૭. બોધિપક્ખિયવગ્ગો

૧. સંયોજનસુત્તં

૫૩૧. સાવત્થિનિદાનં. ‘‘પઞ્ચિમાનિ, ભિક્ખવે, ઇન્દ્રિયાનિ ભાવિતાનિ બહુલીકતાનિ સંયોજનપ્પહાનાય [સંયોજનાનં પહાનાય (સ્યા. ક.)] સંવત્તન્તિ. કતમાનિ પઞ્ચ? સદ્ધિન્દ્રિયં…પે… પઞ્ઞિન્દ્રિયં – ઇમાનિ ખો, ભિક્ખવે, પઞ્ચિન્દ્રિયાનિ ભાવિતાનિ બહુલીકતાનિ સંયોજનપ્પહાનાય સંવત્તન્તી’’તિ. પઠમં.

૨. અનુસયસુત્તં

૫૩૨. ‘‘પઞ્ચિમાનિ, ભિક્ખવે, ઇન્દ્રિયાનિ ભાવિતાનિ બહુલીકતાનિ અનુસયસમુગ્ઘાતાય સંવત્તન્તિ. કતમાનિ પઞ્ચ? સદ્ધિન્દ્રિયં…પે… પઞ્ઞિન્દ્રિયં – ઇમાનિ ખો, ભિક્ખવે, પઞ્ચિન્દ્રિયાનિ ભાવિતાનિ બહુલીકતાનિ અનુસયસમુગ્ઘાતાય સંવત્તન્તી’’તિ. દુતિયં.

૩. પરિઞ્ઞાસુત્તં

૫૩૩. ‘‘પઞ્ચિમાનિ, ભિક્ખવે, ઇન્દ્રિયાનિ ભાવિતાનિ બહુલીકતાનિ અદ્ધાનપરિઞ્ઞાય સંવત્તન્તિ. કતમાનિ પઞ્ચ? સદ્ધિન્દ્રિયં…પે… પઞ્ઞિન્દ્રિયં – ઇમાનિ ખો, ભિક્ખવે, પઞ્ચિન્દ્રિયાનિ ભાવિતાનિ બહુલીકતાનિ અદ્ધાનપરિઞ્ઞાય સંવત્તન્તી’’તિ. તતિયં.

૪. આસવક્ખયસુત્તં

૫૩૪. ‘‘પઞ્ચિમાનિ, ભિક્ખવે, ઇન્દ્રિયાનિ ભાવિતાનિ બહુલીકતાનિ આસવાનં ખયાય સંવત્તન્તિ. કતમાનિ પઞ્ચ? સદ્ધિન્દ્રિયં…પે… પઞ્ઞિન્દ્રિયં – ઇમાનિ ખો, ભિક્ખવે, પઞ્ચિન્દ્રિયાનિ ભાવિતાનિ બહુલીકતાનિ આસવાનં ખયાય સંવત્તન્તી’’તિ.

‘‘પઞ્ચિમાનિ, ભિક્ખવે, ઇન્દ્રિયાનિ ભાવિતાનિ બહુલીકતાનિ સંયોજનપ્પહાનાય સંવત્તન્તિ, અનુસયસમુગ્ઘાતાય સંવત્તન્તિ, અદ્ધાનપરિઞ્ઞાય સંવત્તન્તિ, આસવાનં ખયાય સંવત્તન્તિ. કતમાનિ પઞ્ચ? સદ્ધિન્દ્રિયં…પે… પઞ્ઞિન્દ્રિયં – ઇમાનિ ખો, ભિક્ખવે, પઞ્ચિન્દ્રિયાનિ ભાવિતાનિ બહુલીકતાનિ સંયોજનપ્પહાનાય સંવત્તન્તિ, અનુસયસમુગ્ઘાતાય સંવત્તન્તિ, અદ્ધાનપરિઞ્ઞાય સંવત્તન્તિ, આસવાનં ખયાય સંવત્તન્તી’’તિ. ચતુત્થં.

૫. પઠમફલસુત્તં

૫૩૫. ‘‘પઞ્ચિમાનિ, ભિક્ખવે, ઇન્દ્રિયાનિ. કતમાનિ પઞ્ચ? સદ્ધિન્દ્રિયં…પે… પઞ્ઞિન્દ્રિયં – ઇમાનિ ખો, ભિક્ખવે, પઞ્ચિન્દ્રિયાનિ. ઇમેસં ખો, ભિક્ખવે, પઞ્ચન્નં ઇન્દ્રિયાનં ભાવિતત્તા બહુલીકતત્તા દ્વિન્નં ફલાનં અઞ્ઞતરં ફલં પાટિકઙ્ખં – દિટ્ઠેવ ધમ્મે અઞ્ઞા, સતિ વા ઉપાદિસેસે અનાગામિતા’’તિ. પઞ્ચમં.

૬. દુતિયફલસુત્તં

૫૩૬. ‘‘પઞ્ચિમાનિ, ભિક્ખવે, ઇન્દ્રિયાનિ. કતમાનિ પઞ્ચ? સદ્ધિન્દ્રિયં…પે… પઞ્ઞિન્દ્રિયં – ઇમાનિ ખો, ભિક્ખવે, પઞ્ચિન્દ્રિયાનિ. ઇમેસં ખો, ભિક્ખવે, પઞ્ચન્નં ઇન્દ્રિયાનં ભાવિતત્તા બહુલીકતત્તા સત્ત ફલા સત્તાનિસંસા પાટિકઙ્ખા. કતમે સત્ત ફલા સત્તાનિસંસા? દિટ્ઠેવ ધમ્મે પટિકચ્ચ અઞ્ઞં આરાધેતિ, નો ચે દિટ્ઠેવ ધમ્મે પટિકચ્ચ અઞ્ઞં આરાધેતિ, અથ મરણકાલે અઞ્ઞં આરાધેતિ. નો ચે દિટ્ઠેવ ધમ્મે અઞ્ઞં આરાધેતિ, નો ચે મરણકાલે અઞ્ઞં આરાધેતિ, અથ પઞ્ચન્નં ઓરમ્ભાગિયાનં સંયોજનાનં પરિક્ખયા અન્તરાપરિનિબ્બાયી હોતિ, ઉપહચ્ચપરિનિબ્બાયી હોતિ, અસઙ્ખારપરિનિબ્બાયી હોતિ, સસઙ્ખારપરિનિબ્બાયી હોતિ, ઉદ્ધંસોતો હોતિ અકનિટ્ઠગામી. ઇમેસં ખો, ભિક્ખવે, પઞ્ચન્નં ઇન્દ્રિયાનં ભાવિતત્તા બહુલીકતત્તા ઇમે સત્ત ફલા સત્તાનિસંસા પાટિકઙ્ખા’’તિ. છટ્ઠં.

૭. પઠમરુક્ખસુત્તં

૫૩૭. ‘‘સેય્યથાપિ ભિક્ખવે, યે કેચિ જમ્બુદીપકા રુક્ખા, જમ્બૂ તેસં અગ્ગમક્ખાયતિ; એવમેવ ખો ભિક્ખવે, યે કેચિ બોધિપક્ખિયા ધમ્મા, પઞ્ઞિન્દ્રિયં તેસં અગ્ગમક્ખાયતિ, યદિદં – બોધાય. કતમે ચ, ભિક્ખવે, બોધિપક્ખિયા ધમ્મા? સદ્ધિન્દ્રિયં, ભિક્ખવે, બોધિપક્ખિયો ધમ્મો, તં બોધાય સંવત્તતિ. વીરિયિન્દ્રિયં…પે… સતિન્દ્રિયં…પે… સમાધિન્દ્રિયં…પે… પઞ્ઞિન્દ્રિયં બોધિપક્ખિયો ધમ્મો, તં બોધાય સંવત્તતિ. સેય્યથાપિ, ભિક્ખવે, યે કેચિ જમ્બુદીપકા રુક્ખા, જમ્બૂ તેસં અગ્ગમક્ખાયતિ; એવમેવ ખો, ભિક્ખવે, યે કેચિ બોધિપક્ખિયા ધમ્મા, પઞ્ઞિન્દ્રિયં તેસં અગ્ગમક્ખાયતિ, યદિદં – બોધાયા’’તિ. સત્તમં.

૮. દુતિયરુક્ખસુત્તં

૫૩૮. ‘‘સેય્યથાપિ, ભિક્ખવે, યે કેચિ દેવાનં તાવતિંસાનં રુક્ખા, પારિછત્તકો તેસં અગ્ગમક્ખાયતિ; એવમેવ ખો, ભિક્ખવે, યે કેચિ બોધિપક્ખિયા ધમ્મા, પઞ્ઞિન્દ્રિયં તેસં અગ્ગમક્ખાયતિ, યદિદં – બોધાય. કતમે ચ, ભિક્ખવે, બોધિપક્ખિયા ધમ્મા? સદ્ધિન્દ્રિયં, ભિક્ખવે, બોધિપક્ખિયો ધમ્મો, તં બોધાય સંવત્તતિ. વીરિયિન્દ્રિયં…પે… સતિન્દ્રિયં…પે… સમાધિન્દ્રિયં…પે… પઞ્ઞિન્દ્રિયં બોધિપક્ખિયો ધમ્મો, તં બોધાય સંવત્તતિ. સેય્યથાપિ, ભિક્ખવે, યે કેચિ દેવાનં તાવતિંસાનં રુક્ખા, પારિછત્તકો તેસં અગ્ગમક્ખાયતિ; એવમેવ ખો, ભિક્ખવે, યે કેચિ બોધિપક્ખિયા ધમ્મા, પઞ્ઞિન્દ્રિયં તેસં અગ્ગમક્ખાયતિ, યદિદં – બોધાયા’’તિ. અટ્ઠમં.

૯. તતિયરુક્ખસુત્તં

૫૩૯. ‘‘સેય્યથાપિ, ભિક્ખવે, યે કેચિ અસુરાનં રુક્ખા, ચિત્તપાટલિ તેસં અગ્ગમક્ખાયતિ; એવમેવ ખો, ભિક્ખવે, યે કેચિ બોધિપક્ખિયા ધમ્મા, પઞ્ઞિન્દ્રિયં તેસં અગ્ગમક્ખાયતિ, યદિદં – બોધાય. કતમે ચ, ભિક્ખવે, બોધિપક્ખિયા ધમ્મા? સદ્ધિન્દ્રિયં, ભિક્ખવે, બોધિપક્ખિયો ધમ્મો, તં બોધાય સંવત્તતિ…પે… પઞ્ઞિન્દ્રિયં બોધિપક્ખિયો ધમ્મો, તં બોધાય સંવત્તતિ. સેય્યથાપિ ભિક્ખવે, યે કેચિ અસુરાનં રુક્ખા, ચિત્તપાટલિ તેસં અગ્ગમક્ખાયતિ; એવમેવ ખો, ભિક્ખવે, યે કેચિ બોધિપક્ખિયા ધમ્મા, પઞ્ઞિન્દ્રિયં તેસં અગ્ગમક્ખાયતિ, યદિદં – બોધાયા’’તિ. નવમં.

૧૦. ચતુત્થરુક્ખસુત્તં

૫૪૦. ‘‘સેય્યથાપિ, ભિક્ખવે, યે કેચિ સુપણ્ણાનં રુક્ખા, કૂટસિમ્બલી [કોટસિમ્બલિ (સ્યા. કં.)] તેસં અગ્ગમક્ખાયતિ; એવમેવ ખો, ભિક્ખવે, યે કેચિ બોધિપક્ખિયા ધમ્મા, પઞ્ઞિન્દ્રિયં તેસં અગ્ગમક્ખાયતિ, યદિદં – બોધાય. કતમે ચ, ભિક્ખવે, બોધિપક્ખિયા ધમ્મા? સદ્ધિન્દ્રિયં, ભિક્ખવે, બોધિપક્ખિયો ધમ્મો, તં બોધાય સંવત્તતિ…પે… પઞ્ઞિન્દ્રિયં બોધિપક્ખિયો ધમ્મો, તં બોધાય સંવત્તતિ. સેય્યથાપિ, ભિક્ખવે, યે કેચિ સુપણ્ણાનં રુક્ખા, કૂટસિમ્બલી તેસં અગ્ગમક્ખાયતિ; એવમેવ ખો, ભિક્ખવે, યે કેચિ બોધિપક્ખિયા ધમ્મા, પઞ્ઞિન્દ્રિયં તેસં અગ્ગમક્ખાયતિ, યદિદં – બોધાયા’’તિ. દસમં.

બોધિપક્ખિયવગ્ગો સત્તમો.

તસ્સુદ્દાનં –

સંયોજના અનુસયા, પરિઞ્ઞા આસવક્ખયા;

દ્વે ફલા ચતુરો રુક્ખા, વગ્ગો તેન પવુચ્ચતીતિ.