૨. દુક્ખસુત્તં

૧૦૪. સાવત્થિનિદાનં. ‘‘દુક્ખઞ્ચ વો, ભિક્ખવે, દેસેસ્સામિ દુક્ખસમુદયઞ્ચ દુક્ખનિરોધઞ્ચ દુક્ખનિરોધગામિનિઞ્ચ પટિપદં. તં સુણાથ. કતમઞ્ચ, ભિક્ખવે, દુક્ખં? પઞ્ચુપાદાનક્ખન્ધાતિસ્સ વચનીયં. કતમે પઞ્ચ? સેય્યથિદં – રૂપુપાદાનક્ખન્ધો…પે… વિઞ્ઞાણુપાદાનક્ખન્ધો. ઇદં વુચ્ચતિ, ભિક્ખવે, દુક્ખં. કતમો ચ, ભિક્ખવે, દુક્ખસમુદયો? યાયં તણ્હા પોનોભવિકા…પે… કામતણ્હા, ભવતણ્હા, વિભવતણ્હા – અયં વુચ્ચતિ, ભિક્ખવે, દુક્ખસમુદયો. કતમો ચ, ભિક્ખવે, દુક્ખનિરોધો? યો તસ્સાયેવ તણ્હાય અસેસવિરાગનિરોધો ચાગો પટિનિસ્સગ્ગો મુત્તિ અનાલયો – અયં વુચ્ચતિ, ભિક્ખવે, દુક્ખનિરોધો. કતમા ચ, ભિક્ખવે, દુક્ખનિરોધગામિની પટિપદા? અયમેવ અરિયો અટ્ઠઙ્ગિકો મગ્ગો. સેય્યથિદં – સમ્માદિટ્ઠિ…પે… સમ્માસમાધિ. અયં વુચ્ચતિ, ભિક્ખવે, દુક્ખનિરોધગામિની પટિપદા’’તિ. દુતિયં.