૧૨. રાસિયસુત્તં

૩૬૪. અથ ખો રાસિયો ગામણિ યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો રાસિયો ગામણિ ભગવન્તં એતદવોચ – ‘‘સુતં મેતં, ભન્તે, ‘સમણો ગોતમો સબ્બં તપં ગરહતિ, સબ્બં તપસ્સિં લૂખજીવિં એકંસેન ઉપવદતિ ઉપક્કોસતી’તિ [ઉપક્કોસતિ ઉપવદતીતિ (દી. નિ. ૧.૩૮૧)]. યે તે, ભન્તે, એવમાહંસુ – ‘સમણો ગોતમો સબ્બં તપં ગરહતિ, સબ્બં તપસ્સિં લૂખજીવિં એકંસેન ઉપવદતિ ઉપક્કોસતી’તિ, કચ્ચિ તે, ભન્તે, ભગવતો વુત્તવાદિનો, ન ચ ભગવન્તં અભૂતેન અબ્ભાચિક્ખન્તિ, ધમ્મસ્સ ચાનુધમ્મં બ્યાકરોન્તિ, ન ચ કોચિ સહધમ્મિકો વાદાનુવાદો ગારય્હં ઠાનં આગચ્છતી’’તિ? ‘‘યે તે, ગામણિ, એવમાહંસુ – ‘સમણો ગોતમો સબ્બં તપં ગરહતિ, સબ્બં તપસ્સિં લૂખજીવિં એકંસેન ઉપવદતિ ઉપક્કોસતી’તિ, ન મે તે વુત્તવાદિનો, અબ્ભાચિક્ખન્તિ ચ પન મં તે અસતા તુચ્છા અભૂતેન’’.

‘‘દ્વેમે, ગામણિ, અન્તા પબ્બજિતેન ન સેવિતબ્બા – યો ચાયં કામેસુ કામસુખલ્લિકાનુયોગો હીનો ગમ્મો પોથુજ્જનિકો અનરિયો અનત્થસંહિતો, યો ચાયં અત્તકિલમથાનુયોગો દુક્ખો અનરિયો અનત્થસંહિતો. એતે તે, ગામણિ, ઉભો અન્તે અનુપગમ્મ મજ્ઝિમા પટિપદા તથાગતેન અભિસમ્બુદ્ધા – ચક્ખુકરણી ઞાણકરણી ઉપસમાય અભિઞ્ઞાય સમ્બોધાય નિબ્બાનાય સંવત્તતિ. કતમા ચ સા, ગામણિ, મજ્ઝિમા પટિપદા તથાગતેન અભિસમ્બુદ્ધા – ચક્ખુકરણી ઞાણકરણી ઉપસમાય અભિઞ્ઞાય સમ્બોધાય નિબ્બાનાય સંવત્તતિ? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ…પે… સમ્માસમાધિ. અયં ખો સા, ગામણિ, મજ્ઝિમા પટિપદા તથાગતેન અભિસમ્બુદ્ધા – ચક્ખુકરણી ઞાણકરણી ઉપસમાય અભિઞ્ઞાય સમ્બોધાય નિબ્બાનાય સંવત્તતિ.

‘‘તયો ખો મે, ગામણિ, કામભોગિનો સન્તો સંવિજ્જમાના લોકસ્મિં. કતમે તયો? ઇધ, ગામણિ, એકચ્ચો કામભોગી અધમ્મેન ભોગે પરિયેસતિ, સાહસેન અધમ્મેન ભોગે પરિયેસિત્વા સાહસેન ન અત્તાનં સુખેતિ ન પીણેતિ ન સંવિભજતિ ન પુઞ્ઞાનિ કરોતિ. ઇધ પન, ગામણિ, એકચ્ચો કામભોગી અધમ્મેન ભોગે પરિયેસતિ સાહસેન. અધમ્મેન ભોગે પરિયેસિત્વા સાહસેન અત્તાનં સુખેતિ પીણેતિ, ન સંવિભજતિ ન પુઞ્ઞાનિ કરોતિ. ઇધ પન, ગામણિ, એકચ્ચો કામભોગી અધમ્મેન ભોગે પરિયેસતિ સાહસેન. અધમ્મેન ભોગે પરિયેસિત્વા સાહસેન અત્તાનં સુખેતિ પીણેતિ સંવિભજતિ પુઞ્ઞાનિ કરોતિ.

‘‘ઇધ પન, ગામણિ, એકચ્ચો કામભોગી ધમ્માધમ્મેન ભોગે પરિયેસતિ સાહસેનપિ અસાહસેનપિ. ધમ્માધમ્મેન ભોગે પરિયેસિત્વા સાહસેનપિ અસાહસેનપિ ન અત્તાનં સુખેતિ, ન પીણેતિ, ન સંવિભજતિ, ન પુઞ્ઞાનિ કરોતિ. ઇધ પન, ગામણિ, એકચ્ચો કામભોગી ધમ્માધમ્મેન ભોગે પરિયેસતિ સાહસેનપિ અસાહસેનપિ. ધમ્માધમ્મેન ભોગે પરિયેસિત્વા સાહસેનપિ અસાહસેનપિ અત્તાનં સુખેતિ પીણેતિ, ન સંવિભજતિ, ન પુઞ્ઞાનિ કરોતિ. ઇધ પન, ગામણિ, એકચ્ચો કામભોગી ધમ્માધમ્મેન ભોગે પરિયેસતિ, સાહસેનપિ અસાહસેનપિ. ધમ્માધમ્મેન ભોગે પરિયેસિત્વા સાહસેનપિ અસાહસેનપિ અત્તાનં સુખેતિ પીણેતિ સંવિભજતિ પુઞ્ઞાનિ કરોતિ.

‘‘ઇધ પન, ગામણિ, એકચ્ચો કામભોગી ધમ્મેન ભોગે પરિયેસતિ અસાહસેન. ધમ્મેન ભોગે પરિયેસિત્વા અસાહસેન ન અત્તાનં સુખેતિ, ન પીણેતિ, ન સંવિભજતિ, ન પુઞ્ઞાનિ કરોતિ. ઇધ પન, ગામણિ, એકચ્ચો કામભોગી ધમ્મેન ભોગે પરિયેસતિ અસાહસેન. ધમ્મેન ભોગે પરિયેસિત્વા અસાહસેન અત્તાનં સુખેતિ પીણેતિ, ન સંવિભજતિ, ન પુઞ્ઞાનિ કરોતિ. ઇધ પન, ગામણિ, એકચ્ચો કામભોગી ધમ્મેન ભોગે પરિયેસતિ અસાહસેન. ધમ્મેન ભોગે પરિયેસિત્વા અસાહસેન અત્તાનં સુખેતિ પીણેતિ સંવિભજતિ પુઞ્ઞાનિ કરોતિ. તે ચ ભોગે ગધિતો [ગથિતો (સી.)] મુચ્છિતો અજ્ઝોપન્નો અનાદીનવદસ્સાવી અનિસ્સરણપઞ્ઞો પરિભુઞ્જતિ. ઇધ પન, ગામણિ, એકચ્ચો કામભોગી ધમ્મેન ભોગે પરિયેસતિ અસાહસેન. ધમ્મેન ભોગે પરિયેસિત્વા અસાહસેન અત્તાનં સુખેતિ પીણેતિ સંવિભજતિ પુઞ્ઞાનિ કરોતિ. તે ચ ભોગે અગધિતો અમુચ્છિતો અનજ્ઝોપન્નો આદીનવદસ્સાવી નિસ્સરણપઞ્ઞો પરિભુઞ્જતિ.

‘‘તત્ર, ગામણિ, ય્વાયં કામભોગી અધમ્મેન ભોગે પરિયેસતિ સાહસેન, અધમ્મેન ભોગે પરિયેસિત્વા સાહસેન ન અત્તાનં સુખેતિ, ન પીણેતિ, ન સંવિભજતિ, ન પુઞ્ઞાનિ કરોતિ. અયં, ગામણિ, કામભોગી તીહિ ઠાનેહિ ગારય્હો. કતમેહિ તીહિ ઠાનેહિ ગારય્હો? અધમ્મેન ભોગે પરિયેસતિ સાહસેનાતિ, ઇમિના પઠમેન ઠાનેન ગારય્હો. ન અત્તાનં સુખેતિ ન પીણેતીતિ, ઇમિના દુતિયેન ઠાનેન ગારય્હો. ન સંવિભજતિ, ન પુઞ્ઞાનિ કરોતીતિ, ઇમિના તતિયેન ઠાનેન ગારય્હો. અયં, ગામણિ, કામભોગી ઇમેહિ તીહિ ઠાનેહિ ગારય્હો.

‘‘તત્ર, ગામણિ, ય્વાયં કામભોગી અધમ્મેન ભોગે પરિયેસતિ સાહસેન, અધમ્મેન ભોગે પરિયેસિત્વા સાહસેન અત્તાનં સુખેતિ પીણેતિ, ન સંવિભજતિ, ન પુઞ્ઞાનિ કરોતિ. અયં, ગામણિ, કામભોગી દ્વીહિ ઠાનેહિ ગારય્હો, એકેન ઠાનેન પાસંસો. કતમેહિ દ્વીહિ ઠાનેહિ ગારય્હો? અધમ્મેન ભોગે પરિયેસતિ સાહસેનાતિ, ઇમિના પઠમેન ઠાનેન ગારય્હો. ન સંવિભજતિ, ન પુઞ્ઞાનિ કરોતીતિ, ઇમિના દુતિયેન ઠાનેન ગારય્હો. કતમેન એકેન ઠાનેન પાસંસો? અત્તાનં સુખેતિ પીણેતીતિ, ઇમિના એકેન ઠાનેન પાસંસો. અયં, ગામણિ, કામભોગી ઇમેહિ દ્વીહિ ઠાનેહિ ગારય્હો, ઇમિના એકેન ઠાનેન પાસંસો.

‘‘તત્ર, ગામણિ, ય્વાયં કામભોગી અધમ્મેન ભોગે પરિયેસતિ સાહસેન, અધમ્મેન ભોગે પરિયેસિત્વા સાહસેન અત્તાનં સુખેતિ પીણેતિ સંવિભજતિ પુઞ્ઞાનિ કરોતિ. અયં, ગામણિ, કામભોગી એકેન ઠાનેન ગારય્હો, દ્વીહિ ઠાનેહિ પાસંસો. કતમેન એકેન ઠાનેન ગારય્હો? અધમ્મેન ભોગે પરિયેસતિ સાહસેનાતિ, ઇમિના એકેન ઠાનેન ગારય્હો. કતમેહિ દ્વીહિ ઠાનેહિ પાસંસો? અત્તાનં સુખેતિ પીણેતીતિ, ઇમિના પઠમેન ઠાનેન પાસંસો. સંવિભજતિ પુઞ્ઞાનિ કરોતીતિ, ઇમિના દુતિયેન ઠાનેન પાસંસો. અયં, ગામણિ, કામભોગી, ઇમિના એકેન ઠાનેન ગારય્હો, ઇમેહિ દ્વીહિ ઠાનેહિ પાસંસો.

‘‘તત્ર, ગામણિ, ય્વાયં કામભોગી ધમ્માધમ્મેન ભોગે પરિયેસતિ સાહસેનપિ અસાહસેનપિ, ધમ્માધમ્મેન ભોગે પરિયેસિત્વા સાહસેનપિ અસાહસેનપિ ન અત્તાનં સુખેતિ, ન પીણેતિ, ન સંવિભજતિ, ન પુઞ્ઞાનિ કરોતિ. અયં, ગામણિ, કામભોગી એકેન ઠાનેન પાસંસો, તીહિ ઠાનેહિ ગારય્હો. કતમેન એકેન ઠાનેન પાસંસો? ધમ્મેન ભોગે પરિયેસતિ અસાહસેનાતિ, ઇમિના એકેન ઠાનેન પાસંસો. કતમેહિ તીહિ ઠાનેહિ ગારય્હો? અધમ્મેન ભોગે પરિયેસતિ સાહસેનાતિ, ઇમિના પઠમેન ઠાનેન ગારય્હો. ન અત્તાનં સુખેતિ, ન પીણેતીતિ, ઇમિના દુતિયેન ઠાનેન ગારય્હો. ન સંવિભજતિ, ન પુઞ્ઞાનિ કરોતીતિ, ઇમિના તતિયેન ઠાનેન ગારય્હો. અયં, ગામણિ, કામભોગી ઇમિના એકેન ઠાનેન પાસંસો, ઇમેહિ તીહિ ઠાનેહિ ગારય્હો.

‘‘તત્ર, ગામણિ, ય્વાયં કામભોગી ધમ્માધમ્મેન ભોગે પરિયેસતિ સાહસેનપિ અસાહસેનપિ, ધમ્માધમ્મેન ભોગે પરિયેસિત્વા સાહસેનપિ અસાહસેનપિ અત્તાનં સુખેતિ પીણેતિ, ન સંવિભજતિ, ન પુઞ્ઞાનિ કરોતિ. અયં, ગામણિ, કામભોગી દ્વીહિ ઠાનેહિ પાસંસો, દ્વીહિ ઠાનેહિ ગારય્હો. કતમેહિ દ્વીહિ ઠાનેહિ પાસંસો? ધમ્મેન ભોગે પરિયેસતિ અસાહસેનાતિ, ઇમિના પઠમેન ઠાનેન પાસંસો. અત્તાનં સુખેતિ પીણેતીતિ, ઇમિના દુતિયેન ઠાનેન પાસંસો. કતમેહિ દ્વીહિ ઠાનેહિ ગારય્હો? અધમ્મેન ભોગે પરિયેસતિ સાહસેનાતિ, ઇમિના પઠમેન ઠાનેન ગારય્હો. ન સંવિભજતિ, ન પુઞ્ઞાનિ કરોતીતિ, ઇમિના દુતિયેન ઠાનેન ગારય્હો. અયં, ગામણિ, કામભોગી ઇમેહિ દ્વીહિ ઠાનેહિ પાસંસો, ઇમેહિ દ્વીહિ ઠાનેહિ ગારય્હો.

‘‘તત્ર, ગામણિ, ય્વાયં કામભોગી ધમ્માધમ્મેન ભોગે પરિયેસતિ સાહસેનપિ અસાહસેનપિ, ધમ્માધમ્મેન ભોગે પરિયેસિત્વા સાહસેનપિ અસાહસેનપિ અત્તાનં સુખેતિ પીણેતિ સંવિભજતિ પુઞ્ઞાનિ કરોતિ. અયં, ગામણિ, કામભોગી તીહિ ઠાનેહિ પાસંસો, એકેન ઠાનેન ગારય્હો. કતમેહિ તીહિ ઠાનેહિ પાસંસો? ધમ્મેન ભોગે પરિયેસતિ અસાહસેનાતિ, ઇમિના પઠમેન ઠાનેન પાસંસો. અત્તાનં સુખેતિ પીણેતીતિ, ઇમિના દુતિયેન ઠાનેન પાસંસો. સંવિભજતિ પુઞ્ઞાનિ કરોતીતિ, ઇમિના તતિયેન ઠાનેન પાસંસો. કતમેન એકેન ઠાનેન ગારય્હો? અધમ્મેન ભોગે પરિયેસતિ સાહસેનાતિ, ઇમિના એકેન ઠાનેન ગારય્હો. અયં, ગામણિ, કામભોગી ઇમેહિ તીહિ ઠાનેહિ પાસંસો, ઇમિના એકેન ઠાનેન ગારય્હો.

‘‘તત્ર, ગામણિ, ય્વાયં કામભોગી ધમ્મેન ભોગે પરિયેસતિ અસાહસેન, ધમ્મેન ભોગે પરિયેસિત્વા અસાહસેન, ન અત્તાનં સુખેતિ, ન પીણેતિ, ન સંવિભજતિ, ન પુઞ્ઞાનિ કરોતિ. અયં, ગામણિ, કામભોગી એકેન ઠાનેન પાસંસો, દ્વીહિ ઠાનેહિ ગારય્હો. કતમેન એકેન ઠાનેન પાસંસો? ધમ્મેન ભોગે પરિયેસતિ અસાહસેનાતિ, ઇમિના એકેન ઠાનેન પાસંસો. કતમેહિ દ્વીહિ ઠાનેહિ ગારય્હો? ન અત્તાનં સુખેતિ, ન પીણેતીતિ, ઇમિના પઠમેન ઠાનેન ગારય્હો. ન સંવિભજતિ, ન પુઞ્ઞાનિ કરોતીતિ, ઇમિના દુતિયેન ઠાનેન ગારય્હો. અયં, ગામણિ, કામભોગી ઇમિના એકેન ઠાનેન પાસંસો, ઇમેહિ દ્વીહિ ઠાનેહિ ગારય્હો.

‘‘તત્ર, ગામણિ, ય્વાયં કામભોગી ધમ્મેન ભોગે પરિયેસતિ અસાહસેન, ધમ્મેન ભોગે પરિયેસિત્વા અસાહસેન અત્તાનં સુખેતિ પીણેતિ, ન સંવિભજતિ, ન પુઞ્ઞાનિ કરોતિ. અયં, ગામણિ, કામભોગી દ્વીહિ ઠાનેહિ પાસંસો, એકેન ઠાનેન ગારય્હો. કતમેહિ દ્વીહિ ઠાનેહિ પાસંસો? ધમ્મેન ભોગે પરિયેસતિ અસાહસેનાતિ, ઇમિના પઠમેન ઠાનેન પાસંસો. અત્તાનં સુખેતિ પીણેતીતિ, ઇમિના દુતિયેન ઠાનેન પાસંસો. કતમેન એકેન ઠાનેન ગારય્હો? ન સંવિભજતિ, ન પુઞ્ઞાનિ કરોતીતિ, ઇમિના એકેન ઠાનેન ગારય્હો. અયં, ગામણિ, કામભોગી ઇમેહિ દ્વીહિ ઠાનેહિ પાસંસો, ઇમિના એકેન ઠાનેન ગારય્હો.

‘‘તત્ર, ગામણિ, ય્વાયં કામભોગી ધમ્મેન ભોગે પરિયેસતિ અસાહસેન, ધમ્મેન ભોગે પરિયેસિત્વા અસાહસેન અત્તાનં સુખેતિ પીણેતિ સંવિભજતિ પુઞ્ઞાનિ કરોતિ, તે ચ ભોગે ગધિતો મુચ્છિતો અજ્ઝોપન્નો અનાદીનવદસ્સાવી અનિસ્સરણપઞ્ઞો પરિભુઞ્જતિ. અયં, ગામણિ, કામભોગી તીહિ ઠાનેહિ પાસંસો, એકેન ઠાનેન ગારય્હો. કતમેહિ તીહિ ઠાનેહિ પાસંસો? ધમ્મેન ભોગે પરિયેસતિ અસાહસેનાતિ, ઇમિના પઠમેન ઠાનેન પાસંસો. અત્તાનં સુખેતિ પીણેતીતિ, ઇમિના દુતિયેન ઠાનેન પાસંસો. સંવિભજતિ પુઞ્ઞાનિ કરોતીતિ, ઇમિના તતિયેન ઠાનેન પાસંસો. કતમેન એકેન ઠાનેન ગારય્હો? તે ચ ભોગે ગધિતો મુચ્છિતો અજ્ઝોપન્નો અનાદીનવદસ્સાવી અનિસ્સરણપઞ્ઞો પરિભુઞ્જતીતિ, ઇમિના એકેન ઠાનેન ગારય્હો. અયં, ગામણિ, કામભોગી ઇમેહિ તીહિ ઠાનેહિ પાસંસો, ઇમિના એકેન ઠાનેન ગારય્હો.

‘‘તત્ર, ગામણિ, ય્વાયં કામભોગી ધમ્મેન ભોગે પરિયેસતિ અસાહસેન, ધમ્મેન ભોગે પરિયેસિત્વા અસાહસેન અત્તાનં સુખેતિ પીણેતિ સંવિભજતિ પુઞ્ઞાનિ કરોતિ. તે ચ ભોગે અગધિતો અમુચ્છિતો અનજ્ઝોપન્નો આદીનવદસ્સાવી નિસ્સરણપઞ્ઞો પરિભુઞ્જતિ. અયં, ગામણિ, કામભોગી ચતૂહિ ઠાનેહિ પાસંસો. કતમેહિ ચતૂહિ ઠાનેહિ પાસંસો? ધમ્મેન ભોગે પરિયેસતિ અસાહસેનાતિ, ઇમિના પઠમેન ઠાનેન પાસંસો. અત્તાનં સુખેતિ પીણેતીતિ, ઇમિના દુતિયેન ઠાનેન પાસંસો. સંવિભજતિ પુઞ્ઞાનિ કરોતીતિ, ઇમિના તતિયેન ઠાનેન પાસંસો. તે ચ ભોગે અગધિતો અમુચ્છિતો અનજ્ઝોપન્નો આદીનવદસ્સાવી નિસ્સરણપઞ્ઞો પરિભુઞ્જતીતિ, ઇમિના ચતુત્થેન ઠાનેન પાસંસો. અયં, ગામણિ, કામભોગી ઇમેહિ ચતૂહિ ઠાનેહિ પાસંસો.

‘‘તયોમે, ગામણિ, તપસ્સિનો લૂખજીવિનો સન્તો સંવિજ્જમાના લોકસ્મિં. કતમે તયો? ઇધ, ગામણિ, એકચ્ચો તપસ્સી લૂખજીવી સદ્ધા અગારસ્મા અનગારિયં પબ્બજિતો હોતિ – ‘અપ્પેવ નામ કુસલં ધમ્મં અધિગચ્છેય્યં, અપ્પેવ નામ ઉત્તરિમનુસ્સધમ્મા અલમરિયઞાણદસ્સનવિસેસં સચ્છિકરેય્ય’ન્તિ. સો અત્તાનં આતાપેતિ પરિતાપેતિ, કુસલઞ્ચ ધમ્મં નાધિગચ્છતિ, ઉત્તરિ ચ મનુસ્સધમ્મા અલમરિયઞાણદસ્સનવિસેસં ન સચ્છિકરોતિ.

‘‘ઇધ પન, ગામણિ, એકચ્ચો તપસ્સી લૂખજીવી સદ્ધા અગારસ્મા અનગારિયં પબ્બજિતો હોતિ – ‘અપ્પેવ નામ કુસલં ધમ્મં અધિગચ્છેય્યં, અપ્પેવ નામ ઉત્તરિમનુસ્સધમ્મા અલમરિયઞાણદસ્સનવિસેસં સચ્છિકરેય્ય’ન્તિ. સો અત્તાનં આતાપેતિ પરિતાપેતિ, કુસલઞ્હિ ખો ધમ્મં અધિગચ્છતિ, ઉત્તરિમનુસ્સધમ્મા અલમરિયઞાણદસ્સનવિસેસં ન સચ્છિકરોતિ.

‘‘ઇધ પન, ગામણિ, એકચ્ચો તપસ્સી લૂખજીવી સદ્ધા અગારસ્મા અનગારિયં પબ્બજિતો હોતિ – ‘અપ્પેવ નામ કુસલં ધમ્મં અધિગચ્છેય્યં, અપ્પેવ નામ ઉત્તરિમનુસ્સધમ્મા અલમરિયઞાણદસ્સનવિસેસં સચ્છિકરેય્ય’ન્તિ. સો અત્તાનં આતાપેતિ પરિતાપેતિ, કુસલઞ્ચ ધમ્મં અધિગચ્છતિ, ઉત્તરિ ચ મનુસ્સધમ્મા અલમરિયઞાણદસ્સનવિસેસં સચ્છિકરોતિ.

‘‘તત્ર, ગામણિ, ય્વાયં તપસ્સી લૂખજીવી અત્તાનં આતાપેતિ પરિતાપેતિ, કુસલઞ્ચ ધમ્મં નાધિગચ્છતિ, ઉત્તરિ ચ મનુસ્સધમ્મા અલમરિયઞાણદસ્સનવિસેસં ન સચ્છિકરોતિ. અયં, ગામણિ, તપસ્સી લૂખજીવી તીહિ ઠાનેહિ ગારય્હો. કતમેહિ તીહિ ઠાનેહિ ગારય્હો? અત્તાનં આતાપેતિ પરિતાપેતીતિ, ઇમિના પઠમેન ઠાનેન ગારય્હો. કુસલઞ્ચ ધમ્મં નાધિગચ્છતીતિ, ઇમિના દુતિયેન ઠાનેન ગારય્હો. ઉત્તરિ ચ મનુસ્સધમ્મા અલમરિયઞાણદસ્સનવિસેસં ન સચ્છિકરોતીતિ, ઇમિના તતિયેન ઠાનેન ગારય્હો. અયં, ગામણિ, તપસ્સી લૂખજીવી, ઇમેહિ તીહિ ઠાનેહિ ગારય્હો.

‘‘તત્ર, ગામણિ, ય્વાયં તપસ્સી લૂખજીવી અત્તાનં આતાપેતિ પરિતાપેતિ, કુસલઞ્હિ ખો ધમ્મં અધિગચ્છતિ, ઉત્તરિ ચ મનુસ્સધમ્મા અલમરિયઞાણદસ્સનવિસેસં ન સચ્છિકરોતિ. અયં, ગામણિ, તપસ્સી લૂખજીવી દ્વીહિ ઠાનેહિ ગારય્હો, એકેન ઠાનેન પાસંસો. કતમેહિ દ્વીહિ ઠાનેહિ ગારય્હો? અત્તાનં આતાપેતિ પરિતાપેતીતિ, ઇમિના પઠમેન ઠાનેન ગારય્હો. ઉત્તરિ ચ મનુસ્સધમ્મા અલમરિયઞાણદસ્સનવિસેસં ન સચ્છિકરોતીતિ, ઇમિના દુતિયેન ઠાનેન ગારય્હો. કતમેન એકેન ઠાનેન પાસંસો? કુસલઞ્હિ ખો ધમ્મં અધિગચ્છતીતિ, ઇમિના એકેન ઠાનેન પાસંસો. અયં, ગામણિ, તપસ્સી લૂખજીવી ઇમેહિ દ્વીહિ ઠાનેહિ ગારય્હો, ઇમિના એકેન ઠાનેન પાસંસો.

‘‘તત્ર, ગામણિ, ય્વાયં તપસ્સી લૂખજીવી અત્તાનં આતાપેતિ પરિતાપેતિ, કુસલઞ્ચ ધમ્મં અધિગચ્છતિ, ઉત્તરિ ચ મનુસ્સધમ્મા અલમરિયઞાણદસ્સનવિસેસં સચ્છિકરોતિ. અયં, ગામણિ, તપસ્સી લૂખજીવી એકેન ઠાનેન ગારય્હો, દ્વીહિ ઠાનેહિ પાસંસો. કતમેન એકેન ઠાનેન ગારય્હો? અત્તાનં આતાપેતિ પરિતાપેતીતિ, ઇમિના એકેન ઠાનેન ગારય્હો. કતમેહિ દ્વીહિ ઠાનેહિ પાસંસો? કુસલઞ્ચ ધમ્મં અધિગચ્છતીતિ, ઇમિના પઠમેન ઠાનેન પાસંસો. ઉત્તરિ ચ મનુસ્સધમ્મા અલમરિયઞાણદસ્સનવિસેસં સચ્છિકરોતીતિ, ઇમિના દુતિયેન ઠાનેન પાસંસો. અયં, ગામણિ, તપસ્સી લૂખજીવી ઇમિના એકેન ઠાનેન ગારય્હો, ઇમેહિ દ્વીહિ ઠાનેહિ પાસંસો.

‘‘તિસ્સો ઇમા, ગામણિ, સન્દિટ્ઠિકા નિજ્જરા અકાલિકા એહિપસ્સિકા ઓપનેય્યિકા પચ્ચત્તં વેદિતબ્બા વિઞ્ઞૂહિ. કતમા તિસ્સો? યં રત્તો રાગાધિકરણં અત્તબ્યાબાધાયપિ ચેતેતિ, પરબ્યાબાધાયપિ ચેતેતિ, ઉભયબ્યાબાધાયપિ ચેતેતિ. રાગે પહીને નેવત્તબ્યાબાધાય ચેતેતિ, ન પરબ્યાબાધાય ચેતેતિ, ન ઉભયબ્યાબાધાય ચેતેતિ. સન્દિટ્ઠિકા નિજ્જરા અકાલિકા એહિપસ્સિકા ઓપનેય્યિકા પચ્ચત્તં વેદિતબ્બા વિઞ્ઞૂહિ. યં દુટ્ઠો દોસાધિકરણં અત્તબ્યાબાધાયપિ ચેતેતિ, પરબ્યાબાધાયપિ ચેતેતિ, ઉભયબ્યાબાધાયપિ ચેતેતિ. દોસે પહીને નેવત્તબ્યાબાધાય ચેતેતિ, ન પરબ્યાબાધાય ચેતેતિ, ન ઉભયબ્યાબાધાય ચેતેતિ. સન્દિટ્ઠિકા નિજ્જરા અકાલિકા એહિપસ્સિકા ઓપનેય્યિકા પચ્ચત્તં વેદિતબ્બા વિઞ્ઞૂહિ. યં મૂળ્હો મોહાધિકરણં અત્તબ્યાબાધાયપિ ચેતેતિ, પરબ્યાબાધાયપિ ચેતેતિ, ઉભયબ્યાબાધાયપિ ચેતેતિ. મોહે પહીને નેવત્તબ્યાબાધાય ચેતેતિ, ન પરબ્યાબાધાય ચેતેતિ, ન ઉભયબ્યાબાધાય ચેતેતિ. સન્દિટ્ઠિકા નિજ્જરા અકાલિકા એહિપસ્સિકા ઓપનેય્યિકા પચ્ચત્તં વેદિતબ્બા વિઞ્ઞૂહિ. ઇમા ખો, ગામણિ, તિસ્સો સન્દિટ્ઠિકા નિજ્જરા અકાલિકા એહિપસ્સિકા ઓપનેય્યિકા પચ્ચત્તં વેદિતબ્બા વિઞ્ઞૂહી’’તિ.

એવં વુત્તે, રાસિયો ગામણિ ભગવન્તં એતદવોચ – ‘‘અભિક્કન્તં, ભન્તે…પે… ઉપાસકં મં ભગવા ધારેતુ અજ્જતગ્ગે પાણુપેતં સરણં ગત’’ન્તિ. દ્વાદસમં.