૫. ભિક્ખુનીસંયુત્તં

૧. આળવિકાસુત્તં

૧૬૨. એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. અથ ખો આળવિકા ભિક્ખુની પુબ્બણ્હસમયં નિવાસેત્વા પત્તચીવરમાદાય સાવત્થિં પિણ્ડાય પાવિસિ. સાવત્થિયં પિણ્ડાય ચરિત્વા પચ્છાભત્તં પિણ્ડપાતપટિક્કન્તા યેન અન્ધવનં તેનુપસઙ્કમિ વિવેકત્થિની. અથ ખો મારો પાપિમા આળવિકાય ભિક્ખુનિયા ભયં છમ્ભિતત્તં લોમહંસં ઉપ્પાદેતુકામો વિવેકમ્હા ચાવેતુકામો યેન આળવિકા ભિક્ખુની તેનુપસઙ્કમિ; ઉપસઙ્કમિત્વા આળવિકં ભિક્ખુનિં ગાથાય અજ્ઝભાસિ –

‘‘નત્થિ નિસ્સરણં લોકે, કિં વિવેકેન કાહસિ;

ભુઞ્જસ્સુ કામરતિયો, માહુ પચ્છાનુતાપિની’’તિ.

અથ ખો આળવિકાય ભિક્ખુનિયા એતદહોસિ – ‘‘કો નુ ખ્વાયં મનુસ્સો વા અમનુસ્સો વા ગાથં ભાસતી’’તિ? અથ ખો આળવિકાય ભિક્ખુનિયા એતદહોસિ – ‘‘મારો ખો અયં પાપિમા મમ ભયં છમ્ભિતત્તં લોમહંસં ઉપ્પાદેતુકામો વિવેકમ્હા ચાવેતુકામો ગાથં ભાસતી’’તિ. અથ ખો આળવિકા ભિક્ખુની ‘‘મારો અયં પાપિમા’’ ઇતિ વિદિત્વા મારં પાપિમન્તં ગાથાહિ પચ્ચભાસિ –

‘‘અત્થિ નિસ્સરણં લોકે, પઞ્ઞાય મે સુફુસ્સિતં [સુફસ્સિતં (સી. પી.)];

પમત્તબન્ધુ પાપિમ, ન ત્વં જાનાસિ તં પદં.

‘‘સત્તિસૂલૂપમા કામા, ખન્ધાસં અધિકુટ્ટના;

યં ત્વં કામરતિં બ્રૂસિ, અરતિ મય્હ સા અહૂ’’તિ.

અથ ખો મારો પાપિમા ‘‘જાનાતિ મં આળવિકા ભિક્ખુની’’તિ દુક્ખી દુમ્મનો તત્થેવન્તરધાયીતિ.

૨. સોમાસુત્તં

૧૬૩. સાવત્થિનિદાનં. અથ ખો સોમા ભિક્ખુની પુબ્બણ્હસમયં નિવાસેત્વા પત્તચીવરમાદાય સાવત્થિં પિણ્ડાય પાવિસિ. સાવત્થિયં પિણ્ડાય ચરિત્વા પચ્છાભત્તં પિણ્ડપાતપટિક્કન્તા યેન અન્ધવનં તેનુપસઙ્કમિ દિવાવિહારાય. અન્ધવનં અજ્ઝોગાહેત્વા અઞ્ઞતરસ્મિં રુક્ખમૂલે દિવાવિહારં નિસીદિ. અથ ખો મારો પાપિમા સોમાય ભિક્ખુનિયા ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો યેન સોમા ભિક્ખુની તેનુપસઙ્કમિ; ઉપસઙ્કમિત્વા સોમં ભિક્ખુનિં ગાથાય અજ્ઝભાસિ –

‘‘યં તં ઇસીહિ પત્તબ્બં, ઠાનં દુરભિસમ્ભવં;

ન તં દ્વઙ્ગુલપઞ્ઞાય, સક્કા પપ્પોતુમિત્થિયા’’તિ.

અથ ખો સોમાય ભિક્ખુનિયા એતદહોસિ – ‘‘કો નુ ખ્વાયં મનુસ્સો વા અમનુસ્સો વા ગાથં ભાસતી’’તિ? અથ ખો સોમાય ભિક્ખુનિયા એતદહોસિ – ‘‘મારો ખો અયં પાપિમા મમ ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો ગાથં ભાસતી’’તિ. અથ ખો સોમા ભિક્ખુની ‘‘મારો અયં પાપિમા’’ ઇતિ વિદિત્વા મારં પાપિમન્તં ગાથાહિ પચ્ચભાસિ –

‘‘ઇત્થિભાવો કિં કયિરા, ચિત્તમ્હિ સુસમાહિતે;

ઞાણમ્હિ વત્તમાનમ્હિ, સમ્મા ધમ્મં વિપસ્સતો.

‘‘યસ્સ નૂન સિયા એવં, ઇત્થાહં પુરિસોતિ વા;

કિઞ્ચિ વા પન અઞ્ઞસ્મિ [અસ્મીતિ (સ્યા. કં. પી.)], તં મારો વત્તુમરહતી’’તિ.

અથ ખો મારો પાપિમા ‘‘જાનાતિ મં સોમા ભિક્ખુની’’તિ દુક્ખી દુમ્મનો તત્થેવન્તરધાયીતિ.

૩. કિસાગોતમીસુત્તં

૧૬૪. સાવત્થિનિદાનં. અથ ખો કિસાગોતમી ભિક્ખુની પુબ્બણ્હસમયં નિવાસેત્વા પત્તચીવરમાદાય સાવત્થિં પિણ્ડાય પાવિસિ. સાવત્થિયં પિણ્ડાય ચરિત્વા પચ્છાભત્તં પિણ્ડપાતપટિક્કન્તા યેન અન્ધવનં તેનુપસઙ્કમિ, દિવાવિહારાય. અન્ધવનં અજ્ઝોગાહેત્વા અઞ્ઞતરસ્મિં રુક્ખમૂલે દિવાવિહારં નિસીદિ. અથ ખો મારો પાપિમા કિસાગોતમિયા ભિક્ખુનિયા ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો યેન કિસાગોતમી ભિક્ખુની તેનુપસઙ્કમિ; ઉપસઙ્કમિત્વા કિસાગોતમિં ભિક્ખુનિં ગાથાય અજ્ઝભાસિ –

‘‘કિં નુ ત્વં મતપુત્તાવ, એકમાસિ રુદમ્મુખી;

વનમજ્ઝગતા એકા, પુરિસં નુ ગવેસસી’’તિ.

અથ ખો કિસાગોતમિયા ભિક્ખુનિયા એતદહોસિ – ‘‘કો નુ ખ્વાયં મનુસ્સો વા અમનુસ્સો વા ગાથં ભાસતી’’તિ? અથ ખો કિસાગોતમિયા ભિક્ખુનિયા એતદહોસિ – ‘‘મારો ખો અયં પાપિમા મમ ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો ગાથં ભાસતી’’તિ.

અથ ખો કિસાગોતમી ભિક્ખુની ‘‘મારો અયં પાપિમા’’ ઇતિ વિદિત્વા મારં પાપિમન્તં ગાથાહિ પચ્ચભાસિ –

‘‘અચ્ચન્તં મતપુત્તામ્હિ, પુરિસા એતદન્તિકા;

ન સોચામિ ન રોદામિ, ન તં ભાયામિ આવુસો.

‘‘સબ્બત્થ વિહતા નન્દી, તમોક્ખન્ધો પદાલિતો;

જેત્વાન મચ્ચુનો [જેત્વા નમુચિનો (સી.)] સેનં, વિહરામિ અનાસવા’’તિ.

અથ ખો મારો પાપિમા ‘‘જાનાતિ મં કિસાગોતમી ભિક્ખુની’’તિ દુક્ખી દુમ્મનો તત્થેવન્તરધાયીતિ.

૪. વિજયાસુત્તં

૧૬૫. સાવત્થિનિદાનં. અથ ખો વિજયા ભિક્ખુની પુબ્બણ્હસમયં નિવાસેત્વા…પે… અઞ્ઞતરસ્મિં રુક્ખમૂલે દિવાવિહારં નિસીદિ. અથ ખો મારો પાપિમા વિજયાય ભિક્ખુનિયા ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો યેન વિજયા ભિક્ખુની તેનુપસઙ્કમિ; ઉપસઙ્કમિત્વા વિજયં ભિક્ખુનિં ગાથાય અજ્ઝભાસિ –

‘‘દહરા ત્વં રૂપવતી, અહઞ્ચ દહરો સુસુ;

પઞ્ચઙ્ગિકેન તુરિયેન, એહય્યેભિરમામસે’’તિ [એહિ અય્યે રમામસેતિ (સી.)].

અથ ખો વિજયાય ભિક્ખુનિયા એતદહોસિ – ‘‘કો નુ ખ્વાયં મનુસ્સો વા અમનુસ્સો વા ગાથં ભાસતી’’તિ? અથ ખો વિજયાય ભિક્ખુનિયા એતદહોસિ – ‘‘મારો ખો અયં પાપિમા મમ ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો ગાથં ભાસતી’’તિ. અથ ખો વિજયા ભિક્ખુની ‘‘મારો અયં પાપિમા’’ ઇતિ વિદિત્વા મારં પાપિમન્તં ગાથાહિ પચ્ચભાસિ –

‘‘રૂપા સદ્દા રસા ગન્ધા, ફોટ્ઠબ્બા ચ મનોરમા;

નિય્યાતયામિ તુય્હેવ, માર નાહં તેનત્થિકા.

‘‘ઇમિના પૂતિકાયેન, ભિન્દનેન પભઙ્ગુના;

અટ્ટીયામિ હરાયામિ, કામતણ્હા સમૂહતા.

‘‘યે ચ રૂપૂપગા સત્તા, યે ચ અરૂપટ્ઠાયિનો [આરુપ્પટ્ઠાયિનો (સી. પી.)];

યા ચ સન્તા સમાપત્તિ, સબ્બત્થ વિહતો તમો’’તિ.

અથ ખો મારો પાપિમા ‘‘જાનાતિ મં વિજયા ભિક્ખુની’’તિ દુક્ખી દુમ્મનો તત્થેવન્તરધાયીતિ.

૫. ઉપ્પલવણ્ણાસુત્તં

૧૬૬. સાવત્થિનિદાનં. અથ ખો ઉપ્પલવણ્ણા ભિક્ખુની પુબ્બણ્હસમયં નિવાસેત્વા…પે… અઞ્ઞતરસ્મિં સુપુપ્ફિતસાલરુક્ખમૂલે અટ્ઠાસિ. અથ ખો મારો પાપિમા ઉપ્પલવણ્ણાય ભિક્ખુનિયા ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો યેન ઉપ્પલવણ્ણા ભિક્ખુની તેનુપસઙ્કમિ; ઉપસઙ્કમિત્વા ઉપ્પલવણ્ણં ભિક્ખુનિં ગાથાય અજ્ઝભાસિ –

‘‘સુપુપ્ફિતગ્ગં ઉપગમ્મ ભિક્ખુનિ,

એકા તુવં તિટ્ઠસિ સાલમૂલે;

ન ચત્થિ તે દુતિયા વણ્ણધાતુ,

બાલે ન ત્વં ભાયસિ ધુત્તકાન’’ન્તિ.

અથ ખો ઉપ્પલવણ્ણાય ભિક્ખુનિયા એતદહોસિ – ‘‘કો નુ ખ્વાયં મનુસ્સો વા અમનુસ્સો વા ગાથં ભાસતી’’તિ? અથ ખો ઉપ્પલવણ્ણાય ભિક્ખુનિયા એતદહોસિ – ‘‘મારો ખો અયં પાપિમા મમ ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો ગાથં ભાસતી’’તિ. અથ ખો ઉપ્પલવણ્ણા ભિક્ખુની ‘‘મારો અયં પાપિમા’’ ઇતિ વિદિત્વા મારં પાપિમન્તં ગાથાહિ પચ્ચભાસિ –

‘‘સતં સહસ્સાનિપિ ધુત્તકાનં,

ઇધાગતા તાદિસકા ભવેય્યું;

લોમં ન ઇઞ્જામિ ન સન્તસામિ,

ન માર ભાયામિ તમેકિકાપિ.

‘‘એસા અન્તરધાયામિ, કુચ્છિં વા પવિસામિ તે;

પખુમન્તરિકાયમ્પિ, તિટ્ઠન્તિં મં ન દક્ખસિ.

‘‘ચિત્તસ્મિં વસીભૂતામ્હિ, ઇદ્ધિપાદા સુભાવિતા;

સબ્બબન્ધનમુત્તામ્હિ, ન તં ભાયામિ આવુસો’’તિ.

અથ ખો મારો પાપિમા ‘‘જાનાતિ મં ઉપ્પલવણ્ણા ભિક્ખુની’’તિ દુક્ખી દુમ્મનો તત્થેવન્તરધાયીતિ.

૬. ચાલાસુત્તં

૧૬૭. સાવત્થિનિદાનં. અથ ખો ચાલા ભિક્ખુની પુબ્બણ્હસમયં નિવાસેત્વા…પે… અઞ્ઞતરસ્મિં રુક્ખમૂલે દિવાવિહારં નિસીદિ. અથ ખો મારો પાપિમા યેન ચાલા ભિક્ખુની તેનુપસઙ્કમિ; ઉપસઙ્કમિત્વા ચાલં ભિક્ખુનિં એતદવોચ – ‘‘કિં નુ ત્વં, ભિક્ખુનિ, ન રોચેસી’’તિ? ‘‘જાતિં ખ્વાહં, આવુસો, ન રોચેમી’’તિ.

‘‘કિં નુ જાતિં ન રોચેસિ, જાતો કામાનિ ભુઞ્જતિ;

કો નુ તં ઇદમાદપયિ, જાતિં મા રોચ [મા રોચેસિ (સી. પી.)] ભિક્ખુની’’તિ.

‘‘જાતસ્સ મરણં હોતિ, જાતો દુક્ખાનિ ફુસ્સતિ [પસ્સતિ (સી. પી.)];

બન્ધં વધં પરિક્લેસં, તસ્મા જાતિં ન રોચયે.

‘‘બુદ્ધો ધમ્મમદેસેસિ, જાતિયા સમતિક્કમં;

સબ્બદુક્ખપ્પહાનાય, સો મં સચ્ચે નિવેસયિ.

‘‘યે ચ રૂપૂપગા સત્તા, યે ચ અરૂપટ્ઠાયિનો;

નિરોધં અપ્પજાનન્તા, આગન્તારો પુનબ્ભવ’’ન્તિ.

અથ ખો મારો પાપિમા ‘‘જાનાતિ મં ચાલા ભિક્ખુની’’તિ દુક્ખી દુમ્મનો તત્થેવન્તરધાયીતિ.

૭. ઉપચાલાસુત્તં

૧૬૮. સાવત્થિનિદાનં. અથ ખો ઉપચાલા ભિક્ખુની પુબ્બણ્હસમયં નિવાસેત્વા…પે… અઞ્ઞતરસ્મિં રુક્ખમૂલે દિવાવિહારં નિસીદિ. અથ ખો મારો પાપિમા યેન ઉપચાલા ભિક્ખુની તેનુપસઙ્કમિ; ઉપસઙ્કમિત્વા ઉપચાલં ભિક્ખુનિં એતદવોચ – ‘‘કત્થ નુ ત્વં, ભિક્ખુનિ, ઉપ્પજ્જિતુકામા’’તિ? ‘‘ન ખ્વાહં, આવુસો, કત્થચિ ઉપ્પજ્જિતુકામા’’તિ.

‘‘તાવતિંસા ચ યામા ચ, તુસિતા ચાપિ દેવતા;

નિમ્માનરતિનો દેવા, યે દેવા વસવત્તિનો;

તત્થ ચિત્તં પણિધેહિ, રતિં પચ્ચનુભોસ્સસી’’તિ.

‘‘તાવતિંસા ચ યામા ચ, તુસિતા ચાપિ દેવતા;

નિમ્માનરતિનો દેવા, યે દેવા વસવત્તિનો;

કામબન્ધનબદ્ધા તે, એન્તિ મારવસં પુન.

‘‘સબ્બો આદીપિતો [સબ્બોવ આદિત્તો (સ્યા. કં.)] લોકો, સબ્બો લોકો પધૂપિતો;

સબ્બો પજ્જલિતો [પજ્જલિતો (સબ્બત્થ)] લોકો, સબ્બો લોકો પકમ્પિતો.

‘‘અકમ્પિતં અપજ્જલિતં [અચલિતં (સી. સ્યા. કં. પી.)], અપુથુજ્જનસેવિતં;

અગતિ યત્થ મારસ્સ, તત્થ મે નિરતો મનો’’તિ.

અથ ખો મારો પાપિમા ‘‘જાનાતિ મં ઉપચાલા ભિક્ખુની’’તિ દુક્ખી દુમ્મનો તત્થેવન્તરધાયીતિ.

૮. સીસુપચાલાસુત્તં

૧૬૯. સાવત્થિનિદાનં. અથ ખો સીસુપચાલા [સીસૂપચાલા (સી.)] ભિક્ખુની પુબ્બણ્હસમયં નિવાસેત્વા …પે… અઞ્ઞતરસ્મિં રુક્ખમૂલે દિવાવિહારં નિસીદિ. અથ ખો મારો પાપિમા યેન સીસુપચાલા ભિક્ખુની તેનુપસઙ્કમિ; ઉપસઙ્કમિત્વા સીસુપચાલં ભિક્ખુનિં એતદવોચ – ‘‘કસ્સ નુ ત્વં, ભિક્ખુનિ, પાસણ્ડં રોચેસી’’તિ? ‘‘ન ખ્વાહં, આવુસો, કસ્સચિ પાસણ્ડં રોચેમી’’તિ.

‘‘કં નુ ઉદ્દિસ્સ મુણ્ડાસિ, સમણી વિય દિસ્સસિ;

ન ચ રોચેસિ પાસણ્ડં, કિમિવ ચરસિ મોમૂહા’’તિ.

‘‘ઇતો બહિદ્ધા પાસણ્ડા, દિટ્ઠીસુ પસીદન્તિ તે;

ન તેસં ધમ્મં રોચેમિ, તે ધમ્મસ્સ અકોવિદા.

‘‘અત્થિ સક્યકુલે જાતો, બુદ્ધો અપ્પટિપુગ્ગલો;

સબ્બાભિભૂ મારનુદો, સબ્બત્થમપરાજિતો.

‘‘સબ્બત્થ મુત્તો અસિતો, સબ્બં પસ્સતિ ચક્ખુમા;

સબ્બકમ્મક્ખયં પત્તો, વિમુત્તો ઉપધિસઙ્ખયે;

સો મય્હં ભગવા સત્થા, તસ્સ રોચેમિ સાસન’’ન્તિ.

અથ ખો મારો પાપિમા ‘‘જાનાતિ મં સીસુપચાલા ભિક્ખુની’’તિ દુક્ખી દુમ્મનો તત્થેવન્તરધાયીતિ.

૯. સેલાસુત્તં

૧૭૦. સાવત્થિનિદાનં. અથ ખો સેલા ભિક્ખુની પુબ્બણ્હસમયં નિવાસેત્વા…પે… અઞ્ઞતરસ્મિં રુક્ખમૂલે દિવાવિહારં નિસીદિ. અથ ખો મારો પાપિમા સેલાય ભિક્ખુનિયા ભયં છમ્ભિતત્તં લોમહંસં ઉપ્પાદેતુકામો…પે… સેલં ભિક્ખુનિં ગાથાય અજ્ઝભાસિ –

‘‘કેનિદં પકતં બિમ્બં, ક્વનુ [ક્વન્નુ (સી. પી.), ક્વચિ (સ્યા. કં. ક.)] બિમ્બસ્સ કારકો;

ક્વનુ બિમ્બં સમુપ્પન્નં, ક્વનુ બિમ્બં નિરુજ્ઝતી’’તિ.

અથ ખો સેલાય ભિક્ખુનિયા એતદહોસિ – ‘‘કો નુ ખ્વાયં મનુસ્સો વા અમનુસ્સો વા ગાથં ભાસતી’’તિ? અથ ખો સેલાય ભિક્ખુનિયા એતદહોસિ – ‘‘મારો ખો અયં પાપિમા મમ ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો ગાથં ભાસતી’’તિ. અથ ખો સેલા ભિક્ખુની ‘‘મારો અયં પાપિમા’’ ઇતિ વિદિત્વા મારં પાપિમન્તં ગાથાહિ પચ્ચભાસિ –

‘‘નયિદં અત્તકતં [નયિદં પકતં (સ્યા. કં.)] બિમ્બં, નયિદં પરકતં [નયિદં પકતં (સ્યા. કં.)] અઘં;

હેતું પટિચ્ચ સમ્ભૂતં, હેતુભઙ્ગા નિરુજ્ઝતિ.

‘‘યથા અઞ્ઞતરં બીજં, ખેત્તે વુત્તં વિરૂહતિ;

પથવીરસઞ્ચાગમ્મ, સિનેહઞ્ચ તદૂભયં.

‘‘એવં ખન્ધા ચ ધાતુયો, છ ચ આયતના ઇમે;

હેતું પટિચ્ચ સમ્ભૂતા, હેતુભઙ્ગા નિરુજ્ઝરે’’તિ.

અથ ખો મારો પાપિમા ‘‘જાનાતિ મં સેલા ભિક્ખુની’’તિ દુક્ખી દુમ્મનો તત્થેવન્તરધાયીતિ.

૧૦. વજિરાસુત્તં

૧૭૧. સાવત્થિનિદાનં. અથ ખો વજિરા ભિક્ખુની પુબ્બણ્હસમયં નિવાસેત્વા પત્તચીવરમાદાય સાવત્થિં પિણ્ડાય પાવિસિ. સાવત્થિયં પિણ્ડાય ચરિત્વા પચ્છાભત્તં પિણ્ડપાતપટિક્કન્તા યેન અન્ધવનં તેનુપસઙ્કમિ દિવાવિહારાય. અન્ધવનં અજ્ઝોગાહેત્વા અઞ્ઞતરસ્મિં રુક્ખમૂલે દિવાવિહારં નિસીદિ. અથ ખો મારો પાપિમા વજિરાય ભિક્ખુનિયા ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો યેન વજિરા ભિક્ખુની તેનુપસઙ્કમિ; ઉપસઙ્કમિત્વા વજિરં ભિક્ખુનિં ગાથાય અજ્ઝભાસિ –

‘‘કેનાયં પકતો સત્તો, કુવં સત્તસ્સ કારકો;

કુવં સત્તો સમુપ્પન્નો, કુવં સત્તો નિરુજ્ઝતી’’તિ.

અથ ખો વજિરાય ભિક્ખુનિયા એતદહોસિ – ‘‘કો નુ ખ્વાયં મનુસ્સો વા અમનુસ્સો વા ગાથં ભાસતી’’તિ? અથ ખો વજિરાય ભિક્ખુનિયા એતદહોસિ – ‘‘મારો ખો અયં પાપિમા મમ ભયં છમ્ભિતત્તં લોમહંસં ઉપ્પાદેતુકામો સમાધિમ્હા ચાવેતુકામો ગાથં ભાસતી’’તિ. અથ ખો વજિરા ભિક્ખુની ‘‘મારો અયં પાપિમા’’ ઇતિ વિદિત્વા, મારં પાપિમન્તં ગાથાહિ પચ્ચભાસિ –

‘‘કિં નુ સત્તોતિ પચ્ચેસિ, માર દિટ્ઠિગતં નુ તે;

સુદ્ધસઙ્ખારપુઞ્જોયં, નયિધ સત્તુપલબ્ભતિ.

‘‘યથા હિ અઙ્ગસમ્ભારા, હોતિ સદ્દો રથો ઇતિ;

એવં ખન્ધેસુ સન્તેસુ, હોતિ સત્તોતિ સમ્મુતિ [સમ્મતિ (સ્યા. કં.)].

‘‘દુક્ખમેવ હિ સમ્ભોતિ, દુક્ખં તિટ્ઠતિ વેતિ ચ;

નાઞ્ઞત્ર દુક્ખા સમ્ભોતિ, નાઞ્ઞં દુક્ખા નિરુજ્ઝતી’’તિ.

અથ ખો મારો પાપિમા ‘‘જાનાતિ મં વજિરા ભિક્ખુની’’તિ દુક્ખી દુમ્મનો તત્થેવન્તરધાયીતિ.

ભિક્ખુનીસંયુત્તં સમત્તં.