૫. સક્કપઞ્હસુત્તં

૧૧૮. એકં સમયં ભગવા રાજગહે વિહરતિ ગિજ્ઝકૂટે પબ્બતે. અથ ખો સક્કો દેવાનમિન્દો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં અટ્ઠાસિ. એકમન્તં ઠિતો ખો સક્કો દેવાનમિન્દો ભગવન્તં એતદવોચ – ‘‘કો નુ ખો, ભન્તે, હેતુ, કો પચ્ચયો યેન મિધેકચ્ચે સત્તા દિટ્ઠેવ ધમ્મે નો પરિનિબ્બાયન્તિ? કો પન, ભન્તે, હેતુ, કો પચ્ચયો યેન મિધેકચ્ચે સત્તા દિટ્ઠેવ ધમ્મે પરિનિબ્બાયન્તી’’તિ?

‘‘સન્તિ ખો, દેવાનમિન્દ, ચક્ખુવિઞ્ઞેય્યા રૂપા, ઇટ્ઠા કન્તા મનાપા પિયરૂપા કામૂપસંહિતા રજનીયા. તઞ્ચે ભિક્ખુ અભિનન્દતિ અભિવદતિ અજ્ઝોસાય તિટ્ઠતિ. તસ્સ તં અભિનન્દતો અભિવદતો અજ્ઝોસાય તિટ્ઠતો તન્નિસ્સિતં વિઞ્ઞાણં હોતિ તદુપાદાનં. સઉપાદાનો, દેવાનમિન્દ, ભિક્ખુ નો પરિનિબ્બાયતિ…પે….

‘‘સન્તિ ખો, દેવાનમિન્દ, જિવ્હાવિઞ્ઞેય્યા રસા…પે… સન્તિ ખો, દેવાનમિન્દ, મનોવિઞ્ઞેય્યા ધમ્મા, ઇટ્ઠા કન્તા મનાપા પિયરૂપા કામૂપસંહિતા રજનીયા. તઞ્ચે ભિક્ખુ અભિનન્દતિ અભિવદતિ અજ્ઝોસાય તિટ્ઠતિ. તસ્સ તં અભિનન્દતો અભિવદતો અજ્ઝોસાય તિટ્ઠતો તન્નિસ્સિતં વિઞ્ઞાણં હોતિ તદુપાદાનં. સઉપાદાનો, દેવાનમિન્દ, ભિક્ખુ નો પરિનિબ્બાયતિ. અયં ખો, દેવાનમિન્દ, હેતુ, અયં પચ્ચયો યેન મિધેકચ્ચે સત્તા દિટ્ઠેવ ધમ્મે નો પરિનિબ્બાયન્તિ.

‘‘સન્તિ ચ ખો, દેવાનમિન્દ, ચક્ખુવિઞ્ઞેય્યા રૂપા, ઇટ્ઠા કન્તા મનાપા પિયરૂપા કામૂપસંહિતા રજનીયા. તઞ્ચે ભિક્ખુ નાભિનન્દતિ નાભિવદતિ નાજ્ઝોસાય તિટ્ઠતિ. તસ્સ તં અનભિનન્દતો અનભિવદતો અનજ્ઝોસાય તિટ્ઠતો ન તન્નિસ્સિતં વિઞ્ઞાણં હોતિ, ન તદુપાદાનં. અનુપાદાનો, દેવાનમિન્દ, ભિક્ખુ પરિનિબ્બાયતિ…પે….

‘‘સન્તિ ખો, દેવાનમિન્દ, જિવ્હાવિઞ્ઞેય્યા રસા…પે… સન્તિ ખો, દેવાનમિન્દ, મનોવિઞ્ઞેય્યા ધમ્મા ઇટ્ઠા કન્તા મનાપા પિયરૂપા કામૂપસંહિતા રજનીયા. તઞ્ચે ભિક્ખુ નાભિનન્દતિ નાભિવદતિ નાજ્ઝોસાય તિટ્ઠતિ. તસ્સ તં અનભિનન્દતો અનભિવદતો અનજ્ઝોસાય તિટ્ઠતો ન તન્નિસ્સિતં વિઞ્ઞાણં હોતિ ન તદુપાદાનં. અનુપાદાનો, દેવાનમિન્દ, ભિક્ખુ પરિનિબ્બાયતિ. અયં ખો, દેવાનમિન્દ, હેતુ, અયં પચ્ચયો યેન મિધેકચ્ચે સત્તા દિટ્ઠેવ ધમ્મે પરિનિબ્બાયન્તી’’તિ. પઞ્ચમં.