૧૦. નિરોધસુત્તં

૨૫૭. ‘‘નિરોધસઞ્ઞા, ભિક્ખવે, ભાવિતા બહુલીકતા મહપ્ફલા હોતિ મહાનિસંસા. કથં ભાવિતા ચ, ભિક્ખવે, નિરોધસઞ્ઞા કથં બહુલીકતા મહપ્ફલા હોતિ મહાનિસંસા? ઇધ, ભિક્ખવે, ભિક્ખુ નિરોધસઞ્ઞાસહગતં સતિસમ્બોજ્ઝઙ્ગં ભાવેતિ…પે… નિરોધસઞ્ઞાસહગતં ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. એવં ભાવિતા ખો, ભિક્ખવે, નિરોધસઞ્ઞા એવં બહુલીકતા મહપ્ફલા હોતિ મહાનિસંસાતિ.

‘‘નિરોધસઞ્ઞાય, ભિક્ખવે, ભાવિતાય બહુલીકતાય દ્વિન્નં ફલાનં અઞ્ઞતરં ફલં પાટિકઙ્ખં – દિટ્ઠેવ ધમ્મે અઞ્ઞા, સતિ વા ઉપાદિસેસે અનાગામિતા. કથં ભાવિતાય, ભિક્ખવે, નિરોધસઞ્ઞાય કથં બહુલીકતાય દ્વિન્નં ફલાનં અઞ્ઞતરં ફલં પાટિકઙ્ખં – દિટ્ઠેવ ધમ્મે અઞ્ઞા, સતિ વા ઉપાદિસેસે અનાગામિતા? ઇધ, ભિક્ખવે, ભિક્ખુ નિરોધસઞ્ઞાસહગતં સતિસમ્બોજ્ઝઙ્ગં ભાવેતિ…પે… નિરોધસઞ્ઞાસહગતં ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. એવં ભાવિતાય ખો, ભિક્ખવે, નિરોધસઞ્ઞાય એવં બહુલીકતાય દ્વિન્નં ફલાનં અઞ્ઞતરં ફલં પાટિકઙ્ખં – દિટ્ઠેવ ધમ્મે અઞ્ઞા, સતિ વા ઉપાદિસેસે અનાગામિતા’’તિ.

‘‘નિરોધસઞ્ઞા, ભિક્ખવે, ભાવિતા બહુલીકતા મહતો અત્થાય સંવત્તતિ, મહતો યોગક્ખેમાય સંવત્તતિ, મહતો સંવેગાય સંવત્તતિ, મહતો ફાસુવિહારાય સંવત્તતિ. કથં ભાવિતા ચ, ભિક્ખવે, નિરોધસઞ્ઞા કથં બહુલીકતા મહતો અત્થાય સંવત્તતિ, મહતો યોગક્ખેમાય સંવત્તતિ, મહતો સંવેગાય સંવત્તતિ, મહતો ફાસુવિહારાય સંવત્તતિ? ઇધ, ભિક્ખવે, ભિક્ખુ નિરોધસઞ્ઞાસહગતં સતિસમ્બોજ્ઝઙ્ગં ભાવેતિ…પે… નિરોધસઞ્ઞાસહગતં ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. એવં ભાવિતા ખો, ભિક્ખવે, નિરોધસઞ્ઞા એવં બહુલીકતા મહતો અત્થાય સંવત્તતિ, મહતો યોગક્ખેમાય સંવત્તતિ, મહતો સંવેગાય સંવત્તતિ, મહતો ફાસુવિહારાય સંવત્તતી’’તિ. દસમં.

નિરોધવગ્ગો અટ્ઠમો.

તસ્સુદ્દાનં –

અસુભમરણઆહારે, પટિકૂલઅનભિરતેન [પટિકૂલેન ચ સબ્બલોકે (સ્યા.)];

અનિચ્ચદુક્ખઅનત્તપહાનં, વિરાગનિરોધેન તે દસાતિ.