૮. ઓઘવગ્ગો

૧. ઓઘસુત્તં

૧૭૨. સાવત્થિનિદાનં. ‘‘ચત્તારોમે, ભિક્ખવે, ઓઘા. કતમે ચત્તારો? કામોઘો, ભવોઘો, દિટ્ઠોઘો, અવિજ્જોઘો – ઇમે ખો, ભિક્ખવે, ચત્તારો ઓઘા. ઇમેસં ખો, ભિક્ખવે, ચતુન્નં ઓઘાનં અભિઞ્ઞાય પરિઞ્ઞાય પરિક્ખયાય પહાનાય…પે… અયં અરિયો અટ્ઠઙ્ગિકો મગ્ગો ભાવેતબ્બો’’તિ. (યથા એસના, એવં સબ્બં વિત્થારેતબ્બં.) પઠમં.

૨. યોગસુત્તં

૧૭૩. ‘‘ચત્તારોમે, ભિક્ખવે, યોગા. કતમે ચત્તારો? કામયોગો, ભવયોગો, દિટ્ઠિયોગો અવિજ્જાયોગો – ઇમે ખો, ભિક્ખવે, ચત્તારો યોગા. ઇમેસં ખો, ભિક્ખવે, ચતુન્નં યોગાનં અભિઞ્ઞાય પરિઞ્ઞાય પરિક્ખયાય પહાનાય…પે… અયં અરિયો અટ્ઠઙ્ગિકો મગ્ગો ભાવેતબ્બો’’તિ. દુતિયં.

૩. ઉપાદાનસુત્તં

૧૭૪. ‘‘ચત્તારિમાનિ, ભિક્ખવે, ઉપાદાનાનિ. કતમાનિ ચત્તારિ? કામુપાદાનં, દિટ્ઠુપાદાનં, સીલબ્બતુપાદાનં, અત્તવાદુપાદાનં – ઇમાનિ ખો, ભિક્ખવે, ચત્તારિ ઉપાદાનાનિ. ઇમેસં ખો, ભિક્ખવે, ચતુન્નં ઉપાદાનાનં અભિઞ્ઞાય પરિઞ્ઞાય પરિક્ખયાય પહાનાય…પે… અયં અરિયો અટ્ઠઙ્ગિકો મગ્ગો ભાવેતબ્બો’’તિ. તતિયં.

૪. ગન્થસુત્તં

૧૭૫. ‘‘ચત્તારોમે, ભિક્ખવે, ગન્થા. કતમે ચત્તારો? અભિજ્ઝા કાયગન્થો, બ્યાપાદો કાયગન્થો, સીલબ્બતપરામાસો કાયગન્થો, ઇદંસચ્ચાભિનિવેસો કાયગન્થો – ઇમે ખો, ભિક્ખવે, ચત્તારો ગન્થા. ઇમેસં ખો, ભિક્ખવે, ચતુન્નં ગન્થાનં અભિઞ્ઞાય પરિઞ્ઞાય પરિક્ખયાય પહાનાય…પે… અયં અરિયો અટ્ઠઙ્ગિકો મગ્ગો ભાવેતબ્બો’’તિ. ચતુત્થં.

૫. અનુસયસુત્તં

૧૭૬. ‘‘સત્તિમે, ભિક્ખવે, અનુસયા. કતમે સત્ત? કામરાગાનુસયો, પટિઘાનુસયો, દિટ્ઠાનુસયો, વિચિકિચ્છાનુસયો, માનાનુસયો, ભવરાગાનુસયો, અવિજ્જાનુસયો – ઇમે ખો, ભિક્ખવે, સત્તાનુસયા. ઇમેસં ખો, ભિક્ખવે, સત્તન્નં અનુસયાનં અભિઞ્ઞાય પરિઞ્ઞાય પરિક્ખયાય પહાનાય…પે… અયં અરિયો અટ્ઠઙ્ગિકો મગ્ગો ભાવેતબ્બો’’તિ. પઞ્ચમં.

૬. કામગુણસુત્તં

૧૭૭. ‘‘પઞ્ચિમે, ભિક્ખવે, કામગુણા. કતમે પઞ્ચ? ચક્ખુવિઞ્ઞેય્યા રૂપા ઇટ્ઠા કન્તા મનાપા પિયરૂપા કામૂપસંહિતા રજનીયા, સોતવિઞ્ઞેય્યા સદ્દા…પે… ઘાનવિઞ્ઞેય્યા ગન્ધા…પે… જિવ્હાવિઞ્ઞેય્યા રસા…પે… કાયવિઞ્ઞેય્યા ફોટ્ઠબ્બા ઇટ્ઠા કન્તા મનાપા પિયરૂપા કામૂપસંહિતા રજનીયા – ઇમે ખો, ભિક્ખવે, પઞ્ચ કામગુણા. ઇમેસં ખો, ભિક્ખવે, પઞ્ચન્નં કામગુણાનં અભિઞ્ઞાય પરિઞ્ઞાય પરિક્ખયાય પહાનાય…પે… અયં અરિયો અટ્ઠઙ્ગિકો મગ્ગો ભાવેતબ્બો’’તિ. છટ્ઠં.

૭. નીવરણસુત્તં

૧૭૮. ‘‘પઞ્ચિમાનિ, ભિક્ખવે, નીવરણાનિ. કતમાનિ પઞ્ચ? કામચ્છન્દનીવરણં, બ્યાપાદનીવરણં, થિનમિદ્ધનીવરણં, ઉદ્ધચ્ચકુક્કુચ્ચનીવરણં, વિચિકિચ્છાનીવરણં – ઇમાનિ ખો, ભિક્ખવે, પઞ્ચ નીવરણાનિ. ઇમેસં ખો, ભિક્ખવે, પઞ્ચન્નં નીવરણાનં અભિઞ્ઞાય પરિઞ્ઞાય પરિક્ખયાય પહાનાય…પે… અયં અરિયો અટ્ઠઙ્ગિકો મગ્ગો ભાવેતબ્બો’’તિ. સત્તમં.

૮. ઉપાદાનક્ખન્ધસુત્તં

૧૭૯. ‘‘પઞ્ચિમે, ભિક્ખવે, ઉપાદાનક્ખન્ધા. કતમે પઞ્ચ? સેય્યથિદં – રૂપુપાદાનક્ખન્ધો, વેદનુપાદાનક્ખન્ધો, સઞ્ઞુપાદાનક્ખન્ધો, સઙ્ખારુપાદાનક્ખન્ધો, વિઞ્ઞાણુપાદાનક્ખન્ધો. ઇમે ખો, ભિક્ખવે, પઞ્ચુપાદાનક્ખન્ધા. ઇમેસં ખો, ભિક્ખવે, પઞ્ચન્નં ઉપાદાનક્ખન્ધાનં અભિઞ્ઞાય પરિઞ્ઞાય પરિક્ખયાય પહાનાય…પે… અયં અરિયો અટ્ઠઙ્ગિકો મગ્ગો ભાવેતબ્બો’’તિ. અટ્ઠમં.

૯. ઓરમ્ભાગિયસુત્તં

૧૮૦. ‘‘પઞ્ચિમાનિ, ભિક્ખવે, ઓરમ્ભાગિયાનિ સંયોજનાનિ. કતમાનિ પઞ્ચ? સક્કાયદિટ્ઠિ, વિચિકિચ્છા, સીલબ્બતપરામાસો, કામચ્છન્દો, બ્યાપાદો – ઇમાનિ ખો, ભિક્ખવે, પઞ્ચોરમ્ભાગિયાનિ સંયોજનાનિ. ઇમેસં ખો ભિક્ખવે, પઞ્ચન્નં ઓરમ્ભાગિયાનં સંયોજનાનં અભિઞ્ઞાય પરિઞ્ઞાય પરિક્ખયાય પહાનાય…પે… અયં અરિયો અટ્ઠઙ્ગિકો મગ્ગો ભાવેતબ્બો’’તિ. નવમં.

૧૦. ઉદ્ધમ્ભાગિયસુત્તં

૧૮૧. ‘‘પઞ્ચિમાનિ, ભિક્ખવે, ઉદ્ધમ્ભાગિયાનિ સંયોજનાનિ. કતમાનિ પઞ્ચ? રૂપરાગો, અરૂપરાગો, માનો, ઉદ્ધચ્ચં, અવિજ્જા – ઇમાનિ ખો, ભિક્ખવે, પઞ્ચુદ્ધમ્ભાગિયાનિ સંયોજનાનિ. ઇમેસં ખો, ભિક્ખવે, પઞ્ચન્નં ઉદ્ધમ્ભાગિયાનં સંયોજનાનં અભિઞ્ઞાય પરિઞ્ઞાય પરિક્ખયાય પહાનાય અરિયો અટ્ઠઙ્ગિકો મગ્ગો ભાવેતબ્બો. કતમો અરિયો અટ્ઠઙ્ગિકો મગ્ગો? ઇધ, ભિક્ખવે, ભિક્ખુ સમ્માદિટ્ઠિં ભાવેતિ વિવેકનિસ્સિતં…પે… સમ્માસમાધિં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં. ઇમેસં ખો, ભિક્ખવે, પઞ્ચન્નં ઉદ્ધમ્ભાગિયાનં સંયોજનાનં અભિઞ્ઞાય પરિઞ્ઞાય પરિક્ખયાય પહાનાય અયં અરિયો અટ્ઠઙ્ગિકો મગ્ગો ભાવેતબ્બો’’તિ.

‘‘પઞ્ચિમાનિ, ભિક્ખવે, ઉદ્ધમ્ભાગિયાનિ સંયોજનાનિ. કતમાનિ પઞ્ચ? રૂપરાગો, અરૂપરાગો, માનો, ઉદ્ધચ્ચં, અવિજ્જા – ઇમાનિ ખો, ભિક્ખવે, પઞ્ચુદ્ધમ્ભાગિયાનિ સંયોજનાનિ. ઇમેસં ખો, ભિક્ખવે, પઞ્ચન્નં ઉદ્ધમ્ભાગિયાનં સંયોજનાનં અભિઞ્ઞાય પરિઞ્ઞાય પરિક્ખયાય પહાનાય અરિયો અટ્ઠઙ્ગિકો મગ્ગો ભાવેતબ્બો. કતમો અરિયો અટ્ઠઙ્ગિકો મગ્ગો? ઇધ, ભિક્ખવે, ભિક્ખુ સમ્માદિટ્ઠિં ભાવેતિ…પે… સમ્માસમાધિં ભાવેતિ રાગવિનયપરિયોસાનં દોસવિનયપરિયોસાનં મોહવિનયપરિયોસાનં… અમતોગધં અમતપરાયનં અમતપરિયોસાનં… નિબ્બાનનિન્નં નિબ્બાનપોણં નિબ્બાનપબ્ભારં. ઇમેસં ખો, ભિક્ખવે, પઞ્ચન્નં ઉદ્ધમ્ભાગિયાનં સંયોજનાનં અભિઞ્ઞાય પરિઞ્ઞાય પરિક્ખયાય પહાનાય અયં અરિયો અટ્ઠઙ્ગિકો મગ્ગો ભાવેતબ્બો’’તિ. દસમં.

ઓઘવગ્ગો અટ્ઠમો.

તસ્સુદ્દાનં –

ઓઘો યોગો ઉપાદાનં, ગન્થં અનુસયેન ચ;

કામગુણા નીવરણં, ખન્ધા ઓરુદ્ધમ્ભાગિયાતિ.

વગ્ગુદ્દાનં –

અવિજ્જાવગ્ગો પઠમો, દુતિયં વિહારં વુચ્ચતિ;

મિચ્છત્તં તતિયો વગ્ગો, ચતુત્થં પટિપન્નેનેવ.

તિત્થિયં પઞ્ચમો વગ્ગો, છટ્ઠો સૂરિયેન ચ;

બહુકતે સત્તમો વગ્ગો, ઉપ્પાદો અટ્ઠમેન ચ.

દિવસવગ્ગો નવમો, દસમો અપ્પમાદેન ચ;

એકાદસબલવગ્ગો, દ્વાદસ એસના પાળિયં;

ઓઘવગ્ગો ભવતિ તેરસાતિ.

મગ્ગસંયુત્તં પઠમં.