૯. નાગસુત્તં

૨૩૧. એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન અઞ્ઞતરો નવો ભિક્ખુ અતિવેલં કુલાનિ ઉપસઙ્કમતિ. તમેનં ભિક્ખૂ એવમાહંસુ – ‘‘માયસ્મા અતિવેલં કુલાનિ ઉપસઙ્કમી’’તિ. સો ભિક્ખુ ભિક્ખૂહિ વુચ્ચમાનો એવમાહ – ‘‘ઇમે હિ નામ થેરા ભિક્ખૂ કુલાનિ ઉપસઙ્કમિતબ્બં મઞ્ઞિસ્સન્તિ, કિમઙ્ગં [કિમઙ્ગ (સી.)] પનાહ’’ન્તિ?

અથ ખો સમ્બહુલા ભિક્ખૂ યેન ભગવા તેનુપસઙ્કમિંસુ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિંસુ. એકમન્તં નિસિન્ના ખો તે ભિક્ખૂ ભગવન્તં એતદવોચું – ‘‘ઇધ, ભન્તે, અઞ્ઞતરો નવો ભિક્ખુ અતિવેલં કુલાનિ ઉપસઙ્કમતિ. તમેનં ભિક્ખૂ એવમાહંસુ – ‘માયસ્મા અતિવેલં કુલાનિ ઉપસઙ્કમી’તિ. સો ભિક્ખુ ભિક્ખૂહિ વુચ્ચમાનો એવમાહ – ‘ઇમે હિ નામ થેરા ભિક્ખૂ કુલાનિ ઉપસઙ્કમિતબ્બં મઞ્ઞિસ્સન્તિ, કિમઙ્ગં પનાહ’’’ન્તિ.

‘‘ભૂતપુબ્બં, ભિક્ખવે, અરઞ્ઞાયતને મહાસરસી. તં નાગા ઉપનિસ્સાય વિહરન્તિ. તે તં સરસિં ઓગાહેત્વા સોણ્ડાય ભિસમુળાલં અબ્બુહેત્વા [અબ્ભૂહેત્વા (ક.), અબ્બાહિત્વા (મહાવ. ૨૭૮)] સુવિક્ખાલિતં વિક્ખાલેત્વા અકદ્દમં સઙ્ખાદિત્વા [સઙ્ખરિત્વા (પી. ક.)] અજ્ઝોહરન્તિ. તેસં તં વણ્ણાય ચેવ હોતિ બલાય ચ, ન ચ તતોનિદાનં મરણં વા નિગચ્છન્તિ મરણમત્તં વા દુક્ખં. તેસંયેવ ખો પન, ભિક્ખવે, મહાનાગાનં અનુસિક્ખમાના તરુણા ભિઙ્કચ્છાપા તં સરસિં ઓગાહેત્વા સોણ્ડાય ભિસમુળાલં અબ્બુહેત્વા ન સુવિક્ખાલિતં વિક્ખાલેત્વા સકદ્દમં અસઙ્ખાદિત્વા અજ્ઝોહરન્તિ. તેસં તં નેવ વણ્ણાય હોતિ ન બલાય. તતોનિદાનં મરણં વા નિગચ્છન્તિ મરણમત્તં વા દુક્ખં.

‘‘એવમેવ ખો, ભિક્ખવે, ઇધ થેરા ભિક્ખૂ પુબ્બણ્હસમયં નિવાસેત્વા પત્તચીવરમાદાય ગામં વા નિગમં વા પિણ્ડાય પવિસન્તિ. તે તત્થ ધમ્મં ભાસન્તિ. તેસં ગિહી પસન્નાકારં કરોન્તિ. તે તં લાભં અગધિતા અમુચ્છિતા અનજ્ઝોપન્ના [અનજ્ઝાપન્ના (સબ્બત્થ) મ. નિ. ૧ પાસરાસિસુત્તવણ્ણના ઓલોકેતબ્બા] આદીનવદસ્સાવિનો નિસ્સરણપઞ્ઞા પરિભુઞ્જન્તિ. તેસં તં વણ્ણાય ચેવ હોતિ બલાય ચ, ન ચ તતોનિદાનં મરણં વા નિગચ્છન્તિ મરણમત્તં વા દુક્ખં. તેસંયેવ ખો પન, ભિક્ખવે, થેરાનં ભિક્ખૂનં અનુસિક્ખમાના નવા ભિક્ખૂ પુબ્બણ્હસમયં નિવાસેત્વા પત્તચીવરમાદાય ગામં વા નિગમં વા પિણ્ડાય પવિસન્તિ. તે તત્થ ધમ્મં ભાસન્તિ. તેસં ગિહી પસન્નાકારં કરોન્તિ. તે તં લાભં ગધિતા મુચ્છિતા અજ્ઝોપન્ના અનાદીનવદસ્સાવિનો અનિસ્સરણપઞ્ઞા પરિભુઞ્જન્તિ. તેસં તં નેવ વણ્ણાય હોતિ ન બલાય, તે તતોનિદાનં મરણં વા નિગચ્છન્તિ મરણમત્તં વા દુક્ખં. તસ્માતિહ, ભિક્ખવે, એવં સિક્ખિતબ્બં – ‘અગધિતા અમુચ્છિતા અનજ્ઝોપન્ના આદીનવદસ્સાવિનો નિસ્સરણપઞ્ઞા તં લાભં પરિભુઞ્જિસ્સામા’તિ. એવઞ્હિ વો, ભિક્ખવે, સિક્ખિતબ્બ’’ન્તિ. નવમં.