૪. પરિઞ્ઞેય્યસુત્તં

૧૦૬. સાવત્થિનિદાનં. ‘‘પરિઞ્ઞેય્યે ચ, ભિક્ખવે, ધમ્મે દેસેસ્સામિ પરિઞ્ઞઞ્ચ પરિઞ્ઞાતાવિઞ્ચ પુગ્ગલં. તં સુણાથ. કતમે ચ, ભિક્ખવે, પરિઞ્ઞેય્યા ધમ્મા? રૂપં, ભિક્ખવે, પરિઞ્ઞેય્યો ધમ્મો. વેદના…પે… સઞ્ઞા… સઙ્ખારા… વિઞ્ઞાણં પરિઞ્ઞેય્યો ધમ્મો. ઇમે વુચ્ચન્તિ, ભિક્ખવે, પરિઞ્ઞેય્યા ધમ્મા. કતમા ચ, ભિક્ખવે, પરિઞ્ઞા? રાગક્ખયો, દોસક્ખયો, મોહક્ખયો – અયં વુચ્ચતિ, ભિક્ખવે, પરિઞ્ઞા. કતમો ચ, ભિક્ખવે, પરિઞ્ઞાતાવી પુગ્ગલો? અરહાતિસ્સ વચનીયં. ય્વાયં આયસ્મા એવંનામો એવંગોત્તો – અયં વુચ્ચતિ, ભિક્ખવે, પરિઞ્ઞાતાવી પુગ્ગલો’’તિ. ચતુત્થં.