૭. આનાપાનવગ્ગો

૧. અટ્ઠિકમહપ્ફલસુત્તં

૨૩૮. સાવત્થિનિદાનં. ‘‘અટ્ઠિકસઞ્ઞા, ભિક્ખવે, ભાવિતા બહુલીકતા મહપ્ફલા હોતિ મહાનિસંસા. કથં ભાવિતા ચ, ભિક્ખવે, અટ્ઠિકસઞ્ઞા કથં બહુલીકતા મહપ્ફલા હોતિ મહાનિસંસા? ઇધ, ભિક્ખવે, ભિક્ખુ અટ્ઠિકસઞ્ઞાસહગતં સતિસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં…પે… અટ્ઠિકસઞ્ઞાસહગતં ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. એવં ભાવિતા ખો, ભિક્ખવે, અટ્ઠિકસઞ્ઞા એવં બહુલીકતા મહપ્ફલા હોતિ મહાનિસંસા’’તિ.

અઞ્ઞતરફલસુત્તં

‘‘અટ્ઠિકસઞ્ઞાય, ભિક્ખવે, ભાવિતાય બહુલીકતાય દ્વિન્નં ફલાનં અઞ્ઞતરં ફલં પાટિકઙ્ખં – દિટ્ઠેવ ધમ્મે અઞ્ઞા, સતિ વા ઉપાદિસેસે અનાગામિતા. કથં ભાવિતાય ચ ખો, ભિક્ખવે, અટ્ઠિકસઞ્ઞાય કથં બહુલીકતાય દ્વિન્નં ફલાનં અઞ્ઞતરં ફલં પાટિકઙ્ખં – દિટ્ઠેવ ધમ્મે અઞ્ઞા, સતિ વા ઉપાદિસેસે અનાગામિતા? ઇધ, ભિક્ખવે, ભિક્ખુ અટ્ઠિકસઞ્ઞાસહગતં સતિસમ્બોજ્ઝઙ્ગં ભાવેતિ…પે… અટ્ઠિકસઞ્ઞાસહગતં ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. એવં ભાવિતાય ખો, ભિક્ખવે, અટ્ઠિકસઞ્ઞાય એવં બહુલીકતાય દ્વિન્નં ફલાનં અઞ્ઞતરં ફલં પાટિકઙ્ખં – દિટ્ઠેવ ધમ્મે અઞ્ઞા, સતિ વા ઉપાદિસેસે અનાગામિતા’’તિ.

મહત્થસુત્તં

‘‘અટ્ઠિકસઞ્ઞા, ભિક્ખવે, ભાવિતા બહુલીકતા મહતો અત્થાય સંવત્તતિ. કથં ભાવિતા ચ, ભિક્ખવે, અટ્ઠિકસઞ્ઞા કથં બહુલીકતા મહતો અત્થાય સંવત્તતિ? ઇધ, ભિક્ખવે, ભિક્ખુ અટ્ઠિકસઞ્ઞાસહગતં સતિસમ્બોજ્ઝઙ્ગં ભાવેતિ…પે… અટ્ઠિકસઞ્ઞાસહગતં ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. એવં ભાવિતા ખો, ભિક્ખવે, અટ્ઠિકસઞ્ઞા એવં બહુલીકતા મહતો અત્થાય સંવત્તતી’’તિ.

યોગક્ખેમસુત્તં

‘‘અટ્ઠિકસઞ્ઞા, ભિક્ખવે, ભાવિતા બહુલીકતા મહતો યોગક્ખેમાય સંવત્તતિ. કથં ભાવિતા ચ, ભિક્ખવે, અટ્ઠિકસઞ્ઞા કથં બહુલીકતા મહતો યોગક્ખેમાય સંવત્તતિ? ઇધ, ભિક્ખવે, ભિક્ખુ અટ્ઠિકસઞ્ઞાસહગતં સતિસમ્બોજ્ઝઙ્ગં ભાવેતિ…પે… અટ્ઠિકસઞ્ઞાસહગતં ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. એવં ભાવિતા ખો, ભિક્ખવે, અટ્ઠિકસઞ્ઞા એવં બહુલીકતા મહતો યોગક્ખેમાય સંવત્તતી’’તિ.

સંવેગસુત્તં

‘‘અટ્ઠિકસઞ્ઞા, ભિક્ખવે, ભાવિતા બહુલીકતા મહતો સંવેગાય સંવત્તતિ. કથં ભાવિતા ચ, ભિક્ખવે, અટ્ઠિકસઞ્ઞા કથં બહુલીકતા મહતો સંવેગાય સંવત્તતિ? ઇધ, ભિક્ખવે, ભિક્ખુ અટ્ઠિકસઞ્ઞાસહગતં સતિસમ્બોજ્ઝઙ્ગં ભાવેતિ…પે… અટ્ઠિકસઞ્ઞાસહગતં ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. એવં ભાવિતા ખો, ભિક્ખવે, અટ્ઠિકસઞ્ઞા એવં બહુલીકતા મહતો સંવેગાય સંવત્તતી’’તિ.

ફાસુવિહારસુત્તં

‘‘અટ્ઠિકસઞ્ઞા, ભિક્ખવે, ભાવિતા બહુલીકતા મહતો ફાસુવિહારાય સંવત્તતિ. કથં ભાવિતા ચ, ભિક્ખવે, અટ્ઠિકસઞ્ઞા કથં બહુલીકતા મહતો ફાસુવિહારાય સંવત્તતિ? ઇધ, ભિક્ખવે, ભિક્ખુ અટ્ઠિકસઞ્ઞાસહગતં સતિસમ્બોજ્ઝઙ્ગં ભાવેતિ…પે… અટ્ઠિકસઞ્ઞાસહગતં ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. એવં ભાવિતા ખો, ભિક્ખવે, અટ્ઠિકસઞ્ઞા એવં બહુલીકતા મહતો ફાસુવિહારાય સંવત્તતી’’તિ. પઠમં.

૨. પુળવકસુત્તં

૨૩૯. ‘‘પુળવકસઞ્ઞા [પુળુવકસઞ્ઞા (ક.)], ભિક્ખવે, ભાવિતા…પે… દુતિયં.

૩. વિનીલકસુત્તં

૨૪૦. ‘‘વિનીલકસઞ્ઞા, ભિક્ખવે…પે… તતિયં.

૪. વિચ્છિદ્દકસુત્તં

૨૪૧. ‘‘વિચ્છિદ્દકસઞ્ઞા, ભિક્ખવે…પે… ચતુત્થં.

૫. ઉદ્ધુમાતકસુત્તં

૨૪૨. ‘‘ઉદ્ધુમાતકસઞ્ઞા, ભિક્ખવે…પે… પઞ્ચમં.

૬. મેત્તાસુત્તં

૨૪૩. ‘‘મેત્તા, ભિક્ખવે, ભાવિતા…પે… છટ્ઠં.

૭. કરુણાસુત્તં

૨૪૪. ‘‘કરુણા, ભિક્ખવે, ભાવિતા…પે… સત્તમં.

૮. મુદિતાસુત્તં

૨૪૫. ‘‘મુદિતા, ભિક્ખવે, ભાવિતા…પે… અટ્ઠમં.

૯. ઉપેક્ખાસુત્તં

૨૪૬. ‘‘ઉપેક્ખા, ભિક્ખવે, ભાવિતા…પે… નવમં.

૧૦. આનાપાનસુત્તં

૨૪૭. ‘‘આનાપાનસ્સતિ, ભિક્ખવે, ભાવિતા…પે… દસમં.

આનાપાનવગ્ગો સત્તમો.

તસ્સુદ્દાનં –

અટ્ઠિકપુળવકં વિનીલકં, વિચ્છિદ્દકં ઉદ્ધુમાતેન પઞ્ચમં;

મેત્તા કરુણા મુદિતા ઉપેક્ખા, આનાપાનેન તે દસાતિ.