૧૦. મોગ્ગલ્લાનસુત્તં

૨૧૮. એકં સમયં ભગવા રાજગહે વિહરતિ ઇસિગિલિપસ્સે કાળસિલાયં મહતા ભિક્ખુસઙ્ઘેન સદ્ધિં પઞ્ચમત્તેહિ ભિક્ખુસતેહિ સબ્બેહેવ અરહન્તેહિ. તેસં સુદં આયસ્મા મહામોગ્ગલ્લાનો ચેતસા ચિત્તં સમન્નેસતિ [સમન્વેસતિ (સ્યા. અટ્ઠ.)] વિપ્પમુત્તં નિરુપધિં. અથ ખો આયસ્મતો વઙ્ગીસસ્સ એતદહોસિ – ‘‘અયં ખો ભગવા રાજગહે વિહરતિ ઇસિગિલિપસ્સે કાળસિલાયં મહતા ભિક્ખુસઙ્ઘેન સદ્ધિં પઞ્ચમત્તેહિ ભિક્ખુસતેહિ સબ્બેહેવ અરહન્તેહિ. તેસં સુદં આયસ્મા મહામોગ્ગલ્લાનો ચેતસા ચિત્તં સમન્નેસતિ વિપ્પમુત્તં નિરુપધિં. યંનૂનાહં આયસ્મન્તં મહામોગ્ગલ્લાનં ભગવતો સમ્મુખા સારુપ્પાહિ ગાથાહિ અભિત્થવેય્ય’’ન્તિ.

અથ ખો આયસ્મા વઙ્ગીસો ઉટ્ઠાયાસના એકંસં ઉત્તરાસઙ્ગં કરિત્વા યેન ભગવા તેનઞ્જલિં પણામેત્વા ભગવન્તં એતદવોચ – ‘‘પટિભાતિ મં, ભગવા, પટિભાતિ મં, સુગતા’’તિ. ‘‘પટિભાતુ તં, વઙ્ગીસા’’તિ ભગવા અવોચ. અથ ખો આયસ્મા વઙ્ગીસો આયસ્મન્તં મહામોગ્ગલ્લાનં ભગવતો સમ્મુખા સારુપ્પાહિ ગાથાહિ અભિત્થવિ –

‘‘નગસ્સ પસ્સે આસીનં, મુનિં દુક્ખસ્સ પારગું;

સાવકા પયિરુપાસન્તિ, તેવિજ્જા મચ્ચુહાયિનો.

‘‘તે ચેતસા અનુપરિયેતિ [અનુપરિયેસતિ (સી. સ્યા. કં.)], મોગ્ગલ્લાનો મહિદ્ધિકો;

ચિત્તં નેસં સમન્નેસં [સમન્વેસં (સ્યા. અટ્ઠ.)], વિપ્પમુત્તં નિરૂપધિં.

‘‘એવં સબ્બઙ્ગસમ્પન્નં, મુનિં દુક્ખસ્સ પારગું;

અનેકાકારસમ્પન્નં, પયિરુપાસન્તિ ગોતમ’’ન્તિ.