૧૦. ઉત્તિયસુત્તં

૩૦. સાવત્થિનિદાનં. અથ ખો આયસ્મા ઉત્તિયો યેન ભગવા તેનુપસઙ્કમિ…પે… એકમન્તં નિસિન્નો ખો આયસ્મા ઉત્તિયો ભગવન્તં એતદવોચ – ‘‘ઇધ મય્હં, ભન્તે, રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદિ – ‘પઞ્ચ કામગુણા વુત્તા ભગવતા. કતમે નુ ખો પઞ્ચ કામગુણા વુત્તા ભગવતા’’’તિ? ‘‘સાધુ સાધુ, ઉત્તિય! પઞ્ચિમે ખો, ઉત્તિય, કામગુણા વુત્તા મયા. કતમે પઞ્ચ? ચક્ખુવિઞ્ઞેય્યા રૂપા ઇટ્ઠા કન્તા મનાપા પિયરૂપા કામૂપસંહિતા રજનીયા, સોતવિઞ્ઞેય્યા સદ્દા…પે… ઘાનવિઞ્ઞેય્યા ગન્ધા… જિવ્હાવિઞ્ઞેય્યા રસા… કાયવિઞ્ઞેય્યા ફોટ્ઠબ્બા ઇટ્ઠા કન્તા મનાપા પિયરૂપા કામૂપસંહિતા રજનીયા – ઇમે ખો, ઉત્તિય, પઞ્ચ કામગુણા વુત્તા મયા. ઇમેસં ખો, ઉત્તિય, પઞ્ચન્નં કામગુણાનં પહાનાય અરિયો અટ્ઠઙ્ગિકો મગ્ગો ભાવેતબ્બો. કતમો અરિયો અટ્ઠઙ્ગિકો મગ્ગો? સેય્યથિદં – સમ્માદિટ્ઠિ…પે… સમ્માસમાધિ. ઇમેસં ખો, ઉત્તિય, પઞ્ચન્નં કામગુણાનં પહાનાય અયં અરિયો અટ્ઠઙ્ગિકો મગ્ગો ભાવેતબ્બો’’તિ. દસમં.

મિચ્છત્તવગ્ગો તતિયો.

તસ્સુદ્દાનં –

મિચ્છત્તં અકુસલં ધમ્મં, દુવે પટિપદાપિ ચ;

અસપ્પુરિસેન દ્વે કુમ્ભો, સમાધિ વેદનુત્તિયેનાતિ.