૧૦. બિળારસુત્તં

૨૩૨. સાવત્થિયં વિહરતિ. તેન ખો પન સમયેન અઞ્ઞતરો ભિક્ખુ અતિવેલં કુલેસુ ચારિત્તં આપજ્જતિ. તમેનં ભિક્ખૂ એવમાહંસુ – ‘‘માયસ્મા અતિવેલં કુલેસુ ચારિત્તં આપજ્જી’’તિ. સો ભિક્ખુ ભિક્ખૂહિ વુચ્ચમાનો ન વિરમતિ. અથ ખો સમ્બહુલા ભિક્ખૂ યેન ભગવા તેનુપસઙ્કમિંસુ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિંસુ. એકમન્તં નિસિન્ના ખો તે ભિક્ખૂ ભગવન્તં એતદવોચું – ‘‘ઇધ, ભન્તે, અઞ્ઞતરો ભિક્ખુ અતિવેલં કુલેસુ ચારિત્તં આપજ્જતિ. તમેનં ભિક્ખૂ એવમાહંસુ – ‘માયસ્મા અતિવેલં કુલેસુ ચારિત્તં આપજ્જી’તિ. સો ભિક્ખુ ભિક્ખૂહિ વુચ્ચમાનો ન વિરમતી’’તિ.

‘‘ભૂતપુબ્બં, ભિક્ખવે, બિળારો સન્ધિસમલસઙ્કટીરે ઠિતો અહોસિ મુદુમૂસિં મગ્ગયમાનો – ‘યદાયં મુદુમૂસિ ગોચરાય પક્કમિસ્સતિ, તત્થેવ નં ગહેત્વા ખાદિસ્સામી’તિ. અથ ખો સો, ભિક્ખવે, મુદુમૂસિ ગોચરાય પક્કામિ. તમેનં બિળારો ગહેત્વા સહસા સઙ્ખાદિત્વા [સઙ્ખરિત્વા (પી. ક.), મંસં ખાદિત્વા (સ્યા. કં.), અસંખાદિત્વા (કત્થચિ)] અજ્ઝોહરિ. તસ્સ સો મુદુમૂસિ અન્તમ્પિ ખાદિ, અન્તગુણમ્પિ ખાદિ. સો તતોનિદાનં મરણમ્પિ નિગચ્છિ મરણમત્તમ્પિ દુક્ખં.

‘‘એવમેવ ખો, ભિક્ખવે, ઇધેકચ્ચો ભિક્ખુ પુબ્બણ્હસમયં નિવાસેત્વા પત્તચીવરમાદાય ગામં વા નિગમં વા પિણ્ડાય પવિસતિ અરક્ખિતેનેવ કાયેન અરક્ખિતાય વાચાય અરક્ખિતેન ચિત્તેન, અનુપટ્ઠિતાય સતિયા, અસંવુતેહિ ઇન્દ્રિયેહિ. સો તત્થ પસ્સતિ માતુગામં દુન્નિવત્થં વા દુપ્પારુતં વા. તસ્સ માતુગામં દિસ્વા દુન્નિવત્થં વા દુપ્પારુતં વા રાગો ચિત્તં અનુદ્ધંસેતિ. સો રાગાનુદ્ધંસેન ચિત્તેન મરણં વા નિગચ્છતિ મરણમત્તં વા દુક્ખં. મરણઞ્હેતં, ભિક્ખવે, અરિયસ્સ વિનયે યો સિક્ખં પચ્ચક્ખાય હીનાયાવત્તતિ. મરણમત્તઞ્હેતં, ભિક્ખવે, દુક્ખં યદિદં અઞ્ઞતરં સંકિલિટ્ઠં આપત્તિં આપજ્જતિ. યથારૂપાય આપત્તિયા વુટ્ઠાનં પઞ્ઞાયતિ. તસ્માતિહ, ભિક્ખવે, એવં સિક્ખિતબ્બં – ‘રક્ખિતેનેવ કાયેન રક્ખિતાય વાચાય રક્ખિતેન ચિત્તેન, ઉપટ્ઠિતાય સતિયા, સંવુતેહિ ઇન્દ્રિયેહિ ગામં વા નિગમં વા પિણ્ડાય પવિસિસ્સામા’તિ. એવઞ્હિ વો, ભિક્ખવે, સિક્ખિતબ્બ’’ન્તિ. દસમં.