૧. ચક્ખુસુત્તં

૩૦૨. સાવત્થિનિદાનં. ‘‘ચક્ખું, ભિક્ખવે, અનિચ્ચં વિપરિણામિ અઞ્ઞથાભાવિ; સોતં અનિચ્ચં વિપરિણામિ અઞ્ઞથાભાવિ; ઘાનં અનિચ્ચં વિપરિણામિ અઞ્ઞથાભાવિ; જિવ્હા અનિચ્ચા વિપરિણામી અઞ્ઞથાભાવી [વિપરિણામિની અઞ્ઞથાભાવિની (?)]; કાયો અનિચ્ચો વિપરિણામી અઞ્ઞથાભાવી; મનો અનિચ્ચો વિપરિણામી અઞ્ઞથાભાવી. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ – અયં વુચ્ચતિ સદ્ધાનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ [અભબ્બોવ (સી. સ્યા. કં.)] તાવ કાલં કાતું યાવ ન સોતાપત્તિફલં સચ્છિકરોતિ’’.

‘‘યસ્સ ખો, ભિક્ખવે, ઇમે ધમ્મા એવં પઞ્ઞાય મત્તસો નિજ્ઝાનં ખમન્તિ, અયં વુચ્ચતિ – ‘ધમ્માનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ તાવ કાલં કાતું યાવ ન સોતાપત્તિફલં સચ્છિકરોતિ’. યો, ભિક્ખવે, ઇમે ધમ્મે એવં પજાનાતિ એવં પસ્સતિ, અયં વુચ્ચતિ – ‘સોતાપન્નો અવિનિપાતધમ્મો નિયતો સમ્બોધિપરાયનો’’’તિ. પઠમં.