૬. દુતિયપથવીસુત્તં

૭૯. સાવત્થિયં વિહરતિ…પે… ‘‘સેય્યથાપિ, ભિક્ખવે, મહાપથવી પરિક્ખયં પરિયાદાનં ગચ્છેય્ય, ઠપેત્વા સત્ત કોલટ્ઠિમત્તિયો ગુળિકા. તં કિં મઞ્ઞથ, ભિક્ખવે, કતમં નુ ખો બહુતરં, યં વા મહાપથવિયા પરિક્ખીણં પરિયાદિણ્ણં યા વા સત્ત કોલટ્ઠિમત્તિયો ગુળિકા અવસિટ્ઠા’’તિ?

‘‘એતદેવ ભન્તે, બહુતરં, મહાપથવિયા, યદિદં પરિક્ખીણં પરિયાદિણ્ણં; અપ્પમત્તિકા સત્ત કોલટ્ઠિમત્તિયો ગુળિકા અવસિટ્ઠા. નેવ સતિમં કલં ઉપેન્તિ ન સહસ્સિમં કલં ઉપેન્તિ ન સતસહસ્સિમં કલં ઉપેન્તિ મહાપથવિયા પરિક્ખીણં પરિયાદિણ્ણં ઉપનિધાય સત્ત કોલટ્ઠિમત્તિયો ગુળિકા અવસિટ્ઠા’’તિ. ‘‘એવમેવ ખો, ભિક્ખવે…પે… ધમ્મચક્ખુપટિલાભો’’તિ. છટ્ઠં.