૪. ઓક્કન્તસંયુત્તં

૧. ચક્ખુસુત્તં

૩૦૨. સાવત્થિનિદાનં. ‘‘ચક્ખું, ભિક્ખવે, અનિચ્ચં વિપરિણામિ અઞ્ઞથાભાવિ; સોતં અનિચ્ચં વિપરિણામિ અઞ્ઞથાભાવિ; ઘાનં અનિચ્ચં વિપરિણામિ અઞ્ઞથાભાવિ; જિવ્હા અનિચ્ચા વિપરિણામી અઞ્ઞથાભાવી [વિપરિણામિની અઞ્ઞથાભાવિની (?)]; કાયો અનિચ્ચો વિપરિણામી અઞ્ઞથાભાવી; મનો અનિચ્ચો વિપરિણામી અઞ્ઞથાભાવી. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ – અયં વુચ્ચતિ સદ્ધાનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ [અભબ્બોવ (સી. સ્યા. કં.)] તાવ કાલં કાતું યાવ ન સોતાપત્તિફલં સચ્છિકરોતિ’’.

‘‘યસ્સ ખો, ભિક્ખવે, ઇમે ધમ્મા એવં પઞ્ઞાય મત્તસો નિજ્ઝાનં ખમન્તિ, અયં વુચ્ચતિ – ‘ધમ્માનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ તાવ કાલં કાતું યાવ ન સોતાપત્તિફલં સચ્છિકરોતિ’. યો, ભિક્ખવે, ઇમે ધમ્મે એવં પજાનાતિ એવં પસ્સતિ, અયં વુચ્ચતિ – ‘સોતાપન્નો અવિનિપાતધમ્મો નિયતો સમ્બોધિપરાયનો’’’તિ. પઠમં.

૨. રૂપસુત્તં

૩૦૩. સાવત્થિનિદાનં. ‘‘રૂપા, ભિક્ખવે, અનિચ્ચા વિપરિણામિનો અઞ્ઞથાભાવિનો; સદ્દા અનિચ્ચા વિપરિણામિનો અઞ્ઞથાભાવિનો; ગન્ધા અનિચ્ચા વિપરિણામિનો અઞ્ઞથાભાવિનો; રસા અનિચ્ચા વિપરિણામિનો અઞ્ઞથાભાવિનો; ફોટ્ઠબ્બા અનિચ્ચા વિપરિણામિનો અઞ્ઞથાભાવિનો; ધમ્મા અનિચ્ચા વિપરિણામિનો અઞ્ઞથાભાવિનો. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ, અયં વુચ્ચતિ સદ્ધાનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ તાવ કાલં કાતું યાવ ન સોતાપત્તિફલં સચ્છિકરોતિ’’.

‘‘યસ્સ ખો, ભિક્ખવે, ઇમે ધમ્મા એવં પઞ્ઞાય મત્તસો નિજ્ઝાનં ખમન્તિ, અયં વુચ્ચતિ – ‘ધમ્માનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ તાવ કાલં કાતું યાવ ન સોતાપત્તિફલં સચ્છિકરોતિ’. યો, ભિક્ખવે, ઇમે ધમ્મે એવં પજાનાતિ એવં પસ્સતિ, અયં વુચ્ચતિ – ‘સોતાપન્નો અવિનિપાતધમ્મો નિયતો સમ્બોધિપરાયનો’’’તિ. દુતિયં.

૩. વિઞ્ઞાણસુત્તં

૩૦૪. સાવત્થિનિદાનં. ‘‘ચક્ખુવિઞ્ઞાણં, ભિક્ખવે, અનિચ્ચં વિપરિણામિ અઞ્ઞથાભાવિ; સોતવિઞ્ઞાણં… ઘાનવિઞ્ઞાણં… જિવ્હાવિઞ્ઞાણં… કાયવિઞ્ઞાણં… મનોવિઞ્ઞાણં અનિચ્ચં વિપરિણામિ અઞ્ઞથાભાવિ. યો ભિક્ખવે…પે… સમ્બોધિપરાયનો’’તિ. તતિયં.

૪. સમ્ફસ્સસુત્તં

૩૦૫. સાવત્થિનિદાનં. ‘‘ચક્ખુસમ્ફસ્સો, ભિક્ખવે, અનિચ્ચો વિપરિણામી અઞ્ઞથાભાવી; સોતસમ્ફસ્સો… ઘાનસમ્ફસ્સો… જિવ્હાસમ્ફસ્સો… કાયસમ્ફસ્સો… મનોસમ્ફસ્સો અનિચ્ચો વિપરિણામી અઞ્ઞથાભાવી. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ, અયં વુચ્ચતિ ‘સદ્ધાનુસારી…પે… સમ્બોધિપરાયનો’’’તિ. ચતુત્થં.

૫. સમ્ફસ્સજાસુત્તં

૩૦૬. સાવત્થિનિદાનં. ‘‘ચક્ખુસમ્ફસ્સજા, ભિક્ખવે, વેદના અનિચ્ચા વિપરિણામી અઞ્ઞથાભાવી; સોતસમ્ફસ્સજા વેદના…પે… ઘાનસમ્ફસ્સજા વેદના…પે… જિવ્હાસમ્ફસ્સજા વેદના…પે… કાયસમ્ફસ્સજા વેદના…પે… મનોસમ્ફસ્સજા વેદના અનિચ્ચા વિપરિણામી અઞ્ઞથાભાવી. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ, અયં વુચ્ચતિ ‘સદ્ધાનુસારી…પે… સમ્બોધિપરાયનો’’’તિ. પઞ્ચમં.

૬. રૂપસઞ્ઞાસુત્તં

૩૦૭. સાવત્થિનિદાનં. ‘‘રૂપસઞ્ઞા, ભિક્ખવે, અનિચ્ચા વિપરિણામી અઞ્ઞથાભાવી; સદ્દસઞ્ઞા… ગન્ધસઞ્ઞા… રસસઞ્ઞા… ફોટ્ઠબ્બસઞ્ઞા… ધમ્મસઞ્ઞા અનિચ્ચા વિપરિણામી અઞ્ઞથાભાવી. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ, અયં વુચ્ચતિ ‘સદ્ધાનુસારી…પે… સમ્બોધિપરાયનો’’’તિ. છટ્ઠં.

૭. રૂપસઞ્ચેતનાસુત્તં

૩૦૮. સાવત્થિનિદાનં. ‘‘રૂપસઞ્ચેતના, ભિક્ખવે, અનિચ્ચા વિપરિણામી અઞ્ઞથાભાવી; સદ્દસઞ્ચેતના… ગન્ધસઞ્ચેતના… રસસઞ્ચેતના… ફોટ્ઠબ્બસઞ્ચેતના… ધમ્મસઞ્ચેતના અનિચ્ચા વિપરિણામી અઞ્ઞથાભાવી. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ, અયં વુચ્ચતિ ‘સદ્ધાનુસારી…પે… સમ્બોધિપરાયનો’’’તિ. સત્તમં.

૮. રૂપતણ્હાસુત્તં

૩૦૯. સાવત્થિનિદાનં. ‘‘રૂપતણ્હા, ભિક્ખવે, અનિચ્ચા વિપરિણામી અઞ્ઞથાભાવી; સદ્દતણ્હા… ગન્ધતણ્હા… રસતણ્હા… ફોટ્ઠબ્બતણ્હા… ધમ્મતણ્હા અનિચ્ચા વિપરિણામી અઞ્ઞથાભાવી. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ, અયં વુચ્ચતિ ‘સદ્ધાનુસારી…પે… સમ્બોધિપરાયનો’’’તિ. અટ્ઠમં.

૯. પથવીધાતુસુત્તં

૩૧૦. સાવત્થિનિદાનં. ‘‘પથવીધાતુ, ભિક્ખવે, અનિચ્ચા વિપરિણામી અઞ્ઞથાભાવી; આપોધાતુ… તેજોધાતુ… વાયોધાતુ… આકાસધાતુ… વિઞ્ઞાણધાતુ અનિચ્ચા વિપરિણામી અઞ્ઞથાભાવી. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ, અયં વુચ્ચતિ ‘સદ્ધાનુસારી…પે… સમ્બોધિપરાયનો’’’તિ. નવમં.

૧૦. ખન્ધસુત્તં

૩૧૧. સાવત્થિનિદાનં. ‘‘રૂપં, ભિક્ખવે, અનિચ્ચં વિપરિણામિ અઞ્ઞથાભાવિ; વેદના અનિચ્ચા વિપરિણામી અઞ્ઞથાભાવી; સઞ્ઞા… સઙ્ખારા અનિચ્ચા વિપરિણામિનો અઞ્ઞથાભાવિનો; વિઞ્ઞાણં અનિચ્ચં વિપરિણામિ અઞ્ઞથાભાવિ. યો, ભિક્ખવે, ઇમે ધમ્મે એવં સદ્દહતિ અધિમુચ્ચતિ, અયં વુચ્ચતિ સદ્ધાનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ તાવ કાલં કાતું યાવ ન સોતાપત્તિફલં સચ્છિકરોતિ’’.

‘‘યસ્સ ખો, ભિક્ખવે, ઇમે ધમ્મા એવં પઞ્ઞાય મત્તસો નિજ્ઝાનં ખમન્તિ, અયં વુચ્ચતિ – ‘ધમ્માનુસારી, ઓક્કન્તો સમ્મત્તનિયામં, સપ્પુરિસભૂમિં ઓક્કન્તો, વીતિવત્તો પુથુજ્જનભૂમિં; અભબ્બો તં કમ્મં કાતું, યં કમ્મં કત્વા નિરયં વા તિરચ્છાનયોનિં વા પેત્તિવિસયં વા ઉપપજ્જેય્ય; અભબ્બો ચ તાવ કાલં કાતું યાવ ન સોતાપત્તિફલં સચ્છિકરોતિ’. યો, ભિક્ખવે, ઇમે ધમ્મે એવં પજાનાતિ એવં પસ્સતિ, અયં વુચ્ચતિ – ‘સોતાપન્નો અવિનિપાતધમ્મો નિયતો સમ્બોધિપરાયનો’’’તિ. દસમં.

ઓક્કન્તસંયુત્તં [ઓક્કન્તિકસંયુત્તં (પી. ક.)] સમત્તં.