૧૦. ઉદકસુત્તં

૧૦૩. ‘‘ઉદકો [ઉદ્દકો (સી. પી.)] સુદં, ભિક્ખવે, રામપુત્તો એવં વાચં ભાસતિ – ‘ઇદં જાતુ વેદગૂ, ઇદં જાતુ સબ્બજી [સબ્બજિ (પી.)], ઇદં જાતુ અપલિખતં ગણ્ડમૂલં પલિખણિ’ન્તિ. તં ખો પનેતં, ભિક્ખવે, ઉદકો રામપુત્તો અવેદગૂયેવ સમાનો ‘વેદગૂસ્મી’તિ ભાસતિ, અસબ્બજીયેવ સમાનો ‘સબ્બજીસ્મી’તિ ભાસતિ, અપલિખતંયેવ ગણ્ડમૂલં પલિખતં મે ‘ગણ્ડમૂલ’ન્તિ ભાસતિ. ઇધ ખો તં, ભિક્ખવે, ભિક્ખુ સમ્મા વદમાનો વદેય્ય – ‘ઇદં જાતુ વેદગૂ, ઇદં જાતુ સબ્બજી, ઇદં જાતુ અપલિખતં ગણ્ડમૂલં પલિખણિ’’’ન્તિ.

‘‘કથઞ્ચ, ભિક્ખવે, વેદગૂ હોતિ? યતો ખો, ભિક્ખવે, ભિક્ખુ છન્નં ફસ્સાયતનાનં સમુદયઞ્ચ અત્થઙ્ગમઞ્ચ અસ્સાદઞ્ચ આદીનવઞ્ચ નિસ્સરણઞ્ચ યથાભૂતં પજાનાતિ; એવં ખો, ભિક્ખવે, ભિક્ખુ વેદગૂ હોતિ.

‘‘કથઞ્ચ, ભિક્ખવે, ભિક્ખુ સબ્બજી હોતિ? યતો ખો, ભિક્ખવે, ભિક્ખુ છન્નં ફસ્સાયતનાનં સમુદયઞ્ચ અત્થઙ્ગમઞ્ચ અસ્સાદઞ્ચ આદીનવઞ્ચ નિસ્સરણઞ્ચ યથાભૂતં વિદિત્વા અનુપાદાવિમુત્તો હોતિ; એવં ખો, ભિક્ખવે, ભિક્ખુ સબ્બજી હોતિ.

‘‘કથઞ્ચ, ભિક્ખવે, ભિક્ખુનો અપલિખતં ગણ્ડમૂલં પલિખતં હોતિ? ગણ્ડોતિ ખો, ભિક્ખવે, ઇમસ્સેતં ચાતુમહાભૂતિકસ્સ કાયસ્સ અધિવચનં માતાપેત્તિકસમ્ભવસ્સ ઓદનકુમ્માસૂપચયસ્સ અનિચ્ચુચ્છાદનપરિમદ્દનભેદનવિદ્ધંસનધમ્મસ્સ. ગણ્ડમૂલન્તિ ખો, ભિક્ખવે, તણ્હાયેતં અધિવચનં. યતો ખો, ભિક્ખવે, ભિક્ખુનો તણ્હા પહીના હોતિ ઉચ્છિન્નમૂલા તાલાવત્થુકતા અનભાવઙ્કતા આયતિં અનુપ્પાદધમ્મા; એવં ખો, ભિક્ખવે, ભિક્ખુનો અપલિખતં ગણ્ડમૂલં પલિખતં હોતિ.

‘‘ઉદકો સુદં, ભિક્ખવે, રામપુત્તો એવં વાચં ભાસતિ – ‘ઇદં જાતુ વેદગૂ, ઇદં જાતુ સબ્બજી, ઇદં જાતુ અપલિખતં ગણ્ડમૂલં પલિખણિ’ન્તિ. તં ખો પનેતં, ભિક્ખવે, ઉદકો રામપુત્તો અવેદગૂયેવ સમાનો ‘વેદગૂસ્મી’તિ ભાસતિ, અસબ્બજીયેવ સમાનો ‘સબ્બજીસ્મી’તિ ભાસતિ; અપલિખતંયેવ ગણ્ડમૂલં ‘પલિખતં મે ગણ્ડમૂલ’ન્તિ ભાસતિ. ઇધ ખો તં, ભિક્ખવે, ભિક્ખુ સમ્મા વદમાનો વદેય્ય – ‘ઇદં જાતુ વેદગૂ, ઇદં જાતુ સબ્બજી, ઇદં જાતુ અપલિખતં ગણ્ડમૂલં પલિખણિ’’’ન્તિ. દસમં.

સળવગ્ગો દસમો.

તસ્સુદ્દાનં –

દ્વે સંગય્હા પરિહાનં, પમાદવિહારી ચ સંવરો;

સમાધિ પટિસલ્લાનં, દ્વે નતુમ્હાકેન ઉદ્દકોતિ.

સળાયતનવગ્ગે દુતિયપણ્ણાસકો સમત્તો.

તસ્સ વગ્ગુદ્દાનં –

અવિજ્જા મિગજાલઞ્ચ, ગિલાનં છન્નં ચતુત્થકં;

સળવગ્ગેન પઞ્ઞાસં, દુતિયો પણ્ણાસકો અયન્તિ.

પઠમસતકં.