૧૩. ઓઘવગ્ગો

૧-૮. ઓઘાદિસુત્તં

૩૦૨. ‘‘ચત્તારોમે ભિક્ખવે, ઓઘા. કતમે ચત્તારો? કામોઘો, ભવોઘો, દિટ્ઠોઘો, અવિજ્જોઘોતિ વિત્થારેતબ્બં.

૧૦. ઉદ્ધમ્ભાગિયસુત્તં

૩૧૧. સાવત્થિનિદાનં. ‘‘પઞ્ચિમાનિ, ભિક્ખવે, ઉદ્ધમ્ભાગિયાનિ સંયોજનાનિ. કતમાનિ પઞ્ચ? રૂપરાગો, અરૂપરાગો, માનો, ઉદ્ધચ્ચં, અવિજ્જા – ઇમાનિ ખો, ભિક્ખવે, પઞ્ચુદ્ધમ્ભાગિયાનિ સંયોજનાનિ. ઇમેસં ખો, ભિક્ખવે, પઞ્ચન્નં ઉદ્ધમ્ભાગિયાનં સંયોજનાનં અભિઞ્ઞાય પરિઞ્ઞાય પરિક્ખયાય પહાનાય સત્ત બોજ્ઝઙ્ગા ભાવેતબ્બા. કતમે સત્ત? ઇધ, ભિક્ખવે, ભિક્ખુ સતિસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં…પે… ઉપેક્ખાસમ્બોજ્ઝઙ્ગં ભાવેતિ રાગવિનયપરિયોસાનં દોસવિનયપરિયોસાનં મોહવિનયપરિયોસાનં… અમતોગધં અમતપરાયનં અમતપરિયોસાનં… નિબ્બાનનિન્નં નિબ્બાનપોણં નિબ્બાનપબ્ભારં. ઇમેસં ખો, ભિક્ખવે, ભિક્ખુ પઞ્ચન્નં ઉદ્ધમ્ભાગિયાનં સંયોજનાનં અભિઞ્ઞાય પરિઞ્ઞાય પરિક્ખયાય પહાનાય ઇમે સત્ત બોજ્ઝઙ્ગા ભાવેતબ્બા’’તિ. દસમં.

ઓઘવગ્ગો તેરસમો.

તસ્સુદ્દાનં –

ઓઘો યોગો ઉપાદાનં, ગન્થા અનુસયેન ચ;

કામગુણા નીવરણા, ખન્ધા ઓરુદ્ધમ્ભાગિયાનીતિ.