૬. કામદસુત્તં

૮૭. સાવત્થિનિદાનં. એકમન્તં ઠિતો ખો કામદો દેવપુત્તો ભગવન્તં એતદવોચ – ‘‘દુક્કરં ભગવા, સુદુક્કરં ભગવા’’તિ.

‘‘દુક્કરં વાપિ કરોન્તિ (કામદાતિ ભગવા),

સેખા સીલસમાહિતા;

ઠિતત્તા અનગારિયુપેતસ્સ,

તુટ્ઠિ હોતિ સુખાવહા’’તિ.

‘‘દુલ્લભા ભગવા યદિદં તુટ્ઠી’’તિ.

‘‘દુલ્લભં વાપિ લભન્તિ (કામદાતિ ભગવા),

ચિત્તવૂપસમે રતા;

યેસં દિવા ચ રત્તો ચ,

ભાવનાય રતો મનો’’તિ.

‘‘દુસ્સમાદહં ભગવા યદિદં ચિત્ત’’ન્તિ.

‘‘દુસ્સમાદહં વાપિ સમાદહન્તિ (કામદાતિ ભગવા),

ઇન્દ્રિયૂપસમે રતા;

તે છેત્વા મચ્ચુનો જાલં,

અરિયા ગચ્છન્તિ કામદા’’તિ.

‘‘દુગ્ગમો ભગવા વિસમો મગ્ગો’’તિ.

‘‘દુગ્ગમે વિસમે વાપિ, અરિયા ગચ્છન્તિ કામદ;

અનરિયા વિસમે મગ્ગે, પપતન્તિ અવંસિરા;

અરિયાનં સમો મગ્ગો, અરિયા હિ વિસમે સમા’’તિ.