં સોતદ્વારં ઘાનદ્વારં જિવ્હાદ્વારં કાયદ્વારં મનોદ્વારઞ્ચેતિ છબ્બિધાનિ ભવન્તિ.

૩૬. તત્થ ચક્ખુમેવ ચક્ખુદ્વારં.

૩૭. તથા સોતાદયો સોતદ્વારાદીનિ.

૩૮. મનોદ્વારં પન ભવઙ્ગન્તિ પવુચ્ચતિ.

૩૯. તત્થ પઞ્ચદ્વારાવજ્જનચક્ખુવિઞ્ઞાણસમ્પટિચ્છનસન્તીરણવોટ્ઠબ્બનકામાવચરજવનતદારમ્મણવસેન છચત્તાલીસ ચિત્તાનિ ચક્ખુદ્વારે યથારહં ઉપ્પજ્જન્તિ, તથા પઞ્ચદ્વારાવજ્જનસોતવિઞ્ઞાણાદિવસેન સોતદ્વારાદીસુપિ છચત્તાલીસેવ ભવન્તીતિ સબ્બથાપિ પઞ્ચદ્વારે ચતુપઞ્ઞાસ ચિત્તાનિ કામાવચરાનેવ.

૪૦. મનોદ્વારે પન મનોદ્વારાવજ્જનપઞ્ચપઞ્ઞાસજવનતદારમ્મણવસેન સત્તસટ્ઠિ ચિત્તાનિ ભવન્તિ.

૪૧. એકૂનવીસતિ પટિસન્ધિભવઙ્ગચુતિવસેન દ્વારવિમુત્તાનિ.

૪૨. તેસુ પન પઞ્ચવિઞ્ઞાણાનિ ચેવ મહગ્ગતલોકુત્તરજવનાનિ ચેતિ છત્તિંસ યથારહમેકદ્વારિકચિત્તાનિ નામ.

૪૩. મનોધાતુત્તિકં પન પઞ્ચદ્વારિકં.

૪૪. સુખસન્તીરણવોટ્ઠબ્બનકામાવચરજવનાનિ છદ્વારિકચિત્તાનિ.

૪૫. ઉપેક્ખાસહગતસન્તીરણમહાવિપાકાનિ છદ્વારિકાનિ ચેવ દ્વારવિમુત્તાનિ ચ.

૪૬. મહગ્ગતવિપાકાનિ દ્વારવિમુત્તાનેવાતિ.

૪૭. એકદ્વારિકચિત્તાનિ, પઞ્ચછદ્વારિકાનિ ચ.

છદ્વારિકવિમુત્તાનિ, વિમુત્તાનિ ચ સબ્બથા.

છત્તિંસતિ તથા તીણિ, એકતિંસ યથાક્કમં;

દસધા નવધા ચેતિ, પઞ્ચધા પરિદીપયે.

આલમ્બણસઙ્ગહો

૪૮. આલમ્બણસઙ્ગહે આરમ્મણાનિ નામ રૂપારમ્મણં સદ્દારમ્મણં ગન્ધારમ્મણં રસારમ્મણં ફોટ્ઠબ્બારમ્મણં ધમ્મારમ્મણઞ્ચેતિ છબ્બિધાનિ ભવન્તિ.

૪૯. તત્થ રૂપમેવ રૂપારમ્મણં, તથા સદ્દાદયો સદ્દારમ્મણાદીનિ.

૫૦. ધમ્મારમ્મણં પન પસાદસુખુમરૂપચિત્તચેતસિકનિબ્બાનપઞ્ઞત્તિવસેન છધા સઙ્ગય્હતિ.

૫૧. તત્થ ચક્ખુદ્વારિકચિત્તાનં સબ્બેસમ્પિ રૂપમેવ આરમ્મણં, તઞ્ચ પચ્ચુપ્પન્નં. તથા સોતદ્વારિકચિત્તાદીનમ્પિ સદ્દાદીનિ, તાનિ ચ પચ્ચુપ્પન્નાનિયેવ.

૫૨. મનોદ્વારિકચિત્તાનં પન છબ્બિધમ્પિ પચ્ચુપ્પન્નમતીતં અનાગતં કાલવિમુત્તઞ્ચ યથારહમારમ્મણં હોતિ.

૫૩. દ્વારવિમુત્તાનઞ્ચ પટિસન્ધિભવઙ્ગચુતિસઙ્ખાતાનં છબ્બિધમ્પિ યથાસમ્ભવં યેભુય્યેન ભવન્તરે છદ્વારગ્ગહિતં પચ્ચુપ્પન્નમતીતં પઞ્ઞત્તિભૂતં વા કમ્મકમ્મનિમિત્તગતિનિમિત્તસમ્મતં આરમ્મણં હોતિ.

૫૪. તેસુ ચક્ખુવિઞ્ઞાણાદીનિ યથાક્કમં રૂપાદિએકેકારમ્મણાનેવ.

૫૫. મનોધાતુત્તિકં પન રૂપાદિપઞ્ચારમ્મણં.

૫૬. સેસાનિ કામાવચરવિપાકાનિ હસનચિત્તઞ્ચેતિ સબ્બથાપિ કામાવચરારમ્મણાનેવ.

૫૭. અકુસલાનિ ચેવ ઞાણવિપ્પયુત્તકામાવચરજવનાનિ ચેતિ લોકુત્તરવજ્જિતસબ્બારમ્મણાનિ.

૫૮. ઞાણસમ્પયુત્તકામાવચરકુસલાનિ ચેવ પઞ્ચમજ્ઝાનસઙ્ખાતં અભિઞ્ઞાકુસલઞ્ચેતિ અરહત્તમગ્ગફલવજ્જિતસબ્બારમ્મણાનિ.

૫૯. ઞાણસમ્પયુત્તકામાવચરકિરિયાનિ ચેવ કિરિયાભિઞ્ઞાવોટ્ઠબ્બનઞ્ચેતિ સબ્બથાપિ સબ્બારમ્મણાનિ.

૬૦. આરુપ્પેસુ દુતિયચતુત્થાનિ મહગ્ગતારમ્મણાનિ.

૬૧. સેસાનિ મહગ્ગતચિત્તાનિ સબ્બાનિપિ પઞ્ઞત્તારમ્મણાનિ.

૬૨. લોકુત્તરચિત્તાનિ નિબ્બાનારમ્મણાનીતિ.

૬૩. પઞ્ચવીસ પરિત્તમ્હિ, છ ચિત્તાનિ મહગ્ગતે.

એકવીસતિ વોહારે, અટ્ઠ નિબ્બાનગોચરે.

વીસાનુત્તરમુત્તમ્હિ, અગ્ગમગ્ગફલુજ્ઝિતે;

પઞ્ચ સબ્બત્થ છચ્ચેતિ, સત્તધા તત્થ સઙ્ગહો.

વત્થુસઙ્ગહો

૬૪. વત્થુસઙ્ગહે વત્થૂનિ નામ ચક્ખુસોતઘાનજિવ્હાકાયહદયવત્થુ ચેતિ છબ્બિધાનિ ભવન્તિ.

૬૫. તાનિ કામલોકે સબ્બાનિપિ લબ્ભન્તિ.

૬૬. રૂપલોકે પન ઘાનાદિત્તયં નત્થિ.

૬૭. અરૂપલોકે પન સબ્બાનિપિ ન સંવિજ્જન્તિ.

૬૮. તત્થ પઞ્ચવિઞ્ઞાણધાતુયો યથાક્કમં એકન્તેન પઞ્ચ પસાદવત્થૂનિ નિસ્સાયેવ પવત્તન્તિ.

૬૯. પઞ્ચદ્વારાવજ્જનસમ્પટિચ્છનસઙ્ખાતા પન મનોધાતુ ચ હદયં નિસ્સિતાયેવ પવત્તન્તિ.

૭૦. અવસેસા પન મનોવિઞ્ઞાણધાતુસઙ્ખાતા ચ સન્તીરણમહાવિપાકપટિઘદ્વયપઠમમગ્ગહસનરૂપાવચરવસેન હદયં નિસ્સાયેવ પવત્તન્તિ.

૭૧. અવસેસા કુસલાકુસલકિરિયાનુત્તરવસેન પન નિસ્સાય વા અનિસ્સાય વા.

૭૨. આરુપ્પવિપાકવસેન હદયં અનિસ્સાયેવાતિ.

૭૩. છવત્થું નિસ્સિતા કામે, સત્ત રૂપે ચતુબ્બિધા.

તિવત્થું નિસ્સિતારુપ્પે, ધાત્વેકા નિસ્સિતા મતા.

૭૪. તેચત્તાલીસ નિસ્સાય, દ્વેચત્તાલીસ જાયરે.

નિસ્સાય ચ અનિસ્સાય, પાકારુપ્પા અનિસ્સિતા.

ઇતિ અભિધમ્મત્થસઙ્ગહે પકિણ્ણકસઙ્ગહવિભાગો નામ

તતિયો પરિચ્છેદો.