૧૪. કુક્કુળવગ્ગો

૧. કુક્કુળસુત્તં

૧૩૬. સાવત્થિનિદાનં. ‘‘રૂપં, ભિક્ખવે, કુક્કુળં, વેદના કુક્કુળા, સઞ્ઞા કુક્કુળા, સઙ્ખારા કુક્કુળા, વિઞ્ઞાણં કુક્કુળં. એવં પસ્સં, ભિક્ખવે, સુતવા અરિયસાવકો રૂપસ્મિમ્પિ નિબ્બિન્દતિ, વેદનાયપિ નિબ્બિન્દતિ, સઞ્ઞાયપિ નિબ્બિન્દતિ, સઙ્ખારેસુપિ નિબ્બિન્દતિ, વિઞ્ઞાણસ્મિમ્પિ નિબ્બિન્દતિ. નિબ્બિન્દં વિરજ્જતિ; વિરાગા વિમુચ્ચતિ. વિમુત્તસ્મિં વિમુત્તમિતિ ઞાણં હોતિ. ‘ખીણા જાતિ, વુસિતં બ્રહ્મચરિયં, કતં કરણીયં, નાપરં ઇત્થત્તાયા’તિ પજાનાતી’’તિ. પઠમં.

૨. અનિચ્ચસુત્તં

૧૩૭. સાવત્થિનિદાનં. ‘‘યં, ભિક્ખવે, અનિચ્ચં; તત્ર વો છન્દો પહાતબ્બો. કિઞ્ચ, ભિક્ખવે, અનિચ્ચં? રૂપં, ભિક્ખવે, અનિચ્ચં; તત્ર વો છન્દો પહાતબ્બો. વેદના અનિચ્ચા…પે… સઞ્ઞા… સઙ્ખારા… વિઞ્ઞાણં અનિચ્ચં; તત્ર વો છન્દો પહાતબ્બો. યં, ભિક્ખવે, અનિચ્ચં; તત્ર વો છન્દો પહાતબ્બો’’તિ. દુતિયં.

૩. દુતિયઅનિચ્ચસુત્તં

૧૩૮. સાવત્થિનિદાનં. ‘‘યં, ભિક્ખવે, અનિચ્ચં; તત્ર વો રાગો પહાતબ્બો. કિઞ્ચ, ભિક્ખવે, અનિચ્ચં? રૂપં, ભિક્ખવે, અનિચ્ચં; તત્ર વો રાગો પહાતબ્બો. વેદના અનિચ્ચા… સઞ્ઞા… સઙ્ખારા… વિઞ્ઞાણં અનિચ્ચં; તત્ર વો રાગો પહાતબ્બો. યં, ભિક્ખવે, અનિચ્ચં; તત્ર વો રાગો પહાતબ્બો’’તિ. તતિયં.

૪. તતિયઅનિચ્ચસુત્તં

૧૩૯. સાવત્થિનિદાનં. ‘‘યં, ભિક્ખવે, અનિચ્ચં; તત્ર વો છન્દરાગો પહાતબ્બો. કિઞ્ચ, ભિક્ખવે, અનિચ્ચં? રૂપં, ભિક્ખવે, અનિચ્ચં, તત્ર વો છન્દરાગો પહાતબ્બો. વેદના અનિચ્ચા… સઞ્ઞા… સઙ્ખારા… વિઞ્ઞાણં અનિચ્ચં; તત્ર વો છન્દરાગો પહાતબ્બો. યં, ભિક્ખવે, અનિચ્ચં; તત્ર વો છન્દરાગો પહાતબ્બો’’તિ. ચતુત્થં.

૫. દુક્ખસુત્તં

૧૪૦. સાવત્થિનિદાનં. ‘‘યં, ભિક્ખવે, દુક્ખં; તત્ર વો છન્દો પહાતબ્બો…પે… યં, ભિક્ખવે, દુક્ખં; તત્ર વો છન્દો પહાતબ્બો’’તિ. પઞ્ચમં.

૬. દુતિયદુક્ખસુત્તં

૧૪૧. સાવત્થિનિદાનં. ‘‘યં, ભિક્ખવે, દુક્ખં; તત્ર વો રાગો પહાતબ્બો…પે… યં, ભિક્ખવે, દુક્ખં; તત્ર વો રાગો પહાતબ્બો’’તિ. છટ્ઠં.

૭. તતિયદુક્ખસુત્તં

૧૪૨. સાવત્થિનિદાનં. ‘‘યં, ભિક્ખવે, દુક્ખં; તત્ર વો છન્દરાગો પહાતબ્બો…પે… યં, ભિક્ખવે, દુક્ખં; તત્ર વો છન્દરાગો પહાતબ્બો’’તિ. સત્તમં.

૮. અનત્તસુત્તં

૧૪૩. સાવત્થિનિદાનં. ‘‘યો, ભિક્ખવે, અનત્તા; તત્ર વો છન્દો પહાતબ્બો. કો ચ, ભિક્ખવે, અનત્તા? રૂપં, ભિક્ખવે, અનત્તા; તત્ર વો છન્દો પહાતબ્બો. વેદના અનત્તા… સઞ્ઞા… સઙ્ખારા… વિઞ્ઞાણં અનત્તા; તત્ર વો છન્દો પહાતબ્બો. યો, ભિક્ખવે, અનત્તા; તત્ર વો છન્દો પહાતબ્બો’’તિ. અટ્ઠમં.

૯. દુતિયઅનત્તસુત્તં

૧૪૪. સાવત્થિનિદાનં. ‘‘યો, ભિક્ખવે, અનત્તા; તત્ર વો રાગો પહાતબ્બો. કો ચ, ભિક્ખવે, અનત્તા? રૂપં, ભિક્ખવે, અનત્તા; તત્ર વો રાગો પહાતબ્બો. વેદના અનત્તા… સઞ્ઞા… સઙ્ખારા… વિઞ્ઞાણં અનત્તા; તત્ર વો રાગો પહાતબ્બો. યો, ભિક્ખવે, અનત્તા; તત્ર વો રાગો પહાતબ્બો’’તિ. નવમં.

૧૦. તતિયઅનત્તસુત્તં

૧૪૫. સાવત્થિનિદાનં. ‘‘યો, ભિક્ખવે, અનત્તા; તત્ર વો છન્દરાગો પહાતબ્બો. કો ચ, ભિક્ખવે, અનત્તા? રૂપં, ભિક્ખવે, અનત્તા; તત્ર વો છન્દરાગો પહાતબ્બો. વેદના અનત્તા… સઞ્ઞા… સઙ્ખારા… વિઞ્ઞાણં અનત્તા; તત્ર વો છન્દરાગો પહાતબ્બો. યો, ભિક્ખવે, અનત્તા; તત્ર વો છન્દરાગો પહાતબ્બો’’તિ. દસમં.

૧૧. નિબ્બિદાબહુલસુત્તં

૧૪૬. સાવત્થિનિદાનં. ‘‘સદ્ધાપબ્બજિતસ્સ, ભિક્ખવે, કુલપુત્તસ્સ અયમનુધમ્મો હોતિ – યં રૂપે નિબ્બિદાબહુલો [નિબ્બિદાબહુલં (સ્યા. કં. પી. ક.)] વિહરેય્ય. વેદનાય…પે… સઞ્ઞાય… સઙ્ખારેસુ… વિઞ્ઞાણે નિબ્બિદાબહુલો વિહરેય્ય. યો રૂપે નિબ્બિદાબહુલો વિહરન્તો, વેદનાય… સઞ્ઞાય… સઙ્ખારેસુ… વિઞ્ઞાણે નિબ્બિદાબહુલો વિહરન્તો રૂપં પરિજાનાતિ, વેદનં… સઞ્ઞં… સઙ્ખારે… વિઞ્ઞાણં પરિજાનાતિ; સો રૂપં પરિજાનં વેદનં પરિજાનં સઞ્ઞં પરિજાનં સઙ્ખારે પરિજાનં વિઞ્ઞાણં પરિજાનં પરિમુચ્ચતિ રૂપમ્હા, પરિમુચ્ચતિ વેદનાય, પરિમુચ્ચતિ સઞ્ઞાય, પરિમુચ્ચતિ સઙ્ખારેહિ, પરિમુચ્ચતિ વિઞ્ઞાણમ્હા, પરિમુચ્ચતિ જાતિયા જરાય મરણેન સોકેહિ પરિદેવેહિ દુક્ખેહિ દોમનસ્સેહિ ઉપાયાસેહિ; ‘પરિમુચ્ચતિ દુક્ખસ્મા’તિ વદામી’’તિ. એકાદસમં.

૧૨. અનિચ્ચાનુપસ્સીસુત્તં

૧૪૭. સાવત્થિનિદાનં. ‘‘સદ્ધાપબ્બજિતસ્સ, ભિક્ખવે, કુલપુત્તસ્સ અયમનુધમ્મો હોતિ – યં રૂપે અનિચ્ચાનુપસ્સી વિહરેય્ય. વેદનાય… સઞ્ઞાય… સઙ્ખારેસુ… વિઞ્ઞાણે અનિચ્ચાનુપસ્સી વિહરેય્ય…પે… ‘પરિમુચ્ચતિ દુક્ખસ્મા’તિ વદામી’’તિ. દ્વાદસમં.

૧૩. દુક્ખાનુપસ્સીસુત્તં

૧૪૮. સાવત્થિનિદાનં. ‘‘સદ્ધાપબ્બજિતસ્સ, ભિક્ખવે, કુલપુત્તસ્સ અયમનુધમ્મો હોતિ – યં રૂપે દુક્ખાનુપસ્સી વિહરેય્ય. વેદનાય… સઞ્ઞાય… સઙ્ખારેસુ… વિઞ્ઞાણે દુક્ખાનુપસ્સી વિહરેય્ય…પે… ‘પરિમુચ્ચતિ દુક્ખસ્મા’તિ વદામી’’તિ. તેરસમં.

૧૪. અનત્તાનુપસ્સીસુત્તં

૧૪૯. સાવત્થિનિદાનં. ‘‘સદ્ધાપબ્બજિતસ્સ, ભિક્ખવે, કુલપુત્તસ્સ અયમનુધમ્મો હોતિ – યં રૂપે અનત્તાનુપસ્સી વિહરેય્ય. વેદનાય… સઞ્ઞાય… સઙ્ખારેસુ… વિઞ્ઞાણે અનત્તાનુપસ્સી વિહરેય્ય. (સો રૂપે) અનત્તાનુપસ્સી વિહરન્તો, વેદનાય… સઞ્ઞાય… સઙ્ખારેસુ… વિઞ્ઞાણે અનત્તાનુપસ્સી વિહરન્તો રૂપં પરિજાનાતિ, વેદનં…પે… સઞ્ઞં… સઙ્ખારે… વિઞ્ઞાણં પરિજાનાતિ. સો રૂપં પરિજાનં વેદનં પરિજાનં સઞ્ઞં પરિજાનં સઙ્ખારે પરિજાનં વિઞ્ઞાણં પરિજાનં પરિમુચ્ચતિ રૂપમ્હા, પરિમુચ્ચતિ વેદનાય, પરિમુચ્ચતિ સઞ્ઞાય, પરિમુચ્ચતિ સઙ્ખારેહિ, પરિમુચ્ચતિ વિઞ્ઞાણમ્હા, પરિમુચ્ચતિ જાતિયા જરાય મરણેન સોકેહિ પરિદેવેહિ દુક્ખેહિ દોમનસ્સેહિ ઉપાયાસેહિ; ‘પરિમુચ્ચતિ દુક્ખસ્મા’તિ વદામી’’તિ. ચુદ્દસમં.

કુક્કુળવગ્ગો ચુદ્દસમો.

તસ્સુદ્દાનં –

કુક્કુળા તયો અનિચ્ચેન, દુક્ખેન અપરે તયો;

અનત્તેન તયો વુત્તા, કુલપુત્તેન દ્વે દુકાતિ.