૫. અહિંસકસુત્તં

૧૯૧. સાવત્થિનિદાનં. અથ ખો અહિંસકભારદ્વાજો બ્રાહ્મણો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો અહિંસકભારદ્વાજો બ્રાહ્મણો ભગવન્તં એતદવોચ – ‘‘અહિંસકાહં, ભો ગોતમ, અહિંસકાહં, ભો ગોતમા’’તિ.

‘‘યથા નામં તથા ચસ્સ, સિયા ખો ત્વં અહિંસકો;

યો ચ કાયેન વાચાય, મનસા ચ ન હિંસતિ;

સ વે અહિંસકો હોતિ, યો પરં ન વિહિંસતી’’તિ.

એવં વુત્તે, અહિંસકભારદ્વાજો બ્રાહ્મણો ભગવન્તં એતદવોચ – ‘‘અભિક્કન્તં, ભો ગોતમ…પે… અબ્ભઞ્ઞાસિ. અઞ્ઞતરો ચ પનાયસ્મા અહિંસકભારદ્વાજો અરહતં અહોસી’’તિ.