૧. ચણ્ડસુત્તં

૩૫૩. સાવત્થિનિદાનં. અથ ખો ચણ્ડો ગામણિ યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો ચણ્ડો ગામણિ ભગવન્તં એતદવોચ – ‘‘કો નુ ખો, ભન્તે, હેતુ, કો પચ્ચયો યેન મિધેકચ્ચો ચણ્ડો ચણ્ડોત્વેવ [યેન મિધેકચ્ચો ચણ્ડોતેવ (સી. પી.)] સઙ્ખં ગચ્છતિ. કો પન, ભન્તે, હેતુ, કો પચ્ચયો યેન મિધેકચ્ચો સોરતો સોરતોત્વેવ [યેન મિધેકચ્ચો સુરતોતેવ (સી. પી.)] સઙ્ખં ગચ્છતી’’તિ? ‘‘ઇધ, ગામણિ, એકચ્ચસ્સ રાગો અપ્પહીનો હોતિ. રાગસ્સ અપ્પહીનત્તા પરે કોપેન્તિ, પરેહિ કોપિયમાનો કોપં પાતુકરોતિ. સો ચણ્ડોત્વેવ સઙ્ખં ગચ્છતિ. દોસો અપ્પહીનો હોતિ. દોસસ્સ અપ્પહીનત્તા પરે કોપેન્તિ, પરેહિ કોપિયમાનો કોપં પાતુકરોતિ. સો ચણ્ડોત્વેવ સઙ્ખં ગચ્છતિ. મોહો અપ્પહીનો હોતિ. મોહસ્સ અપ્પહીનત્તા પરે કોપેન્તિ, પરેહિ કોપિયમાનો કોપં પાતુકરોતિ. સો ચણ્ડોત્વેવ સઙ્ખં ગચ્છતિ. અયં ખો, ગામણિ, હેતુ, અયં પચ્ચયો યેન મિધેકચ્ચો ચણ્ડો ચણ્ડોત્વેવ સઙ્ખં ગચ્છતિ’’.

‘‘ઇધ પન, ગામણિ, એકચ્ચસ્સ રાગો પહીનો હોતિ. રાગસ્સ પહીનત્તા પરે ન કોપેન્તિ, પરેહિ કોપિયમાનો કોપં ન પાતુકરોતિ. સો સોરતોત્વેવ સઙ્ખં ગચ્છતિ. દોસો પહીનો હોતિ. દોસસ્સ પહીનત્તા પરે ન કોપેન્તિ, પરેહિ કોપિયમાનો કોપં ન પાતુકરોતિ. સો સોરતોત્વેવ સઙ્ખં ગચ્છતિ. મોહો પહીનો હોતિ. મોહસ્સ પહીનત્તા પરે ન કોપેન્તિ, પરેહિ કોપિયમાનો કોપં ન પાતુકરોતિ. સો સોરતોત્વેવ સઙ્ખં ગચ્છતિ. અયં ખો, ગામણિ, હેતુ અયં પચ્ચયો યેન મિધેકચ્ચો સોરતો સોરતોત્વેવ સઙ્ખં ગચ્છતી’’તિ.

એવં વુત્તે, ચણ્ડો ગામણિ ભગવન્તં એતદવોચ – ‘‘અભિક્કન્તં, ભન્તે, અભિક્કન્તં, ભન્તે! સેય્યથાપિ, ભન્તે, નિક્કુજ્જિતં વા ઉક્કુજ્જેય્ય, પટિચ્છન્નં વા વિવરેય્ય, મૂળ્હસ્સ વા મગ્ગં આચિક્ખેય્ય, અન્ધકારે વા તેલપજ્જોતં ધારેય્ય – ચક્ખુમન્તો રૂપાનિ દક્ખન્તીતિ; એવમેવં ભગવતા અનેકપરિયાયેન ધમ્મો પકાસિતો. એસાહં, ભન્તે, ભગવન્તં સરણં ગચ્છામિ ધમ્મઞ્ચ ભિક્ખુસઙ્ઘઞ્ચ. ઉપાસકં મં ભગવા ધારેતુ અજ્જતગ્ગે પાણુપેતં સરણં ગત’’ન્તિ. પઠમં.