૧૪. પઞ્ચવેરસુત્તં

૨૯૩. ‘‘પઞ્ચહિ, અનુરુદ્ધ, ધમ્મેહિ સમન્નાગતો માતુગામો…પે… નિરયં ઉપપજ્જતિ. કતમેહિ પઞ્ચહિ? પાણાતિપાતી ચ હોતિ, અદિન્નાદાયી ચ હોતિ, કામેસુમિચ્છાચારી ચ હોતિ, મુસાવાદી ચ હોતિ, સુરામેરયમજ્જપ્પમાદટ્ઠાયી ચ હોતિ – ઇમેહિ ખો, અનુરુદ્ધ, પઞ્ચહિ ધમ્મેહિ સમન્નાગતો માતુગામો કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપજ્જતી’’તિ. ચુદ્દસમં.

પઠમપેય્યાલવગ્ગો.

તસ્સુદ્દાનં –

માતુગામો પુરિસો ચ, આવેણિકા તિધમ્મો ચ [દ્વે મનાપામનાપાચ, આવેણિકા તીહિ અનુરુદ્ધો (સબ્બત્થ)];

કોધનો ઉપનાહી ચ, ઇસ્સુકી મચ્છરેન ચ;

અતિચારી ચ દુસ્સીલો, અપ્પસ્સુતો ચ કુસીતો;

મુટ્ઠસ્સતિ પઞ્ચવેરં, કણ્હપક્ખે પકાસિતો.