૨. સનિદાનસુત્તં

૯૬. સાવત્થિયં વિહરતિ…પે… ‘‘સનિદાનં, ભિક્ખવે, ઉપ્પજ્જતિ કામવિતક્કો, નો અનિદાનં; સનિદાનં ઉપ્પજ્જતિ બ્યાપાદવિતક્કો, નો અનિદાનં; સનિદાનં ઉપ્પજ્જતિ વિહિંસાવિતક્કો, નો અનિદાનં’’.

‘‘કથઞ્ચ, ભિક્ખવે, સનિદાનં ઉપ્પજ્જતિ કામવિતક્કો, નો અનિદાનં; સનિદાનં ઉપ્પજ્જતિ બ્યાપાદવિતક્કો, નો અનિદાનં; સનિદાનં ઉપ્પજ્જતિ વિહિંસાવિતક્કો, નો અનિદાનં? કામધાતું, ભિક્ખવે, પટિચ્ચ ઉપ્પજ્જતિ કામસઞ્ઞા, કામસઞ્ઞં પટિચ્ચ ઉપ્પજ્જતિ કામસઙ્કપ્પો, કામસઙ્કપ્પં પટિચ્ચ ઉપ્પજ્જતિ કામચ્છન્દો, કામચ્છન્દં પટિચ્ચ ઉપ્પજ્જતિ કામપરિળાહો, કામપરિળાહં પટિચ્ચ ઉપ્પજ્જતિ કામપરિયેસના. કામપરિયેસનં, ભિક્ખવે, પરિયેસમાનો અસ્સુતવા પુથુજ્જનો તીહિ ઠાનેહિ મિચ્છા પટિપજ્જતિ – કાયેન, વાચાય, મનસા.

‘‘બ્યાપાદધાતું, ભિક્ખવે, પટિચ્ચ ઉપ્પજ્જતિ બ્યાપાદસઞ્ઞા, બ્યાપાદસઞ્ઞં પટિચ્ચ ઉપ્પજ્જતિ બ્યાપાદસઙ્કપ્પો…પે… બ્યાપાદચ્છન્દો… બ્યાપાદપરિળાહો… બ્યાપાદપરિયેસના… બ્યાપાદપરિયેસનં, ભિક્ખવે, પરિયેસમાનો અસ્સુતવા પુથુજ્જનો તીહિ ઠાનેહિ મિચ્છા પટિપજ્જતિ – કાયેન, વાચાય, મનસા.

‘‘વિહિંસાધાતું, ભિક્ખવે, પટિચ્ચ ઉપ્પજ્જતિ વિહિંસાસઞ્ઞા; વિહિંસાસઞ્ઞં પટિચ્ચ ઉપ્પજ્જતિ વિહિંસાસઙ્કપ્પો…પે… વિહિંસાછન્દો… વિહિંસાપરિળાહો… વિહિંસાપરિયેસના… વિહિંસાપરિયેસનં, ભિક્ખવે, પરિયેસમાનો અસ્સુતવા પુથુજ્જનો તીહિ ઠાનેહિ મિચ્છા પટિપજ્જતિ – કાયેન, વાચાય, મનસા.

‘‘સેય્યથાપિ, ભિક્ખવે, પુરિસો આદિત્તં તિણુક્કં સુક્ખે તિણદાયે નિક્ખિપેય્ય; નો ચે હત્થેહિ ચ પાદેહિ ચ ખિપ્પમેવ નિબ્બાપેય્ય. એવઞ્હિ, ભિક્ખવે, યે તિણકટ્ઠનિસ્સિતા પાણા તે અનયબ્યસનં આપજ્જેય્યું. એવમેવ ખો, ભિક્ખવે, યો હિ કોચિ સમણો વા બ્રાહ્મણો વા ઉપ્પન્નં વિસમગતં સઞ્ઞં ન ખિપ્પમેવ પજહતિ વિનોદેતિ બ્યન્તીકરોતિ અનભાવં ગમેતિ, સો દિટ્ઠે ચેવ ધમ્મે દુક્ખં વિહરતિ સવિઘાતં સઉપાયાસં સપરિળાહં; કાયસ્સ ચ ભેદા પરં મરણા દુગ્ગતિ પાટિકઙ્ખા.

‘‘સનિદાનં, ભિક્ખવે, ઉપ્પજ્જતિ નેક્ખમ્મવિતક્કો, નો અનિદાનં; સનિદાનં ઉપ્પજ્જતિ અબ્યાપાદવિતક્કો, નો અનિદાનં; સનિદાનં ઉપ્પજ્જતિ અવિહિંસાવિતક્કો, નો અનિદાનં.

‘‘કથઞ્ચ, ભિક્ખવે, સનિદાનં ઉપ્પજ્જતિ નેક્ખમ્મવિતક્કો, નો અનિદાનં; સનિદાનં ઉપ્પજ્જતિ અબ્યાપાદવિતક્કો, નો અનિદાનં; સનિદાનં ઉપ્પજ્જતિ અવિહિંસાવિતક્કો, નો અનિદાનં? નેક્ખમ્મધાતું, ભિક્ખવે, પટિચ્ચ ઉપ્પજ્જતિ નેક્ખમ્મસઞ્ઞા, નેક્ખમ્મસઞ્ઞં પટિચ્ચ ઉપ્પજ્જતિ નેક્ખમ્મસઙ્કપ્પો, નેક્ખમ્મસઙ્કપ્પં પટિચ્ચ ઉપ્પજ્જતિ નેક્ખમ્મચ્છન્દો, નેક્ખમ્મચ્છન્દં પટિચ્ચ ઉપ્પજ્જતિ નેક્ખમ્મપરિળાહો, નેક્ખમ્મપરિળાહં પટિચ્ચ ઉપ્પજ્જતિ નેક્ખમ્મપરિયેસના; નેક્ખમ્મપરિયેસનં, ભિક્ખવે, પરિયેસમાનો સુતવા અરિયસાવકો તીહિ ઠાનેહિ સમ્મા પટિપજ્જતિ – કાયેન, વાચાય, મનસા.

‘‘અબ્યાપાદધાતું, ભિક્ખવે, પટિચ્ચ ઉપ્પજ્જતિ અબ્યાપાદસઞ્ઞા, અબ્યાપાદસઞ્ઞં પટિચ્ચ ઉપ્પજ્જતિ અબ્યાપાદસઙ્કપ્પો…પે… અબ્યાપાદચ્છન્દો… અબ્યાપાદપરિળાહો… અબ્યાપાદપરિયેસના, અબ્યાપાદપરિયેસનં, ભિક્ખવે, પરિયેસમાનો સુતવા અરિયસાવકો તીહિ ઠાનેહિ સમ્મા પટિપજ્જતિ – કાયેન, વાચાય, મનસા.

‘‘અવિહિંસાધાતું, ભિક્ખવે, પટિચ્ચ ઉપ્પજ્જતિ અવિહિંસાસઞ્ઞા, અવિહિંસાસઞ્ઞં પટિચ્ચ ઉપ્પજ્જતિ અવિહિંસાસઙ્કપ્પો, અવિહિંસાસઙ્કપ્પં પટિચ્ચ ઉપ્પજ્જતિ અવિહિંસાછન્દો, અવિહિંસાછન્દં પટિચ્ચ ઉપ્પજ્જતિ અવિહિંસાપરિળાહો, અવિહિંસાપરિળાહં પટિચ્ચ ઉપ્પજ્જતિ અવિહિંસાપરિયેસના; અવિહિંસાપરિયેસનં, ભિક્ખવે, પરિયેસમાનો સુતવા અરિયસાવકો તીહિ ઠાનેહિ સમ્મા પટિપજ્જતિ – કાયેન, વાચાય, મનસા.

‘‘સેય્યથાપિ, ભિક્ખવે, પુરિસો આદિત્તં તિણુક્કં સુક્ખે તિણદાયે નિક્ખિપેય્ય; તમેનં હત્થેહિ ચ પાદેહિ ચ ખિપ્પમેવ નિબ્બાપેય્ય. એવઞ્હિ, ભિક્ખવે, યે તિણકટ્ઠનિસ્સિતા પાણા તે ન અનયબ્યસનં આપજ્જેય્યું. એવમેવ ખો, ભિક્ખવે, યો હિ કોચિ સમણો વા બ્રાહ્મણો વા ઉપ્પન્નં વિસમગતં સઞ્ઞં ખિપ્પમેવ પજહતિ વિનોદેતિ બ્યન્તીકરોતિ અનભાવં ગમેતિ, સો દિટ્ઠે ચેવ ધમ્મે સુખં વિહરતિ અવિઘાતં અનુપાયાસં અપરિળાહં; કાયસ્સ ચ ભેદા પરં મરણા સુગતિ પાટિકઙ્ખા’’તિ. દુતિયં.