૧૧. ગગ્ગરાસુત્તં

૨૧૯. એકં સમયં ભગવા ચમ્પાયં વિહરતિ ગગ્ગરાય પોક્ખરણિયા તીરે મહતા ભિક્ખુસઙ્ઘેન સદ્ધિં પઞ્ચમત્તેહિ ભિક્ખુસતેહિ સત્તહિ ચ ઉપાસકસતેહિ સત્તહિ ચ ઉપાસિકાસતેહિ અનેકેહિ ચ દેવતાસહસ્સેહિ. ત્યાસ્સુદં ભગવા અતિરોચતિ [અતિવિરોચતિ (ક.)] વણ્ણેન ચેવ યસસા ચ. અથ ખો આયસ્મતો વઙ્ગીસસ્સ એતદહોસિ – ‘‘અયં ખો ભગવા ચમ્પાયં વિહરતિ ગગ્ગરાય પોક્ખરણિયા તીરે મહતા ભિક્ખુસઙ્ઘેન સદ્ધિં પઞ્ચમત્તેહિ ભિક્ખુસતેહિ સત્તહિ ચ ઉપાસકસતેહિ સત્તહિ ચ ઉપાસિકાસતેહિ અનેકેહિ ચ દેવતાસહસ્સેહિ. ત્યાસ્સુદં ભગવા અતિરોચતિ વણ્ણેન ચેવ યસસા ચ. યંનૂનાહં ભગવન્તં સમ્મુખા સારુપ્પાય ગાથાય અભિત્થવેય્ય’’ન્તિ.

અથ ખો આયસ્મા વઙ્ગીસો ઉટ્ઠાયાસના એકંસં ઉત્તરાસઙ્ગં કરિત્વા યેન ભગવા તેનઞ્જલિં પણામેત્વા ભગવન્તં એતદવોચ – ‘‘પટિભાતિ મં, ભગવા, પટિભાતિ મં, સુગતા’’તિ. ‘‘પટિભાતુ તં, વઙ્ગીસા’’તિ ભગવા અવોચ. અથ ખો આયસ્મા વઙ્ગીસો ભગવન્તં સમ્મુખા સારુપ્પાય ગાથાય અભિત્થવિ –

‘‘ચન્દો યથા વિગતવલાહકે નભે,

વિરોચતિ વિગતમલોવ ભાણુમા;

એવમ્પિ અઙ્ગીરસ ત્વં મહામુનિ,

અતિરોચસિ યસસા સબ્બલોક’’ન્તિ.