૧૦. તતિયકોટ્ઠિકસુત્તં

૧૩૫. તઞ્ઞેવ નિદાનં. એકમન્તં નિસિન્નો ખો આયસ્મા સારિપુત્તો આયસ્મન્તં મહાકોટ્ઠિકં એતદવોચ – ‘‘‘અવિજ્જા, અવિજ્જા’તિ, આવુસો કોટ્ઠિક, વુચ્ચતિ. કતમા નુ ખો, આવુસો, અવિજ્જા, કિત્તાવતા ચ અવિજ્જાગતો હોતી’’તિ?

‘‘ઇધાવુસો, અસ્સુતવા પુથુજ્જનો રૂપં નપ્પજાનાતિ, રૂપસમુદયં નપ્પજાનાતિ, રૂપનિરોધં નપ્પજાનાતિ, રૂપનિરોધગામિનિં પટિપદં નપ્પજાનાતિ. વેદનં નપ્પજાનાતિ…પે… સઞ્ઞં… સઙ્ખારે… વિઞ્ઞાણં નપ્પજાનાતિ, વિઞ્ઞાણસમુદયં નપ્પજાનાતિ, વિઞ્ઞાણનિરોધં નપ્પજાનાતિ, વિઞ્ઞાણનિરોધગામિનિં પટિપદં નપ્પજાનાતિ. અયં વુચ્ચતાવુસો, અવિજ્જા; એત્તાવતા ચ અવિજ્જાગતો હોતી’’તિ.

એવં વુત્તે, આયસ્મા સારિપુત્તો આયસ્મન્તં મહાકોટ્ઠિકં એતદવોચ – ‘‘‘વિજ્જા, વિજ્જા’તિ, આવુસો કોટ્ઠિક, વુચ્ચતિ. કતમા નુ ખો, આવુસો, વિજ્જા, કિત્તાવતા ચ વિજ્જાગતો હોતી’’તિ? ‘‘ઇધાવુસો, સુતવા અરિયસાવકો રૂપં પજાનાતિ, રૂપસમુદયં પજાનાતિ, રૂપનિરોધં પજાનાતિ, રૂપનિરોધગામિનિં પટિપદં પજાનાતિ. વેદનં… સઞ્ઞં… સઙ્ખારે… વિઞ્ઞાણં પજાનાતિ, વિઞ્ઞાણસમુદયં પજાનાતિ, વિઞ્ઞાણનિરોધં પજાનાતિ, વિઞ્ઞાણનિરોધગામિનિં પટિપદં પજાનાતિ. અયં વુચ્ચતાવુસો, વિજ્જા; એત્તાવતા ચ વિજ્જાગતો હોતી’’તિ. દસમં.

અવિજ્જાવગ્ગો તેરસમો.

તસ્સુદ્દાનં –

સમુદયધમ્મે તીણિ, અસ્સાદો અપરે દુવે;

સમુદયે ચ દ્વે વુત્તા, કોટ્ઠિકે અપરે તયોતિ.