૨. રૂપસુત્તં

૩૦૩. સાવત્થિનિદાનં. ‘‘રૂપા, ભિક્ખવે, અનિચ્ચા વિપરિણામિનો અઞ્ઞથાભાવિનો; સદ્દા અનિચ્ચા વિપરિણામિનો અઞ્ઞથાભાવિનો; ગન્ધા અનિચ્ચા વિપરિણામિનો અઞ્ઞથાભાવિનો; રસા અનિચ્ચા વિપરિણામિનો અઞ્ઞથાભાવિનો; ફોટ્ઠબ્બા અનિચ્ચા વિપરિણામિનો અઞ્ઞથાભાવિનો; ધમ્મા અનિચ્ચા વિપરિણામિનો અઞ્ઞથાભાવિનો. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ, અયં વુચ્ચતિ સદ્ધાનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ તાવ કાલં કાતું યાવ ન સોતાપત્તિફલં સચ્છિકરોતિ’’.

‘‘યસ્સ ખો, ભિક્ખવે, ઇમે ધમ્મા એવં પઞ્ઞાય મત્તસો નિજ્ઝાનં ખમન્તિ, અયં વુચ્ચતિ – ‘ધમ્માનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ તાવ કાલં કાતું યાવ ન સોતાપત્તિફલં સચ્છિકરોતિ’. યો, ભિક્ખવે, ઇમે ધમ્મે એવં પજાનાતિ એવં પસ્સતિ, અયં વુચ્ચતિ – ‘સોતાપન્નો અવિનિપાતધમ્મો નિયતો સમ્બોધિપરાયનો’’’તિ. દુતિયં.