૧. કમ્મનિરોધસુત્તં

૧૪૬. ‘‘નવપુરાણાનિ, ભિક્ખવે, કમ્માનિ દેસેસ્સામિ કમ્મનિરોધં કમ્મનિરોધગામિનિઞ્ચ પટિપદં. તં સુણાથ, સાધુકં મનસિ કરોથ; ભાસિસ્સામીતિ. કતમઞ્ચ, ભિક્ખવે, પુરાણકમ્મં? ચક્ખુ, ભિક્ખવે, પુરાણકમ્મં અભિસઙ્ખતં અભિસઞ્ચેતયિતં વેદનિયં દટ્ઠબ્બં…પે… જિવ્હા પુરાણકમ્મા અભિસઙ્ખતા અભિસઞ્ચેતયિતા વેદનિયા દટ્ઠબ્બા…પે… મનો પુરાણકમ્મો અભિસઙ્ખતો અભિસઞ્ચેતયિતો વેદનિયો દટ્ઠબ્બો. ઇદં વુચ્ચતિ, ભિક્ખવે, પુરાણકમ્મં. કતમઞ્ચ, ભિક્ખવે, નવકમ્મં? યં ખો, ભિક્ખવે, એતરહિ કમ્મં કરોતિ કાયેન વાચાય મનસા, ઇદં વુચ્ચતિ, ભિક્ખવે, નવકમ્મં. કતમો ચ, ભિક્ખવે, કમ્મનિરોધો? યો ખો, ભિક્ખવે, કાયકમ્મવચીકમ્મમનોકમ્મસ્સ નિરોધા વિમુત્તિં ફુસતિ, અયં વુચ્ચતિ, ભિક્ખવે, કમ્મનિરોધો. કતમા ચ, ભિક્ખવે, કમ્મનિરોધગામિની પટિપદા? અયમેવ અરિયો અટ્ઠઙ્ગિકો મગ્ગો, સેય્યથિદં – સમ્માદિટ્ઠિ, સમ્માસઙ્કપ્પો, સમ્માવાચા, સમ્માકમ્મન્તો, સમ્માઆજીવો, સમ્માવાયામો, સમ્માસતિ, સમ્માસમાધિ – અયં વુચ્ચતિ, ભિક્ખવે, કમ્મનિરોધગામિની પટિપદા. ઇતિ ખો, ભિક્ખવે, દેસિતં મયા પુરાણકમ્મં, દેસિતં નવકમ્મં, દેસિતો કમ્મનિરોધો, દેસિતા કમ્મનિરોધગામિની પટિપદા. યં ખો, ભિક્ખવે, સત્થારા કરણીયં સાવકાનં હિતેસિના અનુકમ્પકેન અનુકમ્પં ઉપાદાય, કતં વો તં મયા. એતાનિ, ભિક્ખવે, રુક્ખમૂલાનિ, એતાનિ સુઞ્ઞાગારાનિ. ઝાયથ, ભિક્ખવે, મા પમાદત્થ; મા પચ્છાવિપ્પટિસારિનો અહુવત્થ. અયં વો અમ્હાકં અનુસાસની’’તિ. પઠમં.