૩. સક્કાયસુત્તં

૧૦૫. સાવત્થિનિદાનં. ‘‘સક્કાયઞ્ચ વો, ભિક્ખવે, દેસેસ્સામિ સક્કાયસમુદયઞ્ચ સક્કાયનિરોધઞ્ચ સક્કાયનિરોધગામિનિઞ્ચ પટિપદં. તં સુણાથ. કતમો ચ, ભિક્ખવે, સક્કાયો? પઞ્ચુપાદાનક્ખન્ધાતિસ્સ વચનીયં. કતમે પઞ્ચ? સેય્યથિદં – રૂપુપાદાનક્ખન્ધો, વેદનુપાદાનક્ખન્ધો, સઞ્ઞુપાદાનક્ખન્ધો, સઙ્ખારુપાદાનક્ખન્ધો, વિઞ્ઞાણુપાદાનક્ખન્ધો. અયં વુચ્ચતિ, ભિક્ખવે, સક્કાયો. કતમો ચ, ભિક્ખવે, સક્કાયસમુદયો? યાયં તણ્હા પોનોભવિકા…પે… કામતણ્હા, ભવતણ્હા, વિભવતણ્હા – અયં વુચ્ચતિ, ભિક્ખવે, સક્કાયસમુદયો. કતમો ચ, ભિક્ખવે, સક્કાયનિરોધો? યો તસ્સાયેવ તણ્હાય…પે… અયં વુચ્ચતિ, ભિક્ખવે, સક્કાયનિરોધો. કતમા ચ, ભિક્ખવે, સક્કાયનિરોધગામિની પટિપદા? અયમેવ અરિયો અટ્ઠઙ્ગિકો મગ્ગો. સેય્યથિદં – સમ્માદિટ્ઠિ…પે… સમ્માસમાધિ. અયં વુચ્ચતિ, ભિક્ખવે, સક્કાયનિરોધગામિની પટિપદા’’તિ. તતિયં.