૧. અન્તસુત્તં

૧૦૩. સાવત્થિનિદાનં. ‘‘ચત્તારોમે, ભિક્ખવે, અન્તા. કતમે ચત્તારો? સક્કાયન્તો, સક્કાયસમુદયન્તો, સક્કાયનિરોધન્તો, સક્કાયનિરોધગામિનિપ્પટિપદન્તો. કતમો ચ, ભિક્ખવે, સક્કાયન્તો? પઞ્ચુપાદાનક્ખન્ધાતિસ્સ વચનીયં. કતમે પઞ્ચ? સેય્યથિદં – રૂપુપાદાનક્ખન્ધો, વેદનુપાદાનક્ખન્ધો, સઞ્ઞુપાદાનક્ખન્ધો, સઙ્ખારુપાદાનક્ખન્ધો, વિઞ્ઞાણુપાદાનક્ખન્ધો – અયં વુચ્ચતિ, ભિક્ખવે, સક્કાયન્તો’’.

‘‘કતમો ચ, ભિક્ખવે, સક્કાયસમુદયન્તો? યાયં તણ્હા પોનોભવિકા નન્દિરાગસહગતા તત્રતત્રાભિનન્દિની, સેય્યથિદં – કામતણ્હા, ભવતણ્હા, વિભવતણ્હા. અયં વુચ્ચતિ, ભિક્ખવે, સક્કાયસમુદયન્તો.

‘‘કતમો ચ, ભિક્ખવે, સક્કાયનિરોધન્તો? યો તસ્સાયેવ તણ્હાય અસેસવિરાગનિરોધો ચાગો પટિનિસ્સગ્ગો મુત્તિ અનાલયો – અયં વુચ્ચતિ, ભિક્ખવે, સક્કાયનિરોધન્તો.

‘‘કતમો ચ, ભિક્ખવે, સક્કાયનિરોધગામિનિપ્પટિપદન્તો? અયમેવ અરિયો અટ્ઠઙ્ગિકો મગ્ગો. સેય્યથિદં – સમ્માદિટ્ઠિ, સમ્માસઙ્કપ્પો, સમ્માવાચા, સમ્માકમ્મન્તો, સમ્માઆજીવો, સમ્માવાયામો, સમ્માસતિ, સમ્માસમાધિ. અયં વુચ્ચતિ, ભિક્ખવે, સક્કાયનિરોધગામિનિપ્પટિપદન્તો. ઇમે ખો, ભિક્ખવે, ચત્તારો અન્તા’’તિ. પઠમં.