૧-૧૦. ઓઘાદિસુત્તદસકં

૬૪૧-૬૫૦. ‘‘પઞ્ચિમાનિ, ભિક્ખવે, ઉદ્ધમ્ભાગિયાનિ સંયોજનાનિ. કતમાનિ પઞ્ચ? રૂપરાગો, અરૂપરાગો, માનો, ઉદ્ધચ્ચં, અવિજ્જા – ઇમાનિ ખો, ભિક્ખવે, પઞ્ચુદ્ધમ્ભાગિયાનિ સંયોજનાનિ. ઇમેસં ખો, ભિક્ખવે, પઞ્ચન્નં ઉદ્ધમ્ભાગિયાનં સંયોજનાનં અભિઞ્ઞાય પરિઞ્ઞાય પરિક્ખયાય પહાનાય પઞ્ચિન્દ્રિયાનિ ભાવેતબ્બાનિ. કતમાનિ પઞ્ચ? ઇધ, ભિક્ખવે, ભિક્ખુ સદ્ધિન્દ્રિયં ભાવેતિ રાગવિનયપરિયોસાનં દોસવિનયપરિયોસાનં મોહવિનયપરિયોસાનં. વીરિયિન્દ્રિયં …પે… સતિન્દ્રિયં… સમાધિન્દ્રિયં … પઞ્ઞિન્દ્રિયં ભાવેતિ રાગવિનયપરિયોસાનં દોસવિનયપરિયોસાનં મોહવિનયપરિયોસાનં. ઇમેસં ખો, ભિક્ખવે, પઞ્ચન્નં ઉદ્ધમ્ભાગિયાનં સંયોજનાનં અભિઞ્ઞાય પરિઞ્ઞાય પરિક્ખયાય પહાનાય ઇમાનિ પઞ્ચિન્દ્રિયાનિ ભાવેતબ્બાની’’તિ.

ઓઘવગ્ગો સત્તરસમો.

તસ્સુદ્દાનં –

ઓઘો યોગો ઉપાદાનં, ગન્થા અનુસયેન ચ;

કામગુણા નીવરણા, ખન્ધા ઓરુદ્ધમ્ભાગિયાતિ.

ઇન્દ્રિયસંયુત્તં ચતુત્થં.