૭. કોટ્ઠિકઅનિચ્ચસુત્તં

૧૬૨. અથ ખો આયસ્મા મહાકોટ્ઠિકો યેન ભગવા તેનુપસઙ્કમિ…પે… એકમન્તં નિસિન્નો ખો આયસ્મા કોટ્ઠિકો ભગવન્તં એતદવોચ – ‘‘સાધુ મે, ભન્તે, ભગવા સંખિત્તેન ધમ્મં દેસેતુ, યમહં ભગવતો ધમ્મં સુત્વા એકો વૂપકટ્ઠો અપ્પમત્તો આતાપી પહિતત્તો વિહરેય્ય’’ન્તિ.

‘‘યં ખો, કોટ્ઠિક, અનિચ્ચં તત્ર તે છન્દો પહાતબ્બો. કિઞ્ચ, કોટ્ઠિક, અનિચ્ચં? ચક્ખુ ખો, કોટ્ઠિક, અનિચ્ચં; તત્ર તે છન્દો પહાતબ્બો. રૂપા અનિચ્ચા; તત્ર તે છન્દો પહાતબ્બો. ચક્ખુવિઞ્ઞાણં અનિચ્ચં; તત્ર તે છન્દો પહાતબ્બો. ચક્ખુસમ્ફસ્સો અનિચ્ચો; તત્ર તે છન્દો પહાતબ્બો. યમ્પિદં ચક્ખુસમ્ફસ્સપચ્ચયા ઉપ્પજ્જતિ વેદયિતં સુખં વા દુક્ખં વા અદુક્ખમસુખં વા તમ્પિ અનિચ્ચં; તત્ર તે છન્દો પહાતબ્બો…પે… જિવ્હા અનિચ્ચા; તત્ર તે છન્દો પહાતબ્બો. રસા અનિચ્ચા; તત્ર તે છન્દો પહાતબ્બો. જિવ્હાવિઞ્ઞાણં અનિચ્ચં; તત્ર તે છન્દો પહાતબ્બો. જિવ્હાસમ્ફસ્સો અનિચ્ચો; તત્ર તે છન્દો પહાતબ્બો. યમ્પિદં જિવ્હાસમ્ફસ્સપચ્ચયા ઉપ્પજ્જતિ વેદયિતં સુખં વા દુક્ખં વા અદુક્ખમસુખં વા તમ્પિ અનિચ્ચં; તત્ર તે છન્દો પહાતબ્બો…પે… મનો અનિચ્ચો; તત્ર તે છન્દો પહાતબ્બો. ધમ્મા અનિચ્ચા; તત્ર તે છન્દો પહાતબ્બો. મનોવિઞ્ઞાણં અનિચ્ચં; તત્ર તે છન્દો પહાતબ્બો. મનોસમ્ફસ્સો અનિચ્ચો; તત્ર તે છન્દો પહાતબ્બો. યમ્પિદં મનોસમ્ફસ્સપચ્ચયા ઉપ્પજ્જતિ વેદયિતં સુખં વા દુક્ખં વા અદુક્ખમસુખં વા તમ્પિ અનિચ્ચં; તત્ર તે છન્દો પહાતબ્બો. યં ખો, કોટ્ઠિક, અનિચ્ચં તત્ર તે છન્દો પહાતબ્બો’’તિ. સત્તમં.