૭. પઠમઆમકધઞ્ઞપેય્યાલવગ્ગો

૧. અઞ્ઞત્રસુત્તં

૧૧૩૧. અથ ખો ભગવા પરિત્તં નખસિખાયં પંસું આરોપેત્વા ભિક્ખૂ આમન્તેસિ – ‘‘તં કિં મઞ્ઞથ, ભિક્ખવે, કતમં નુ ખો બહુતરં – યો વાયં મયા પરિત્તો નખસિખાયં પંસુ આરોપિતો, અયં વા મહાપથવી’’તિ? ‘‘એતદેવ, ભન્તે, બહુતરં, યદિદં – મહાપથવી; અપ્પમત્તકાયં ભગવતા પરિત્તો નખસિખાયં પંસુ આરોપિતો. સઙ્ખમ્પિ ન ઉપેતિ, ઉપનિધમ્પિ ન ઉપેતિ, કલભાગમ્પિ ન ઉપેતિ મહાપથવિં ઉપનિધાય ભગવતા પરિત્તો નખસિખાયં પંસુ આરોપિતો’’તિ.

‘‘એવમેવ ખો, ભિક્ખવે, અપ્પમત્તકા તે સત્તા યે મનુસ્સેસુ પચ્ચાજાયન્તિ; અથ ખો એતેવ બહુતરા સત્તા યે અઞ્ઞત્ર મનુસ્સેહિ [મનુસ્સેસુ (પી. ક.)] પચ્ચાજાયન્તિ. તં કિસ્સ હેતુ? અદિટ્ઠત્તા, ભિક્ખવે, ચતુન્નં અરિયસચ્ચાનં. કતમેસં ચતુન્નં? દુક્ખસ્સ અરિયસચ્ચસ્સ…પે… દુક્ખનિરોધગામિનિયા પટિપદાય અરિયસચ્ચસ્સ’’.

‘‘તસ્માતિહ, ભિક્ખવે, ‘ઇદં દુક્ખ’ન્તિ યોગો કરણીયો…પે… ‘અયં દુક્ખનિરોધગામિની પટિપદા’તિ યોગો કરણીયો’’તિ. પઠમં.

૨. પચ્ચન્તસુત્તં

૧૧૩૨. અથ ખો ભગવા પરિત્તં નખસિખાયં પંસું આરોપેત્વા ભિક્ખૂ આમન્તેસિ – ‘‘તં કિં મઞ્ઞથ, ભિક્ખવે, કતમં નુ ખો બહુતરં – યો વાયં મયા પરિત્તો નખસિખાયં પંસુ આરોપિતો, અયં વા મહાપથવી’’તિ? ‘‘એતદેવ, ભન્તે, બહુતરં, યદિદં – મહાપથવી; અપ્પમત્તકાયં ભગવતા પરિત્તો નખસિખાયં પંસુ આરોપિતો. સઙ્ખમ્પિ ન ઉપેતિ, ઉપનિધમ્પિ ન ઉપેતિ, કલભાગમ્પિ ન ઉપેતિ મહાપથવિં ઉપનિધાય ભગવતા પરિત્તો નખસિખાયં પંસુ આરોપિતો’’તિ.

‘‘એવમેવ ખો, ભિક્ખવે, અપ્પમત્તકા તે સત્તા યે મજ્ઝિમેસુ જનપદેસુ પચ્ચાજાયન્તિ; અથ ખો એતેવ બહુતરા સત્તા યે પચ્ચન્તિમેસુ જનપદેસુ પચ્ચાજાયન્તિ અવિઞ્ઞાતારેસુ મિલક્ખેસુ [મિલક્ખૂસુ (સ્યા. કં. ક.)] …પે…. દુતિયં.

૩. પઞ્ઞાસુત્તં

૧૧૩૩. … ‘‘એવમેવ ખો, ભિક્ખવે, અપ્પકા તે સત્તા યે પન અરિયેન પઞ્ઞાચક્ખુના સમન્નાગતા; અથ ખો એતેવ બહુતરા સત્તા યે અવિજ્જાગતા સમ્મુળ્હા…પે…. તતિયં.

૪. સુરામેરયસુત્તં

૧૧૩૪. … ‘‘એવમેવ ખો, ભિક્ખવે, અપ્પકા તે સત્તા યે સુરામેરયમજ્જપ્પમાદટ્ઠાના પટિવિરતા; અથ ખો એતેવ બહુતરા સત્તા યે સુરામેરયમજ્જપ્પમાદટ્ઠાના અપટિવિરતા…પે…. ચતુત્થં.

૫. ઓદકસુત્તં

૧૧૩૫. … ‘‘એવમેવ ખો, ભિક્ખવે, અપ્પકા તે સત્તા યે થલજા; અથ ખો એતેવ બહુતરા સત્તા યે ઉદકજા. તં કિસ્સ હેતુ…પે…. પઞ્ચમં.

૬. મત્તેય્યસુત્તં

૧૧૩૬. … ‘‘એવમેવ ખો, ભિક્ખવે, અપ્પકા તે સત્તા યે મત્તેય્યા; અથ ખો એતેવ બહુતરા સત્તા યે અમત્તેય્યા…પે…. છટ્ઠં.

૭. પેત્તેય્યસુત્તં

૧૧૩૭. … ‘‘એવમેવ ખો, ભિક્ખવે, અપ્પકા તે સત્તા યે પેત્તેય્યા; અથ ખો એતેવ બહુતરા સત્તા યે અપેત્તેય્યા…પે…. સત્તમં.

૮. સામઞ્ઞસુત્તં

૧૧૩૮. … ‘‘એવમેવ ખો, ભિક્ખવે, અપ્પકા તે સત્તા યે સામઞ્ઞા; અથ ખો એતેવ બહુતરા સત્તા યે અસામઞ્ઞા…પે…. અટ્ઠમં.

૯. બ્રહ્મઞ્ઞસુત્તં

૧૧૩૯. … ‘‘એવમેવ ખો, ભિક્ખવે, અપ્પકા તે સત્તા યે બ્રહ્મઞ્ઞા; અથ ખો એતેવ બહુતરા સત્તા યે અબ્રહ્મઞ્ઞા…પે…. નવમં.

૧૦. પચાયિકસુત્તં

૧૧૪૦. … ‘‘એવમેવ ખો, ભિક્ખવે, અપ્પકા તે સત્તા યે કુલે જેટ્ઠાપચાયિનો; અથ ખો એતેવ બહુતરા સત્તા યે કુલે અજેટ્ઠાપચાયિનોતિ [અકુલે જેટ્ઠાપચાયિનોતિ (સ્યા. કં.)] …પે…. દસમં.

પઠમઆમકધઞ્ઞપેય્યાલવગ્ગો સત્તમો.

તસ્સુદ્દાનં –

અઞ્ઞત્ર પચ્ચન્તં પઞ્ઞા, સુરામેરયઓદકા;

મત્તેય્ય પેત્તેય્યા ચાપિ, સામઞ્ઞં બ્રહ્મપચાયિકન્તિ.