૪. પટિપત્તિવગ્ગો

૧. પઠમપટિપત્તિસુત્તં

૩૧. સાવત્થિનિદાનં. ‘‘મિચ્છાપટિપત્તિઞ્ચ વો, ભિક્ખવે, દેસેસ્સામિ, સમ્માપટિપત્તિઞ્ચ. તં સુણાથ. કતમા ચ, ભિક્ખવે, મિચ્છાપટિપત્તિ? સેય્યથિદં – મિચ્છાદિટ્ઠિ…પે… મિચ્છાસમાધિ. અયં વુચ્ચતિ, ભિક્ખવે, મિચ્છાપટિપત્તિ. કતમા ચ, ભિક્ખવે, સમ્માપટિપત્તિ? સેય્યથિદં – સમ્માદિટ્ઠિ…પે… સમ્માસમાધિ. અયં વુચ્ચતિ, ભિક્ખવે, સમ્માપટિપત્તી’’તિ. પઠમં.

૨. દુતિયપટિપત્તિસુત્તં

૩૨. સાવત્થિનિદાનં. ‘‘મિચ્છાપટિપન્નઞ્ચ વો, ભિક્ખવે, દેસેસ્સામિ, સમ્માપટિપન્નઞ્ચ. તં સુણાથ. કતમો ચ, ભિક્ખવે, મિચ્છાપટિપન્નો? ઇધ, ભિક્ખવે, એકચ્ચો મિચ્છાદિટ્ઠિકો હોતિ…પે… મિચ્છાસમાધિ – અયં વુચ્ચતિ, ભિક્ખવે, મિચ્છાપટિપન્નો. કતમો ચ, ભિક્ખવે, સમ્માપટિપન્નો? ઇધ, ભિક્ખવે, એકચ્ચો સમ્માદિટ્ઠિકો હોતિ…પે… સમ્માસમાધિ – અયં વુચ્ચતિ, ભિક્ખવે, સમ્માપટિપન્નો’’તિ. દુતિયં.

૩. વિરદ્ધસુત્તં

૩૩. સાવત્થિનિદાનં. ‘‘યેસં કેસઞ્ચિ, ભિક્ખવે, અરિયો અટ્ઠઙ્ગિકો મગ્ગો વિરદ્ધો, વિરદ્ધો તેસં અરિયો અટ્ઠઙ્ગિકો મગ્ગો સમ્મા દુક્ખક્ખયગામી. યેસં કેસઞ્ચિ, ભિક્ખવે, અરિયો અટ્ઠઙ્ગિકો મગ્ગો આરદ્ધો, આરદ્ધો તેસં અરિયો અટ્ઠઙ્ગિકો મગ્ગો સમ્મા દુક્ખક્ખયગામી. કતમો ચ, ભિક્ખવે, અરિયો અટ્ઠઙ્ગિકો મગ્ગો? સેય્યથિદં – સમ્માદિટ્ઠિ…પે… સમ્માસમાધિ. યેસં કેસઞ્ચિ, ભિક્ખવે, અયં અરિયો અટ્ઠઙ્ગિકો મગ્ગો વિરદ્ધો, વિરદ્ધો તેસં અરિયો અટ્ઠઙ્ગિકો મગ્ગો સમ્મા દુક્ખક્ખયગામી. યેસં કેસઞ્ચિ, ભિક્ખવે, અયં અરિયો અટ્ઠઙ્ગિકો મગ્ગો આરદ્ધો, આરદ્ધો તેસં અરિયો અટ્ઠઙ્ગિકો મગ્ગો સમ્મા દુક્ખક્ખયગામી’’તિ. તતિયં.

૪. પારઙ્ગમસુત્તં

૩૪. સાવત્થિનિદાનં. ‘‘અટ્ઠિમે, ભિક્ખવે, ધમ્મા ભાવિતા બહુલીકતા અપારા પારં ગમનાય સંવત્તન્તિ. કતમે અટ્ઠ? સેય્યથિદં – સમ્માદિટ્ઠિ…પે… સમ્માસમાધિ. ઇમે ખો, ભિક્ખવે, અટ્ઠ ધમ્મા ભાવિતા બહુલીકતા અપારા પારં ગમનાય સંવત્તન્તી’’તિ.

ઇદમવોચ ભગવા. ઇદં વત્વાન સુગતો અથાપરં એતદવોચ સત્થા –

‘‘અપ્પકા તે મનુસ્સેસુ, યે જના પારગામિનો;

અથાયં ઇતરા પજા, તીરમેવાનુધાવતિ.

‘‘યે ચ ખો સમ્મદક્ખાતે, ધમ્મે ધમ્માનુવત્તિનો;

તે જના પારમેસ્સન્તિ, મચ્ચુધેય્યં સુદુત્તરં.

‘‘કણ્હં ધમ્મં વિપ્પહાય, સુક્કં ભાવેથ પણ્ડિતો;

ઓકા અનોકમાગમ્મ, વિવેકે યત્થ દૂરમં.

‘‘તત્રાભિરતિમિચ્છેય્ય, હિત્વા કામે અકિઞ્ચનો;

પરિયોદપેય્ય અત્તાનં, ચિત્તક્લેસેહિ પણ્ડિતો.

‘‘યેસં સમ્બોધિયઙ્ગેસુ, સમ્મા ચિત્તં સુભાવિતં;

આદાનપટિનિસ્સગ્ગે, અનુપાદાય યે રતા;

ખીણાસવા જુતિમન્તો, તે લોકે પરિનિબ્બુતા’’તિ. ચતુત્થં;

૫. પઠમસામઞ્ઞસુત્તં

૩૫. સાવત્થિનિદાનં. ‘‘સામઞ્ઞઞ્ચ વો, ભિક્ખવે, દેસેસ્સામિ, સામઞ્ઞફલાનિ ચ. તં સુણાથ. કતમઞ્ચ, ભિક્ખવે, સામઞ્ઞં? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ…પે… સમ્માસમાધિ. ઇદં વુચ્ચતિ, ભિક્ખવે, સામઞ્ઞં. કતમાનિ ચ, ભિક્ખવે, સામઞ્ઞફલાનિ? સોતાપત્તિફલં, સકદાગામિફલં, અનાગામિફલં, અરહત્તફલં – ઇમાનિ વુચ્ચન્તિ, ભિક્ખવે, સામઞ્ઞફલાની’’તિ. પઞ્ચમં.

૬. દુતિયસામઞ્ઞસુત્તં

૩૬. સાવત્થિનિદાનં. ‘‘સામઞ્ઞઞ્ચ વો, ભિક્ખવે, દેસેસ્સામિ, સામઞ્ઞત્થઞ્ચ. તં સુણાથ. કતમઞ્ચ ખો, ભિક્ખવે, સામઞ્ઞં? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ…પે… સમ્માસમાધિ. ઇદં વુચ્ચતિ, ભિક્ખવે, સામઞ્ઞં. કતમો ચ, ભિક્ખવે, સામઞ્ઞત્થો? યો ખો, ભિક્ખવે, રાગક્ખયો દોસક્ખયો મોહક્ખયો – અયં વુચ્ચતિ, ભિક્ખવે, સામઞ્ઞત્થો’’તિ. છટ્ઠં.

૭. પઠમબ્રહ્મઞ્ઞસુત્તં

૩૭. સાવત્થિનિદાનં. ‘‘બ્રહ્મઞ્ઞઞ્ચ વો, ભિક્ખવે, દેસેસ્સામિ, બ્રહ્મઞ્ઞફલાનિ ચ. તં સુણાથ. કતમઞ્ચ ખો, ભિક્ખવે, બ્રહ્મઞ્ઞં? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ…પે… સમ્માસમાધિ. ઇદં વુચ્ચતિ, ભિક્ખવે, બ્રહ્મઞ્ઞં. કતમાનિ ચ, ભિક્ખવે, બ્રહ્મઞ્ઞફલાનિ? સોતાપત્તિફલં, સકદાગામિફલં, અનાગામિફલં, અરહત્તફલં – ઇમાનિ વુચ્ચન્તિ, ભિક્ખવે, બ્રહ્મઞ્ઞફલાની’’તિ. સત્તમં.

૮. દુતિયબ્રહ્મઞ્ઞસુત્તં

૩૮. સાવત્થિનિદાનં. ‘‘બ્રહ્મઞ્ઞઞ્ચ વો, ભિક્ખવે, દેસેસ્સામિ, બ્રહ્મઞ્ઞત્થઞ્ચ. તં સુણાથ. કતમઞ્ચ, ભિક્ખવે, બ્રહ્મઞ્ઞં? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ…પે… સમ્માસમાધિ. ઇદં વુચ્ચતિ, ભિક્ખવે, બ્રહ્મઞ્ઞં. કતમો ચ, ભિક્ખવે, બ્રહ્મઞ્ઞત્થો? યો ખો, ભિક્ખવે, રાગક્ખયો દોસક્ખયો મોહક્ખયો – અયં વુચ્ચતિ, ભિક્ખવે, બ્રહ્મઞ્ઞત્થો’’તિ. અટ્ઠમં.

૯. પઠમબ્રહ્મચરિયસુત્તં

૩૯. સાવત્થિનિદાનં. ‘‘બ્રહ્મચરિયઞ્ચ વો, ભિક્ખવે, દેસેસ્સામિ, બ્રહ્મચરિયફલાનિ ચ. તં સુણાથ. કતમઞ્ચ, ભિક્ખવે, બ્રહ્મચરિયં? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ…પે… સમ્માસમાધિ. ઇદં વુચ્ચતિ, ભિક્ખવે, બ્રહ્મચરિયં. કતમાનિ ચ, ભિક્ખવે, બ્રહ્મચરિયફલાનિ? સોતાપત્તિફલં, સકદાગામિફલં, અનાગામિફલં, અરહત્તફલં – ઇમાનિ વુચ્ચન્તિ, ભિક્ખવે, બ્રહ્મચરિયફલાની’’તિ. નવમં.

૧૦. દુતિયબ્રહ્મચરિયસુત્તં

૪૦. સાવત્થિનિદાનં. ‘‘બ્રહ્મચરિયઞ્ચ વો, ભિક્ખવે, દેસેસ્સામિ, બ્રહ્મચરિયત્થઞ્ચ. તં સુણાથ. કતમઞ્ચ, ભિક્ખવે, બ્રહ્મચરિયં? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ…પે… સમ્માસમાધિ. ઇદં વુચ્ચતિ, ભિક્ખવે, બ્રહ્મચરિયં. કતમો ચ, ભિક્ખવે, બ્રહ્મચરિયત્થો? યો ખો, ભિક્ખવે, રાગક્ખયો દોસક્ખયો મોહક્ખયો – અયં વુચ્ચતિ, ભિક્ખવે, બ્રહ્મચરિયત્થો’’તિ. દસમં.

પટિપત્તિવગ્ગો ચતુત્થો.

તસ્સુદ્દાનં –

પટિપત્તિ પટિપન્નો ચ, વિરદ્ધઞ્ચ પારંગમા;

સામઞ્ઞેન ચ દ્વે વુત્તા, બ્રહ્મઞ્ઞા અપરે દુવે;

બ્રહ્મચરિયેન દ્વે વુત્તા, વગ્ગો તેન પવુચ્ચતીતિ.