૫. અઞ્ઞતિત્થિયપેય્યાલવગ્ગો

૧. રાગવિરાગસુત્તં

૪૧. સાવત્થિનિદાનં. ‘‘સચે વો, ભિક્ખવે, અઞ્ઞતિત્થિયા પરિબ્બાજકા એવં પુચ્છેય્યું – ‘કિમત્થિયં, આવુસો, સમણે ગોતમે બ્રહ્મચરિયં વુસ્સતી’તિ, એવં પુટ્ઠા તુમ્હે, ભિક્ખવે, તેસં અઞ્ઞતિત્થિયાનં પરિબ્બાજકાનં એવં બ્યાકરેય્યાથ – ‘રાગવિરાગત્થં ખો, આવુસો, ભગવતિ બ્રહ્મચરિયં વુસ્સતી’તિ. સચે પન વો, ભિક્ખવે, અઞ્ઞતિત્થિયા પરિબ્બાજકા એવં પુચ્છેય્યું – ‘અત્થિ પનાવુસો, મગ્ગો, અત્થિ પટિપદા રાગવિરાગાયા’તિ, એવં પુટ્ઠા તુમ્હે, ભિક્ખવે, તેસં અઞ્ઞતિત્થિયાનં પરિબ્બાજકાનં એવં બ્યાકરેય્યાથ – ‘અત્થિ ખો, આવુસો, મગ્ગો, અત્થિ પટિપદા રાગવિરાગાયા’તિ. કતમો ચ, ભિક્ખવે, મગ્ગો, કતમા ચ પટિપદા રાગવિરાગાય? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ…પે… સમ્માસમાધિ. અયં, ભિક્ખવે, મગ્ગો, અયં પટિપદા રાગવિરાગાયાતિ. એવં પુટ્ઠા તુમ્હે, ભિક્ખવે, તેસં અઞ્ઞતિત્થિયાનં પરિબ્બાજકાનં એવં બ્યાકરેય્યાથા’’તિ. પઠમં.

૨-૭. સંયોજનપ્પહાનાદિસુત્તછક્કં

૪૨-૪૭. ‘‘સચે વો, ભિક્ખવે, અઞ્ઞતિત્થિયા પરિબ્બાજકા એવં પુચ્છેય્યું – ‘કિમત્થિયં, આવુસો, સમણે ગોતમે બ્રહ્મચરિયં વુસ્સતી’તિ, એવં પુટ્ઠા તુમ્હે, ભિક્ખવે, તેસં અઞ્ઞતિત્થિયાનં પરિબ્બાજકાનં એવં બ્યાકરેય્યાથ – ‘સંયોજનપ્પહાનત્થં ખો, આવુસો, ભગવતિ બ્રહ્મચરિયં વુસ્સતી’તિ…પે… ‘અનુસયસમુગ્ઘાતનત્થં ખો, આવુસો, ભગવતિ બ્રહ્મચરિયં વુસ્સતી’તિ…પે… ‘અદ્ધાનપરિઞ્ઞત્થં ખો, આવુસો, ભગવતિ બ્રહ્મચરિયં વુસ્સતી’તિ…પે… ‘આસવાનં ખયત્થં ખો, આવુસો, ભગવતિ બ્રહ્મચરિયં વુસ્સતી’તિ…પે… ‘વિજ્જાવિમુત્તિફલસચ્છિકિરિયત્થં ખો, આવુસો, ભગવતિ બ્રહ્મચરિયં વુસ્સતી’તિ…પે… ‘ઞાણદસ્સનત્થં ખો, આવુસો, ભગવતિ બ્રહ્મચરિયં વુસ્સતી’તિ…પે…. સત્તમં.

૮. અનુપાદાપરિનિબ્બાનસુત્તં

૪૮. સાવત્થિનિદાનં. ‘‘સચે વો, ભિક્ખવે, અઞ્ઞતિત્થિયા પરિબ્બાજકા એવં પુચ્છેય્યું – ‘કિમત્થિયં, આવુસો, સમણે ગોતમે બ્રહ્મચરિયં વુસ્સતી’તિ, એવં પુટ્ઠા તુમ્હે, ભિક્ખવે, તેસં અઞ્ઞતિત્થિયાનં પરિબ્બાજકાનં એવં બ્યાકરેય્યાથ – ‘અનુપાદાપરિનિબ્બાનત્થં ખો, આવુસો, ભગવતિ બ્રહ્મચરિયં વુસ્સતી’તિ. સચે પન વો, ભિક્ખવે, અઞ્ઞતિત્થિયા પરિબ્બાજકા એવં પુચ્છેય્યું – ‘અત્થિ પનાવુસો, મગ્ગો, અત્થિ પટિપદા અનુપાદાપરિનિબ્બાનાયા’તિ, એવં પુટ્ઠા તુમ્હે, ભિક્ખવે, તેસં અઞ્ઞતિત્થિયાનં પરિબ્બાજકાનં એવં બ્યાકરેય્યાથ – ‘અત્થિ ખો, આવુસો, મગ્ગો, અત્થિ પટિપદા અનુપાદાપરિનિબ્બાનાયા’તિ. કતમો ચ, ભિક્ખવે, મગ્ગો, કતમા ચ પટિપદા અનુપાદાપરિનિબ્બાનાય? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ…પે… સમ્માસમાધિ. અયં, ભિક્ખવે, મગ્ગો, અયં પટિપદા અનુપાદાપરિનિબ્બાનાયાતિ. એવં પુટ્ઠા તુમ્હે, ભિક્ખવે, તેસં અઞ્ઞતિત્થિયાનં પરિબ્બાજકાનં એવં બ્યાકરેય્યાથા’’તિ. અટ્ઠમં.

અઞ્ઞતિત્થિયપેય્યાલવગ્ગો પઞ્ચમો.

તસ્સુદ્દાનં –

વિરાગસંયોજનં અનુસયં, અદ્ધાનં આસવા ખયા;

વિજ્જાવિમુત્તિઞાણઞ્ચ, અનુપાદાય અટ્ઠમી.