૬. ચાલાસુત્તં

૧૬૭. સાવત્થિનિદાનં. અથ ખો ચાલા ભિક્ખુની પુબ્બણ્હસમયં નિવાસેત્વા…પે… અઞ્ઞતરસ્મિં રુક્ખમૂલે દિવાવિહારં નિસીદિ. અથ ખો મારો પાપિમા યેન ચાલા ભિક્ખુની તેનુપસઙ્કમિ; ઉપસઙ્કમિત્વા ચાલં ભિક્ખુનિં એતદવોચ – ‘‘કિં નુ ત્વં, ભિક્ખુનિ, ન રોચેસી’’તિ? ‘‘જાતિં ખ્વાહં, આવુસો, ન રોચેમી’’તિ.

‘‘કિં નુ જાતિં ન રોચેસિ, જાતો કામાનિ ભુઞ્જતિ;

કો નુ તં ઇદમાદપયિ, જાતિં મા રોચ [મા રોચેસિ (સી. પી.)] ભિક્ખુની’’તિ.

‘‘જાતસ્સ મરણં હોતિ, જાતો દુક્ખાનિ ફુસ્સતિ [પસ્સતિ (સી. પી.)];

બન્ધં વધં પરિક્લેસં, તસ્મા જાતિં ન રોચયે.

‘‘બુદ્ધો ધમ્મમદેસેસિ, જાતિયા સમતિક્કમં;

સબ્બદુક્ખપ્પહાનાય, સો મં સચ્ચે નિવેસયિ.

‘‘યે ચ રૂપૂપગા સત્તા, યે ચ અરૂપટ્ઠાયિનો;

નિરોધં અપ્પજાનન્તા, આગન્તારો પુનબ્ભવ’’ન્તિ.

અથ ખો મારો પાપિમા ‘‘જાનાતિ મં ચાલા ભિક્ખુની’’તિ દુક્ખી દુમ્મનો તત્થેવન્તરધાયીતિ.